Read Tshiluba Yirmeya 50 Bible Online

Yirmeya 50 - Tshiluba bible

Yirmeya 50

¹Maweja-Nangila uvua mumanyishe Yirmeya[342] mukenji udi utangila bena Babilone ne tshimenga tshiabu tshinene tshia Babilone wamba ne:

²Numanyishe bantu bonsu lumu elu: Nuambile bantu bonsu bidi bienzeka. Kanusokoki bualu nansha bumue! Eyowa, baluishi nebakuate Babilone. Mpingu yende neifue bundu! Mvidie yende ya dishima neyizakale! Eyowa Bele neafue bundu! Marduke[343] neazakale.

³Tshisamba tshidi tshiluisha Babilone, netshifumine ku mutu wa ditunga.[344] Netshinyange ditunga, dishale tshipela tshidi tshikuatshisha bantu bowa. Muntu nansha umue kakusombamu. Bantu ne nyama bionsu nebinyeme.

⁴Ke mudi Maweja-Nangila wamba ne: diba adi nuenu bena Izrayele ne bena Yuda, nenupingane musangu umue, nuenda nudila muadi, nunkeba meme Mvidi Mukulu wenu.

⁵Nenukebe njila udi muye ku Siyone. Bualu ke muaba unudi nuenda nukeba. Nenufike kundi bua meme kutua nenu ndondu wa kashidi, unudi kanuyi mua kupua muoyi tshiendelele.

⁶Bantu banyi bavua bu tshisumbu tshia mikoku mipambuke. Balami bayi ke bavua bayipambuishe. Ke bavua bayilekelela, itambakana eku ne eku pa mikuna, kayiyi ivuluka kabidi lupangu luayi.[345]

⁷Muntu yonsu uvua ubapeta, uvua anu ubaluisha. Baluishi babu bavua bamba ne: “Tuetu katuena tuenza bualu bubi nansha. Bantu aba badi bena tshibawu, batombokela Maweja-Nangila uvua ubapesha bionsu bivuabu nabi dikenga. Bankambua babu bavua bamutekemena amu yeye.”

⁸Ke padi Maweja-Nangila utuma diyi ne: “Patukayi lubilu mu Babilone,[346] umukayi mu ditunga edi. Fuilakanayi mushiku wa mbelu mudi mbuji ya mpumbu ifuilakana kumpala kua mikoku.

⁹Bualu nentume tshisumbu tshia bantu ba bisamba, bidi ne bukole, bua baluishi bena Babilone. Bantu abu nebafume ku mutu kua ditunga. Nebele mualu wa mvita, bakuate Babilone. Badi bela miketa ifika anu muaba udibu bakidila, amu mudi tshilobu tshia mvita katshiyi tshipingana bianza bitupu.

¹⁰Maweja-Nangila udi wamba ne: Nebapawule ditunga dia bena Babilone. Bonsu badi badikuate nebikale ne disanka.

¹¹Eyowa, sankayi anu kusanka, nudiele kalumbandi! Nuenu bavua bakuate ditunga divua dianyi meme, nutupike mudi bana ba ngombe batupika mu bisosa. Nuele mikunda mudi nyama milume ya tubalu yela.

¹²Tshimenga tshienu tshinene nebatshikengeshe, batshipeshe. Tshisamba tshienu netshikale tshia ndekelu ku bisamba bionsu. Netshishale tshipela, buloba buume, buatuke.”

¹³Bua tshiji tshia Maweja-Nangila, ditunga dia Babilone nedishale munda mutupu, nedishale anu tshipela. Bantu badi bapitshila mu njila, basemena pabuipi ne Babilone, nebakeme, nebazakale, nebele bibingu, pamonabu mudi bionsu binyanguke.

¹⁴Nuenu bonsu bedi ba mikete, nufike, nuele mualu wa mvita. Nunyungulule tshimenga tshia Babilone, nutshiase mikete yenu, nutshiase anu kutshiasa, kanuyi nubala bungi bua mikete yenu. Bualu ke tshimenga tshivua tshitombokela Maweja-Nangila.

¹⁵Elayi bibingu bia mvita nseke yonsu ya tshimenga! Monayi bena Babilone badi badifila, bela maboku mulu, mu bianza bia baluishi babu. Baluishi badi bashimbula tuleya tuatshi, bambula bimana biatshi. Ke mudi Maweja-Nangila udisombuela. Nuenzele bena Babilone bivuabu benzele bantu bakuabu.

¹⁶Mu ditunga dia Babilone, nushipe bantu bonsu ne badi bamiamina ne badi banowa. Kadi bantu benyi badi mu ditunga, banyeme mvita, bualu idi mikole, bapingane muntu kuabu, muntu kuabu.

¹⁷Bena Izrayele bavua bu mikoku mipambuke, ivua nyama ya ntambue ipatshila. Mukalenga wa bena Ashure uvua wa kumpala, uvua muyidie. Pashishe, Nebukadnesare, mukalenga wa bena Babilone, uvua muyitshibule mifuba.[347]

¹⁸Nanku Maweja-Nangila wa bukole buonsu udi wamba ne: “Nennyoke mukalenga wa bena Babilone ne ditunga diende, bu mumvua munyoke kale mukalenga wa bena Ashure.

¹⁹Kadi nempingaje bena Izrayele mu lupangu luabu. Nebapete biakudia bivule mu mpata mimpe, pa mukuna wa Karmele ne mu mpata ya Bashane, pa mukuna wa Efrayime ne mu ditunga dia Ngilaade. Kabakupanga tshintu to.

²⁰Meme Maweja-Nangila ndi ngamba ne: Tshikondu atshi, bantu nebakebe bilema bidi bena Izrayele nabi. Kadi kabakubisangana to. Nebakebe tshilema tshia bena Yuda, kadi kabakumona nansha tshimue to. Bualu bantu bandi mushiye ne muoyi, nembafuile luse.

²¹Maweja-Nangila udi wamba ne: Nuye kuluisha ditunga dia Maratime, nuluangane ne bena mu Pekode,[348] nubashipe, nubabutule bonsu. Nukumbaje bionsu bimvua munutumine diyi.

²²Bantu bakadi bumvua mutoyi wa mvita mu ditunga. Kabutu kakadi pabuipi!

²³Mudi bualu bua nanku buenzeka mbishi? Ditunga dia Babilone divua dia ngindu wa bujitu, uvua uzaza buloba bonsu. Kadi ngindu awu, mbamane kumutshibula, mbamane kumuzaza. Ditunga edi dikadi bu tshipela tshidi tshikuatshisha bowa. munkatshi mua bisamba bikuabu. Mudi bualu bua nanku buenzeka mmunyi?

²⁴Wewe ditunga dia Babilone, mvua mukulongoluele buteyi! Buteyi kukukuata, kuyi nansha mua kudimuka! Bavua bakasangana mukuata mu buteyi! Bualu uvua unduisha meme Maweja-Nangila,”

²⁵Maweja-Nangila udi unzulula diyeba diende. Udi upatulamu bia mvita bua kuleja nabi tshiji tshiende. Mu ditunga dia bena Babilone, bantu nebamone mudimu udi Maweja-Nangila wa bukole buonsu ukuata.

²⁶Nuenu bantu badi bafume ku nseke yonsu, buelayi mu Babilone. Unzululayi mayeba ende. Nukunguje mishiki ya bintu binudi nupawula. Nubutule tshimenga! Kamushadi nansha kantu!

²⁷Nushipe bilobu biende bionsu! Nuye nabi ku tshishipelu, mudibu benza ne ngombe milume. Bena Babilone nudi bena diakabi. Dituku didi Maweja-Nangila ne bua kununyoka, ndimane kufika!

²⁸Bantu bavua bapanduke mu mvita, bavua banyema mu ditunga dia Babilone, ke badi bafika mu Siyone, bela mbila ne: Maweja-Nangila Mvidi Mukulu wetu mmudisombuele. Mmunyoke bena Babilone bua nzubu wende wa tshijila uvuabu banyange.

²⁹Nubikidishe bedi ba mikete bonsu. Nubatume baye kuluisha bena Babilone. Base mitanda yabu banyungulukile tshimenga. Muntu nansha umue kamonyi mua kunyema! Nupingajile bena Babilone bibi bivuabu benzelangana. Nubakengeshe muvuabu bakengeshangana.[349] Bualu bavua badileja ne dikamakama kumpala kua Maweja-Nangila, Mvidi Mukulu wa tshijila wa bena Izrayele.

³⁰Maweja-Nangila udi wamba ne: “Bansongalume ba mu Babilone nebafue mu misesu, bena mvita bende bonsu nebabashipe anu dituku adi.”

³¹Maweja-Nangila wa bukole buonsu udi wamba ne: Ndi nkuluisha wewe ditunga dia Babilone, bualu udi uditambisha. Dituku dia kukunyoka ndimane kufika!

³²Muena ditambisha neatetuke, adishinde. Kakuena muntu udi umujula. Nengoshe bimenga biende ne kapia. Nebanyange bionsu bidibu nabi pabuipi.

³³Maweja-Nangila, Mvidi Mukulu wa Izrayele udi wamba ne: Bena Izrayele ne bena Yuda badi babakengesha kudi bantu badi babakuate mu bupika. Badi babalame ku bukole, babenga bua bapingane kuabu.

³⁴Kadi udi mua kupikula bena Izrayele ne bena Yuda udi ne bukole! Ke meme Maweja-Nangila wa bukole buonsu! Ndi ngangata tshilumbu tshiabu ne manza abidi! Nembueje bupole pa buloba. Nenzakeje bena Babilone.

³⁵Maweja-Nangila udi wamba ne: Bashipe bena Babilone, bashipe bantu ba mu tshimenga tshinene, bashipe balombodi ba mu bukalenga ne bena meji.

³⁶Bashipe bambi babu ba dishima,[350] mbantu bapale! Bashipe bena mvita babu, bowa bubakuate!

³⁷Bashipe nyama yabu ya tubalu, ne matempu abu a mvita. Bashipe bena mvita ba mu bisamba bikuabu bavua baluila bena Babilone mvita. Luzakalu ndubakuate! Bakaji nyangayi biuma biabu! Bipawulayi!

³⁸Umishayi mayi mu ditunga, misulu yonsu yume.[351] Bualu ditunga edi nediuwule ne mpingu tente! Bonsu badi bayinemeka, bakadi bajimija lungenyi.

³⁹Nanku nyama ya tuanda ne ya bimungu neyibuele mu tshimenga. Nyunyi idi ne mikiya neisombemu. Kadi, bantu kabakuasa, kabakusomba kabidi mu ditunga dia Babilone kashidi kashidi.[352]

⁴⁰Maweja-Nangila[353] udi wamba ne: Nenyangakaje ditunga dia Babilone, mumvua munyange Sodome, Ngomore ne bimenga bivua nabi mutumba. Muntu kakuasa, kakusombamu kabidi to.

⁴¹Tshisamba tshidi tshifuma ku mutu kua ditunga,[354] tshia bantu ba bungi, tshia bakalenga banene, badi bafuma ku ndekelu kua buloba.

⁴²Bena mvita batshi badi basempela ne mafuma ne miele, bantu ba tshikisu, kabayi ne luse. Badi benza mutoyi, mudi mayi ela mavuala. Badi babanda pa nyama ya tubalu, bela mualu wa mvita, benda mu milongu, bua kukuluisha wewe Babilone!

⁴³Mukalenga wa ditunga dia Babilone, upeta lumu lua mvita, mu mikolu kumuteketa. Bowa kumukuata bu mukaji pa lulelu.

⁴⁴Maweja-Nangila udi wamba ne: “Nengikale bu nyama wa ntambue,[355] udi upatuka mu metu a ku muelelu wa Yardene, ubuela mu madimi a biakudia. Nennyemeshe bantu bonsu musangu umue. Mu ditunga dia Edome, nenteke mukalenga undi musungule. Bualu udi m umfuane meme, nnganyi? Udi mua kungasa tshilumbu, nnganyi? Mulombodi udi mua kuntuila nkanana, udiku anyi?”

⁴⁵Nanku, telejayi tshidi Maweja-Nangila musue kuenzela bena Babilone, tshidiye mulongoluela bantu bende. Kanuedi mpata: bana ne bena butekete mene, nebaye nabu bonsu, bu mudibu basaka bimuna.

⁴⁶Padibu bela mbila ne: “Baluishi mbakuate Babilone,” buloba nebuzakale, miadi ya bena Babilone neyumvuike mu bisamba bionsu.