Read Tshiluba Yirmeya 6 Bible Online

Yirmeya 6 - Tshiluba bible

Yirmeya 6

¹Nuenu bena Binyamine, umbukayi mu Yerushalayime! Nunyeme bua kudipandisha. Elayi mpungi ku tshimenga tshia Tekowa. Elayi tshimunyi kulu pa mukuna wa Bete-Kereme, numanyishe bantu bualu. Bualu, dikenga dinene ne kabutu bidi binuvuila, bifumina luseke lua ku mutu kua ditunga.[40]

²Tshimenga tshia Siyone ntshimpe tshitambe. Kadi nebatshibutule.[41]

³Bamfumu ba baluishi nebafike ne bena mvita babu, mudi balami ba mikoku bafika ne mikoku yabu bisumbu ne bisumbu. Nebabuele mu Siyone, mulami yonsu ulomba muaba wa kudisha mikoku yende.

⁴Nebele mbila ne: “Jukayi, tuluishe Yerushalayime,[42] tumuluishe munda munya. Ndiakabi kaayi edi! Diba dikadi dibuela! Mundidimbi wa dilolu udi ulepa.

⁵Kakuena bualu! Jukayi, tuluishe Yerushalayime butuku. Tunyangakaje nzubu yende mimpe.”

⁶Maweja-Nangila Mvidi Mukulu wa bukole buonsu, kutumina baluishi betu diyi, wamba ne: “Tapayi mitshi. Imanyikayi mushiki wa buloba bua kuluisha Yerushalayime.” Mbimpe kunyoka tshimenga etshi,[43] bualu benatshi badi bakengeshangana bikole.

⁷Badi baleja lonji luabu kabayi bashikila, mudi mpokolu usukumuka mayi. Mu tshimenga atshi, badi bakula anu bua kushipangana ne bua kukengeshangana. Ndi mumone amu makenga ne mputa.

⁸“Wewe Yerushalayime, udimuke. Kuyi mudimuke, meme nenkubenge. Muebe nemushale anu tshipela, muaba udi bantu kabayi basa.”

⁹Maweja-Nangila Mvidi Mukulu wa bukole buonsu, kutuma diyi, kungambila ne: “Sangishayi bena Yerushalayime bonsu badi bashale ne muoyi, too ne ku wa ndekelu, anu mudi muntu upumbulula tumuma mu budimi bua mvinyo, mudi munowi upola tumuma tua mvinyo tuonsu tudi tushala ku mitshi!”

¹⁰Udi mua kunteleja nnganyi? Bena Yerushalayime badi ne matshi mapate. Kabena basue kuteleja ne ntema to. Maweja-Nangila bionsu biudi ubambila, badi babiangata mu bilele, babibenga kashidi.

¹¹Maweja-Nangila, tshiji tshikole tshiudi wewe natshi, meme kabidi ndi amu natshi. Tshiena kabidi ne mushindu wa kutshituyisha to. Tangalaja tshiji tshianyi atshi ne kudi bana badi mu misesu. Utshipumuine bansonga muaba udibu basangile. Batatu ne bamamu, bakulakaje ne bikunda, nebabakuate bonsu baye nabu mu bupika.

¹²Maweja-Nangila udi wamba ne: Bantu bakuabu nebangate nzubu yabu. Nebangate kabidi madimi abu ne bakaji babu.[44] Eyowa, meme Maweja-Nangila nennyoke bena ditunga edi bonsu.

¹³Bualu bantu aba bonsu, bana ne bantu bakole, badi amu ne lukuka lua bintu, bakeba biuma ne buivi. Bambi ne batuangaji mene badi amu badinga bantu.

¹⁴Dikenga dia bantu banyi bena Izrayele kadiena ditanda bantu aba to. Badi bamba ne: “Kakuena bualu to, malu onsu adi amu mimpe.” Eku malu onsu mmamane kunyanguka.[45]

¹⁵Bantu aba kabena banyingalala to. Kabena ne bundu nansha bukese bua buenzavi buabu, kabena nansha bamanye kutonda bubi buabu. Nebabutuke pamue ne bantu bakuabu bonsu. Nebajimine musangu umue ne bonsu bandi nnyoka.

¹⁶Maweja-Nangila udi wamba ne: Anji imanayi mu njila. Nuele meji a bivua binuenzekele kale. Nukonke bankambua benu. Nanku nusungule njila muimpe. Nulonde njila awu bua nupete dikisha.[46] Kadi kubengabu bamba ne: “Katuena tulonda njila muimpe to.”

¹⁷Ndi mubatekele batentekedi bua kubadimuja, bua kubambila ne: Nudimuke, nuteleje mpungi! Kadi kubengabu ne: “Katuena tuteleja to.”

¹⁸Nanku, bisamba bionsu, telejayi, numanye bualu buavua kuenzekela bantu banyi.[47]

¹⁹Bantu bonsu ba pa buloba, telejayi: Nenkengeshe bantu aba bua kubanyoka bua buenzavi buabu. Bavua bapepeja bionsu bimvua mbambila. Bavua babenga meyi anyi.

²⁰Milambu yabu ya ku Saba, ne mitshi ya dipembu ya mu ditunga dia kule, bidi mua kungenzela tshinyi? Nyama idibu bangoshila pa tshilambuilu, kayena insankisha to. Tshiena musue milambu yabu.

²¹Nanku, Maweja-Nangila udi wamba ne: Nenteye bantu aba mu njila, bua badishinde bonsu, batatu, bana babu, bena mutumba ne balunda babu. Nebabutuke bonsu.

²²Maweja-Nangila udi wamba ne: Bantu nebafumine mu ditunga didi luseke lua ku mutu kua ditunga.[48] Tshisamba tshinene netshituadije luendu ku ndekelu kua buloba.

²³Bena mvita ba mu tshisamba atshi badi ne buta bua mikete ne misongolu, badi ne tshikisu kabayi ne luse. Badi benza mutoyi bu tshiona tshia mayi manene. Badi babanda pa nyama ya tubalu, bamane kudilongolola bua kubanga mvita, bamane kuela mualu wa mvita, bua kukuluisha wewe, Siyone!

²⁴Patuvua bumvue lumu lua mvita ayi, tuetu kuteketa mu maboku. Tuetu kutshina bikole, anu mudi mukaji ukenga pa lulelu.

²⁵Kanupatuki mu tshisuku to. Kanuyi mu njila to. Bualu, muluishi udi mu njila ushipa bantu. Bashipianganyi badi nseke yonsu.[49]

²⁶Bantu banyi bena Izrayele, nuvuale bilamba bia madilu. Nubunguluke mu butu. Nuase miadi, mudibu badila muana mulele umue. Nudile miadi bikole, bualu mushipi wa bantu, neafike kanuyi bamumone to.

²⁷Yirmeya, ndi nkusengelela ne: utete bantu banyi bena Izrayele, mudibu bateta tshiamu. Umanye, ujadike nsombelu wabu.

²⁸Bena Izrayele bonsu mbatomboke bikole. Bonsu mbena dishima. Badi ne muoyi mupape bu tshiamu tshikunze nansha tshifike. Bonsu mbena buenzavi.

²⁹Padi nsenda wela mupuya mu kapia ne mubanza, dimoma didi mua kumuka ku tshiamu. Kadi, nsenda nansha muenza munyi, dimoma kadiena diumuka ku tshiamu tshitoke to. Bantu babi kabena bumuka munkatshi mua bantu banyi.

³⁰Badi bamba bantu abu ne: “Tshiamu tshitoke tshivua ne mushinga, tshikadi katshiyi ne mushinga.” Maweja-Nangila mmumane kubabenga.