Read Tshiluba Yirmeya 8 Bible Online

Yirmeya 8 - Tshiluba bible

Yirmeya 8

¹Pashishe, Maweja-Nangila udi wamba kabidi ne: Nebajule mifuba ya bakalenga ba bena Yuda, ya balombodi ba mu bukalenga, ya batuangaji, ya bambi, ne ya bakulu bakuabu badi basomba mu Yerushalayime.

²Nebatangalaje miluba panshi kumpala kua Diba, kua Ngondu ne kumpala kua Tshiluilu tshia mitotu. Bintu ebi ke mvidie ivua bantu aba banange, ke ivuabu batendelela, ke ivuabu balamate, ke ivuabu bakonka malu, bakukuila. Kabena bangula mifuba eyi bua kuyijika to. Neyishale anu panshi bu bufuke bua kufikisha buloba.[62]

³Maweja-Nangila wabukole buonsu udi wamba ne: Bena mu ditunga edi bikale bashale ne muoyi, miaba yonsu indi mbatangalaja, nebajinge kufua pa mutu pa kushala ne muoyi.

⁴Uye kubambila ne: Maweja-Nangila udi ukonka ne: Padi muntu udishinda, katu ujuka anyi? Padi muntu mupambuke mu njila, kena upingana kabidi mu njila muimpe anyi?

⁵Kadi, bena mu Yerushalayime badi bapambuke mu njila, kabena bapingana mu njila bua tshinyi? Badi anu batungunuka ne kutendelela mvidie ya tshianana? Kabena basue kupingana kundi.

⁶Meme ndi muteleje bionsu bidibu bamba, kabena bamba malu mimpe to. Kakuena muntu udi unyingalala bua bubi buende, nansha udikonka ne: “Tshindi muenze ntshinyi?” Muntu yonsu udi wenda mu njila udiye musue,[63] bu mudi nyama wa kabalu mumane kufika munda utomboka mu mvita.

⁷Nyunyi wa kasonga nyunyi udi mumanye tshikondu tshidiye umuangala. Nyunyi wa nkutshi, kandindi, ne nyunyi wa mudinga, idi anu mimanye diba dia kupingana. Kadi, bantu banyi bena Izrayele, kabena bamanye mikenji yanyi meme Maweja-Nangila.

⁸Nudi nudiamba ne: “Tudi bena meji, bualu tuetu ke badi ne mikenji ya Maweja-Nangila.” Kadi nudi nudisua nanku bua tshinyi? Kanuena bamanye ne: bantu badi batentula mikenji mbena dishima, badi bandamuna miaku idi momu anyi?

⁹Bena meji nebafue bundu, nebapampakane padibu babakuata, baya nabu mu bupika. Bu mudibu kabayi bitabe miaku ya Maweja-Nangila. Meji abu neabambuluishe ku tshinyi?

¹⁰Maweja-Nangila udi wamba[64] ne: Bakaji babu, nembafile kudi bakuabu. Madimi abu, nengafile kudi badimi bakuabu. Bualu bantu bonsu, bana ne bantu bakole, badi amu ne lukuka lua biuma. Muambi ne mutuangaji, bonsu badi anu badingangana.

¹¹Dikenga dia bantu banyi bena Izrayele, kadiena ditonda bantu aba to. Badi bambila bena Izrayele ne: “Kakuena bualu to. Malu onsu adi mimpe”, eku malu onsu mamane kunyanguka.[65]

¹²Bantu aba, kabena banyingalala to, kabena ne bundu nansha bukese bua buenzavi buabu. Kabena bamanye mua kutonda bubi buabu. Nanku Maweja-Nangila udi wamba ne: nebabutuke pamue ne bena Izrayele bakuabu, nebadishinde panshi musangu umue, ne bonsu bandi nyoka.

¹³Maweja-Nangila udi wamba ne: pandi musue kupola tumuma tua mvinyo munkatshi mua bantu banyi, tshiena mpeta kamuma nansha kamue, tshiena mpeta tshimuma nansha tshimue tshia mutshi wa mfiku.[66] Mabeji a mutshi mene adi mafubidile. Nanku, ndi ndekela mitshi eyi, ishale ya bantu bonsu badi bapita mu njila.

¹⁴Tudi basombe muaba ewu bua tshinyi? Tudisangishayi lukasa, tuyayi mu bimenga bivuabu bakolesha ne bimana, tuyayi bua kuindilamu lufu. Eyowa, Maweja-Nangila Mvidi Mukulu wetu, mmumane kutufundila lufu, bua tuetu kunua mayi mabi adi ne lulengu, bualu tudi batombokele Maweja-Nangila.

¹⁵Tuvua batekemene ne: malu onsu neajike bimpe. Kadi kakuena bualu buimpe nansha bumue to. Tuvua batekemene ne: makenga etu neajike, kadi tudi tubutuka.

¹⁶Muluishi wenu mmumane kufika ku Dane.[67] Muadi wa tubalu tuende ukadi umvuika. Padi tubalu atu tukekemena, buloba bujima budi buzakala. Padi nyama ya tubalu ayi ifika, bionsu bidi bibutuka. Idi inyanga ditunga ne bintu bionsu bidimu, tshimenga ne bonsu badimu.

¹⁷Maweja-Nangila udi wamba ne: Ndi musue kunutumina nyoka ya lulengu. Kakuena mushindu wa nuenu kuibidilangana nayi, kuyitekesha. Neyinusume.

¹⁸Ndi ne kanyinganyinga kakole. Kakuena mushindu wa kujikija kanyinganyinga kanyi to.[68]

¹⁹Telejayi, bantu banyi bena Izrayele, badi badila muadi mu ditunga dionsu, bakeba udi mua kubambuluisha, bamba ne: “Maweja-Nangila kena kabidi mu Siyone anyi? Siyone kena kabidi ne mukalenga anyi?” Kadi bena Izrayele neatendelele mvidie ya bantu ba bisamba bikuabu, ya mitshi misonga, idi kayiyi mua kubambuluisha bua tshinyi? Bavua bamfikisha munda bua tshinyi?

²⁰Tshikondu tshia kunowa ntshimane kupita. Tshikondu tshia munya mukole ntshijike. Tutshidi anu bindila bua kutusungidilabu.

²¹Dikenga dia bantu banyi bena Izrayele, ndintonde bikole. Ndi mu madilu. Ndi mu dikenga.

²²Mu Ngilaade kamuena buanga, nansha munganga anyi? Mputa wa bantu banyi bena Izrayele, kena mua kuma bua tshinyi?

²³Eyowa, ndi njinga bua mutu wanyi wikale ne mayi tente, bua mesu anyi ikale ne binsonji bu mishimi ya mayi. Nanku matuku onsu butuku ne munya, mvua mua kudila bantu bafue ba mu tshisamba tshianyi.