Read Tshiluba Yirmeya 49 Bible Online

Yirmeya 49 - Tshiluba bible

Yirmeya 49

¹Bua bidi bitangila bena Amone, Maweja-Nangila udi wamba ne: “Mvidie Milkome uvua mukuate, buloba bua Ngade[326] bua tshinyi? Bena Amone badi basomba mu bimenga bia bena Izrayele bua tshinyi? Bena Izrayele kabena ne bana badi mua kupiana buloba buabu anyi?”

²Ke padi Maweja-Nangila wamba ne: “Dituku diadia bantu badi basomba mu Raba, tshimenga tshinene tshia bena Amone, nebumvue mutoyi wa mvita. Tshimenga etshi netshishale tshipela. Misoku idi natshi mutumba nebayibutule ne kapia. Diba adi, Izrayele neangate tshiakabidi buloba buvua buende.” Ke mudi Maweja-Nangila wamba nanku.

³Nuenu bena Eshebone dilayi muadi. Nuambe ne: “Tshimenga tshia Ayi ntshibutuke.” Nuenu misoku idi mutumba ne Raba, lombayi bua banuambuluishe. Luatayi bilamba bia lufuila. Dilayi muadi. Lambakanayi mu lupangu eku ne kuaka: mvidie Milkome udi uya mu ditunga dia bende mu bupika, pamue ne batuangaji bende ne balombodi[327] ba mu bukalenga.

⁴Eyi, wewe Raba mushikankunde mutomboke, uvua uditambisha bua bintu bivule bidi mu tshibandabanda tshia mushinga mukole. Uvua ukonka ne: “Udi mua kunduisha nnganyi?”

⁵Maweja-Nangila Mvidi. Mukulu wa bukole buonsu udi wamba ne: “Ndi nkutumina mvita ifuma nseke yonsu. Nennukuatshishe bowa bukole. Nebanuipate bonsu, nunyeme, kanuyi nutangila panyima. Kakuakushala muntu udi mua kusangisha kabidi bantu badi banyema.

⁶Kadi dituku dikuabu, ditunga dia Mowabe nedipete kabidi diakalenga kundi.” Ke mudi Maweja-Nangila wamba nanku.

⁷Maweja-Nangila wa bukole buonsu udi umanyisha malu adi atangila bena Edome, wamba ne: Bena meji kabena kabidi mu Temane[328] anyi? Bena lungenyi lutue kabena mua kufila kabidi ngenyi anyi? Lungenyi luabu ndunyanguke anyi?

⁸Bena Dedane, kudimukayi, nunyeme! Nusombe ku mbuebue, bualu ndi imubutula anu mpindiewu, nuenu ndelanganyi ya Esawu.[329] Ke tshikondu tshindi ne bua kununyoka!

⁹Padi banowi bafika muenu, kabakushiya tshisangi nansha tshimue tshia tumuma tua mvinyo to. Pabuela bivi butuku, nebanyange bintu bionsu, kabayi bashiya tshintu.

¹⁰Nuenu ndelanganyi ya Esawu, meme Maweja-Nangila nennufile mu bianza bia baluishi benu. Nembaleje muaba unudi kanuyi mua kusokoma kabidi to. Tshisamba tshienu ntshibutuke. Muena mutumba nansha umue kena mua kuamba[330] ne:

¹¹“Panuafua, meme nendishe bana benu ba nshiya, nendame bakaji benu bakamba bimpe.”

¹²Maweja-Nangila udi wamba ne: “Nuteleje bimpe, bantu bamvua tshiyi musue kunuishila mu dikopu,[331] bavua bumvue makenga makole amvua mubatumine bua tshiji. Kadi wewe Edome udi wela meji ne: kuena muena tshibawu anyi? Udi amu muena tshibawu. Nanku makenga andi ntuma bua tshiji neakukuate!

¹³Ndinditshipane: Bu mundi Mvidi Mukulu, tshimenga tshiebe tshikulu tshia Bosra netshikale tshipela tshidi tshikuatshisha bantu bowa. Netshikale dikolu, muaba udibu batela bu tshilejilu padibu bela mulawu. Bimenga bidi mutumba ne Bosra nebibutuke tshiendelele.” Ke mudi Maweja-Nangila muambe nanku.

¹⁴Maweja-Nangila uvua mutume mukenji kudi muntu umanyisha bukua bisamba ne: “Nsangishilayi bena mvita benu, nuye kuluisha bena Edome. Jukayi nuye kubanga mvita.

¹⁵Wewe Edome, nenkuenze tshisamba tshishadile ku bisamba bikuabu bionsu. Tshisamba tshidi bantu bonsu bapetula,

¹⁶Uvua ukuatshisha bantu bonsu bowa. Uvua udimona bu udi mupile bisamba bionsu. Kadi uvua udidinga. Nansha wewe musombe mu mbuebue, nansha wewe muase pa mikuna mitumbuke, nansha wewe muenzele disua diebe kulu kupita, mudi nyunyi wa tshiminyi wenza, kadi nenkukulule panshi.” Ke mudi Maweja-Nangila wamba nanku.

¹⁷“Edome neabutuke. Bantu bonsu badi bapitshila mu njila nebakuatshike bowa, bazakala, pamonabu kabutu ka Edome.

¹⁸Maweja-Nangila udi wamba[332] ne: Kabutu kabu nebafuanangane ne ka tshimenga tshia Sodome, tshia Ngomore, ne tshia bimenga bidibu nabi mutumba. Muntu nansha umue kakusomba kabidi mu Edome.”

¹⁹Maweja-Nangila udi wamba ne: “Nengikale bu nyama wa ntambue, udi upatuka mu metu adi ku muelelu wa Yardene, uya muaba muimpe wa kuikishila mu tshipela, muaba utshidi ne biakudia. Nennyemeshe bantu bonsu badi muaba[333] awu musangu umue. Mu ditunga dia Edome nenteke mukalenga undi musungule. Bualu, udi mutufuane meme nnganyi? Udi mua kungasa tshilumbu nnganyi? Mulombodi udi mua kuntuila nkanana udiku anyi?”

²⁰Nanku, teleja tshidi Maweja-Nangila musue kuenzela bena Edome, tshidiye mulongoluele bena Temane. Kanuedi mpata: bana ne bena butekete mene, nebaye nabu bonsu, bu mudibu basaka bimuna.

²¹Padi Edome udishinda panshi, bantu bonsu nebakuatshike bowa, bazakala, buloba bujima nebuzakale. Mbila ya bantu badi balomba diambuluisha neyumvuike too ne ku Mayi manene makunze.

²²Baluishi nebatantshile pabuipi ne Bosra mudi nyunyi wa mukanku ujinguluka mulu. Dituku adi, bilobu bia mvita bia bena Edome nebikenge bu mukaji udi pa lulelu.[334]

²³Bua bena Damase Maweja-Nangila udi wamba ne: Bena mu tshimenga tshia Amate ne tshia Arpade, nebakuatshike bowa bunene pumvuabu lumu lubi. Nebazakale[335] kabayi bapeta dikisha.

²⁴Bena Damase nebatekete mu mikolu. Nebapingane tshianyima, banyema. Nebumvue bowa, bakenga bu mukaji udi ukeba kulela.

²⁵Tshimenga etshi tshivua ne lumu, tshivua tshisankisha, mudibu batshishiya bonsu mbishi?[336]

²⁶Maweja-Nangila wa bukole buonsu udi wamba ne: Bansongalume ba mu tshimenga nebafuile mu tshimenga. Bena mvita bonsu nebafue dituku adi.

²⁷Nengoshe tshimenga tshia Damase. Kapia nekoshe nzubu wa bukalenga wa Benadade.[337]

²⁸Bua bena Arabe ba mu Kedare ne bua makalenga a Ashore bivua Nebukadnesare, mukalenga wa mu Babilone mutshimune, Maweja-Nangila udi wamba ne: Jukayi, nuye kuluisha bena Kedare.[338] Nubutule bisamba bidi mu tshipela luseke ludi diba dipatukila.

²⁹Nuangate ntenta yabu ne bimuna biabu, ngabu yabu ne mabuki abu onsu! Nukuate nyama yabu ya tumelu. Nuele mbila nuambila bena Kedare ne: “Bowa mbunukuate miaba yonsu.[339]”

³⁰Maweja-Nangila udi wamba ne: Bena Arabe, nyemayi lubilu, nubuele mu mbuebue, nusokomemu. Nebukadnesare, mukalenga wa Babilone, mmumane kujadika bua kunuenzela bibi, mmumane kunulongoluela mvita.

³¹Maweja-Nangila udi wamba ne: Jukayi nuye kuluisha bantu aba, badi kabayi bumvua lutatu, basombe amu talalaa. Bimenga biabu kabiena ne tshiibi nansha bikuvu. Badi basombe amu pa nkayabu, ku mpenga.

³²Muluishi neangate nyama yabu ya tumelu. Neabanyenge bimuna biabu bivule mu mvita. Nentangalaje bantu bonsu aba, badi bakungula nsuki pa mpipu.[340] Ke mudi Maweja-Nangila wamba nanku.

³³Tshimenga tshia Ashore netshikale muaba udi nyama ya mibuabua ilala, tshipela tshidi tshikuatshisha bowa kashidi. Muntu nansha umue kakuasamu nansha kusokomamu to.

³⁴Maweja-Nangila uvua muambile muambi Yirmeya mukenji udi utangila bena Elame. Mukenji ewu uvua mumuambilewu ku ntuadijilu kua bukalenga bua Sedekiya, mukalenga wa bena Yuda.[341]

³⁵Maweja-Nangila wa bukole buonsu uvua muambe ne: “Nentshibule buta bua bena Elame, bualu ke muaba udi bukole buabu.

³⁶Ndi ntumina bena Elame mpepele musangu umue, ifuma ku ntengu yonsu inayi ya buloba. Nanku nembatangalaje nseke yonsu. Bena tshimuangi ba bena Elame nenubasangane mu matunga onsu.

³⁷Nenkuate mudimu bua bena Elame batshine baluishi babu, badi basue kubashipa. Bu mundi ne tshiji tshikole, nembakengeshe, nembalondakaje ne mvita too ne mungababutula bonsu.

³⁸Nenshipeshe mukalenga wa bena Elame, ne balombodi ba ditunga. Meme, nenteke nkuasa wanyi wa bumfumu muaba awu.” Ke Maweja-Nangila udi wamba awu.

³⁹“Maweja-Nangila udi wamba kabidi ne: Kadi dikuabu dituku, bena Elame nebapete kabidi diakalenga kundi.”