Read Tshiluba Muadi 4 Bible Online

Muadi 4 - Tshiluba bible

Muadi 4

¹Tshiamu tshia mpawungi etshi tshivua tshimpe, tshiengelela bikole, muditshi tshibuitshidile nunku mmunyi? Mmunyi mudi mabue a tshijila matangalake ku mielelu yonsu ya njila?[25]

²Bana ba Siyone bavua ne mushinga mukole, bu wa tshiamu tshia mpawungi, mmunyi mudibu babatuila amu mushinga bu wa luesu lua dibumba?

³Nansha nyama ya mibuabua mene idi ne muoyi wa buledi, yamusha bana bayi mabele. Kadi tshisamba tshianyi tshidi bu mamu wa tshikisu, udi kayi utangila bana bende: bu mudi nyunyi munene wa mikolu mile wa mu tshipela.[26]

⁴Ludimi lua bana ba mu diboku, ludi lulamata mu tshilakalaka, bualu badi bafue ne nyota. Bana batekete badi balomba biakudia. Kakuena muntu udi ubapeshabi nansha.

⁵Bavua badia bimpe, bakadi bafua ne nzala mu misesu. Bavua badia bimpe, buukuta misangu yonsu, bakadi bangula bintu bia ku dyala.

⁶Bubi bua tshisamba tshianyi mbupite bua bena tshimenga tshia Sodome, tshivuabu babutule diakamue, kakuyi bantu basumpakane bua kutshisungidila.[27]

⁷Bana ba bamfumu bavua bakenka, bapite neje, bavua bapite mabele ku butoke. Mibidi yabu ivua mimpe, mikunzubile mipite mabue a koraye. Mijilu[28] ya mu mibidi yabu ivua mifikuluke, bu dibue dia safire dia mushinga mukole.

⁸Mpindiewu bakadi bafuke fitutuu bu makala. Kabatshiena mua kubamanya padibu bapita mu njila. Badi banyane bikole, buume bu mitshi.

⁹Bivua bipite buimpe kufua ku muele wa mvita, pa mutu pa kufua ku nzala, pa mutu pa kulewuka ku tshiyole.

¹⁰Bua tshipupu tshivua tshikuate bena tshisamba tshianyi, bamamu bavua bananga bana babu, bakadi badilambilabu bua kubadia.[29]

¹¹Tshiji tshia Maweja-Nangila ntshijike. Mvidi Mukulu mmutshileje tshionsu. mMuele kapia mu Siyone, kadi kuosha bitaku biende.

¹²Nansha bakalenga ba pa buloba, nansha muntu mukuabu nganyi ne nganyi, kavua mua kuitaba ne: dituku dikuabu muluishi udi mua kubuelela ku biibi bia Yerushalayime nansha.

¹³Tshipupu etshi ntshienzeke bua bilema bia bambi, ne bua mibi ya batuangaji. Bavua bashipe bantu bakane munkatshi mua tshimenga.

¹⁴Badi benda babubuta mu njila bu mpofu, mibidi minyanguke ne mashi. Mbakandike bantu bua kulenga nansha ku bilamba biabu.[30]

¹⁵Muaba onsu udibu bafika badi babela bibingu ne: “Umukayi, nuenu nudi bapie mikiya! Kanusemenyi pabuipi netu to.[31]” Padibu banyema kabena bamanye kudibu baya nansha. Bena bisamba bikuabu badi bababenga, bamba ne: “To, kabasombi muetu munu kabidi nansha!”

¹⁶Maweja-Nangila nkayende ke uvua mubamuangalaje. Kena musue kubamona kabidi. Kabavua banemeka batuangaji, nansha bantu bakulakaje.

¹⁷Tuvua tukengakana ne mesu, tukeba diambuluisha. Kadi, tuetu nansha kudipeta. Tuetu kuindila ne muoyi mujima tshisamba tshivua mua kutusungidila.[32] Kadi nanshatshi kufika.

¹⁸Badi amu batutentekela, katuyi ne mushindu wa kuya ku yetu miaba. Diba dietu ndikumbane. Nshikidilu wetu udi pabuipi. Tukadi tufua!

¹⁹Batukengeshi betu badi ne lubilu lupite lua nyunyi wa tshiminyi udi ubuka mulu. Badi batuipata pa mikuna, batualamina miaba idi kayiyi bantu.

²⁰Muntu utuvua batekemene, mukalenga uvua Maweja-Nangila mumane kujidila, nyeye utuvua tuamba ne: “Mu bukalenga buende netuikale ne muaba munkatshi mua bisamba bikuabu”, monayi, nyeye ewu bamukuate mu dijimba dia muluishi![33]

²¹Nusanke, nutshionkomoke nuenu bena Edome, nuenu badi basomba mu ditunga dia Use! Kadi dikopu dia tshiji nedifike kunudi nuenu kabidi![34] Nenudinue! Nedinukuate! Nenusombe butaka!

²²Nuenu bena Siyone, tshibawu tshienu tshionsu ntshijike. Kabena baya nenu kabidi mu ditunga dia bende nansha. Kadi nuenu, bena Edome, Maweja-Nangila neanunyoke bua bilema bienu, neasokolole malu enu mabi.