Read Tshiluba Mukanda mutuma wa Yirmeya 1 Bible Online

Mukanda mutuma wa Yirmeya 1 - Tshiluba bible

Mukanda mutuma wa Yirmeya 1

¹Nuenu bena Yuda, nuvua batombokele Mvidi Mukulu. Ke padibu baye nenu ku Babilone mu bupika kudi Nebukadnesare, mukalenga wa bena Babilone.

²Panudi nufika mu ditunga edi, nenushalemu bidimu bivule too ne ku ndelanganyi yenu muanda mutekete.[2] “Kadi pashishe, meme Mvidi Mukulu nennupatule mu ditunga adi katakata, bua nupingane kuenu amu bimpe.”

³Mu Babilone mudi nwidie ya mitshi milamika mpawungi nansha tshiamu tshitoke tshia mushinga mukole. Badi bayambula pa makaya matuku adibu batendelela. Mvidie ayi, idi ikuatshisha bantu benyi bowa.[3]

⁴Nenku dimukayi, bua kanuvu kufuanangana ne bantu benyi aba. Nudimuke, kanuanyishi dilongesha diabu.

⁵Panudi numona bantu bavule bayinyungulukila, bayinemekela, nuenu nuamba amu ne: “Maweja-Nangila amu wewe nkayebe ke utudi mua kukukuila.”

⁶“Bualu wewe Maweja-Nangila udi muambe ne: mutumibue wanyi udi unulombola ne udi unulama.”

⁷Bualu muntu udi usonga mpingu ke udi muenze ludimi lua nwidie eyi. Yeye ke udi muyilamike mpawungi ne tshiamu tshitoke tshia mushinga mukole, nwidie eyi idi amu bimfuanyi patupu, kayena ne bukole budi mua kuakula nabu to.

⁸Bantu aba badi balengeja nwidie yabu ne tshikata tshia mpawungi,

⁹amu bu mudibu benzela bansongakaji badi banange kudilengeja. Batuangaji babu, imue misangu badi biba mpawungi ne tshiamu tshitoke tshia mushinga mukole bia nwidie eyi, baya nabi bua yabu midimu.

¹⁰Bamue badi baya nabi bua konda bakaji bena tshiendenda.[4] Mvidie ya mitshi eyi, mbayilamike tshiamu tshitoke tshia mushinga mukole nansha mpawungi, badi bayivuadika bilamba bu mudibu bavuadika bantu.

¹¹Kadi nwidie kayena ne bukole bua kumusha dimoma nansha misanda.[5] Padibu bamane kuyivuadika kabidi bilamba bia mushinga mukole,

¹²muntu udi ne bua kukupula lupuishi lua mu nzubu wa kutendelela, ludi lulamata mu mpala yayi.

¹³Nenku nwidie eyi idi ne dikombu dia bumfumu mu bianza, bu mudi muntu udi uludika tshitupa tshia buloba, kadi kayena mua kushipesha muntu udi uyipenda.

¹⁴Imue idi ne muele wa nwita mu tshianza ne tshisola. Kadi kayena ne bukole bua kuluangana nwita ne baluishi, nansha bivi. Ebi ke bidi mua kunujadikila ne: bintu ebi ki mmvidie ya bushuwa to. Nenku kanuena mua kubinemekela nansha.

¹⁵Bu mudi dilongu dimana kunyanguka kabayi mua kukuata nadi mudimu,

¹⁶ke mudi nwidie yabu ayi, padibu bayiteka mu nzubu ya kutendelela nwidie, mpuishi ya ku makasa a bantu badi babuelamu, idi iyikuata ku mesu.

¹⁷Padi muntu utombokela mukalenga, badi bamuinjidila mu nzubu, bamufundila tshibawu tshia lufu. Ke mudi batuangaji kabidi benza, badi bapangisha bivi bualu badi benza biibi bia nzubu wa nwidie bikole, bakanga bikuvu, bapayika milonda.

¹⁸Batuangaji badi batemeshila nwidie miendu, idibu kabayi batemesha mu nzubu yabu bobu bine. Kadi nwidie kayena mua kumona butoke bua muendu nansha umue.

¹⁹Mvidie idi ifuanangane ne dimue dia ku makunji adi mu nzubu wa nwidie. Tshilejilu: musuasua mumana kudiila mundamunda, amu bu mudiwu udia kabidi bilamba biabu, kadi nwidie eyi kayena mua kumvua tshintu.

²⁰Mpala ya nwidie eyi mmifike fitutuu ne muinshi udi ufuima mu nzubu wa nwidie.

²¹Tupulukusu, tundindi ne nyunyi mikuabu, bidi bikila pa nwidie eyi, nansha pa mitu yayi, kabidi too ne tumbishi.

²²Ku bionsu ebi nujadike ne: bintu ebi ki mmvidie to. Nuenu kanubitendeledi to.

²³Kadi mbalamike nwidie eyi mpawungi bua kuyilengeja, kayena mua kubalakana nkayayi nansha. Bobu bayela muiku bua kuyengulula, kayena mua kumvua to.

²⁴Bavua bayisumba ku mushinga mukole mupite, kadi kayena ne muoyi to.

²⁵Badi bayambula pa makaya kayena ne bukole budi mua kuenda nabu. Ke tshidi tshijadikila bantu bonsu ne: kayena ne bua nsongu to. Bia nanku ke bidi bifitisha badi bayinemeka bundu.

²⁶Padi nwidie umue wa ku mvidie eyi udishinda panshi, bantu badi ne bua kumujula. Padibu bamuimanyika, kena ne bukole bua kudinyungisha to. Yeye muimane, kena mua kubanduluka to. Mudi bantu balambula bafue bintu ke mudibi momumue ne bua nwidie eyi.[6]

²⁷Nyama idibu balambula nwidie ayi, batuangaji badi bayipanununa bua bapete makuta. Bakaji babu badi bateka imue ya ku minyinyi ya nyama ayi mu lubandi, pamutu pa kuyipesha bapela ne balema.

²⁸Nansha bakaji badi ne mikiya, patshidibu ku tshijila tshia bakaji, patshidibu batshilelelaku, badi balenga nyama ya milambu.[7] Bilejilu bionsu ebi bidi mua kunuleja patoke ne: bintu ebi, ki mmvidie to. Nanku kanuena mua kubinemekela nansha.

²⁹Mmunyi mudibu mua kuyibikila ne: “mvidie,” padi nwidie eyi milamika mpawungi ne tshiamu tshitoke tshia mushinga mukole, amu bakaji bayikuatshila mudimu wa tshijila.[8]

³⁰Mu nzubu ya nwidie eyi, batuangaji badi basomba panshi, bilamba bipandike, badi babeya nsuki ne miedi, bakungula mu mutu.[9]

³¹Badi bela mbila, bela bibingu kumpala kua nwidie yabu bu bantu badi badila mu madilu.

³²Batuangaji badi bavula nwidie eyi bilamba, bua kubivuadika bana babu ne bakaji babu.

³³Nansha bantu benzela nwidie eyi bimpe, nansha bayenzela bibi, nwidie eyi kayena mua kubambuluisha payi to.[10]

³⁴Kabidi kayena mua kupetesha muntu bubanji bua kunemaye to. Pikala muntu kayi mukumbaje dilaya divuaye muyilaye, kayena mua kumuasa tshilumbu nansha.

³⁵Kayena mua kusungidila muntu ku lufu. Kayena mua kumbusha muntu mukengi mu bianza bia tshilobu nansha kakese.

³⁶Kayena ne bukole budi mua kufikisha mpofu ku ditabala. Kayena mua kupatula muntu mu dikenga.

³⁷Kayena mua kuambuluisha mukaji mukamba. Kayena mua kuambuluisha nansha muana nshiya.[11]

³⁸Bitupa bia mutshi ebi, bilamika mpawungi ne tshiamu tshitoke tshia mushinga mukole, kabiena ne mushinga mupite wa mabue avuabu balamuna mu mukuna. Bantu badi bayikuatshila mudimu, bundu bubakuate.

³⁹Kadi mutudi mua kuyipa lumu, nansha kuyinyika ne: nwidie, mbishi?

⁴⁰Batuangaji ba bena Babilone, badi bayipepeja. Padibu bamona kamama, badi batuala wabu nwidie wa Bele, bamulomba bua akuishe kamama. Badi benzela nwidie nanku, amu bu udi umvua bidibu bamba.[12]

⁴¹Kadi bidi Mbakolela ebi, kabiena mua kubitabijija bua kubenga nwidie eyi, mbatatakane be.[13]

⁴²Bakaji badi badisuika mionji mu tshimonu, basomba mu musesu, bosha musenga wa kamonya.[14]

⁴³Kadi padi muntu uvua upita wambisha umue wa ku bakaji abu, umubuelela mu nzubu, mukaji awa udi useka udibu kabayi basulule muonji kudi mulume, wamba kabidi ne: nwidie kavua mumusue to.

⁴⁴Bionsu bidi bitangila nwidie eyi bidi amu bia dishima. Nenku mutudi mua kubipa lumu nansha kubinyika ne: mmvidie mmunyi?

⁴⁵Basongi ba mpingu ne bansenda ba bilengejilu bia biamu, ke bavua benza nwidie eyi. Nanku idi amu mushindu uvua bayenji basue, idi amu bintu.

⁴⁶Badi bayenza mene kabena mua kushala ne muoyi matuku mulongulongu kupita bakuabu nansha.

⁴⁷Kadi mudi bintu bidibu benza mua kuikala nwidie mbishi? Nenku bantu aba badi bashila ndelanganyi yabu amu bintu bia dishima, bidi mua kubafuisha bundu.

⁴⁸Padi nwita ne tshipupu bikuata nwidie eyi, batuangaji badi bebejangana, bakeba muaba udibu mua kusokoma ne mpingu eyi.

⁴⁹Kadi bintu ebi kabiena ne bukole budi mua kupandisha muntu mu nwita, nansha mu dikenga. Mudibu kabayi mua kuamba ne: kabiena nwidie mbishi?

⁵⁰Bua nanku tudi tujadika ne: bitupa bia mutshi ebi, bidibu balamika mpawungi nansha tshiamu tshitoke tshia mushinga mukole, mbia dishima. Bena matunga onsu ne bakalenga babu badi ne bua kujadika ne: bintu ebi ki mmvidie to, kadi mbintu bienza kudi bantu. Kakuena mudimu wa Mvidi Mukulu munda muabi to.

⁵¹Bua nanku, bantu kabena mua kuitaba ne: nwidie to. Muntu udi, kuanyisha ne: mmvidie nnganyi?

⁵²Mvidie eyi kayena ne bukole bua mua kubanjija muntu mu bukalenga bua ditunga. Kayena mua kulokeshila bantu mvula.[15]

⁵³Kayena ne bukole bua kukosa nsambu. Kayena mua kuambuluisha muntu udibu bapisha kapayi bualu;[16] mbintu bia patupu.

⁵⁴Idi bu nyunyi ya bikololu bidi bilembelela mulu. Padi kapia kakuata ku nzubu ya nwidie eyi, mitshi milamika mpawungi ne tshiamu tshitoke tshia mushinga mukole, batuangaji badi banyema lubilu. Kadi nwidie mene idi ipia yonsu ishila bu mitshi mu mbabula.

⁵⁵Padi mukalenga ne bena nwita bende bayiluisha, nwidie eyi kayena mua kutua nkanana kumpala kuabu to.

⁵⁶Kadi mutudi mua kuitaba bintu ebi ne nwidie, nansha kubipa lumu mbishi? Mvidie ya mitshi milamika tshiamu tshitoke tshia mushinga mukole ne mpawungi, kayena mua kunyema bivi ne bena mutshima to.

⁵⁷Padi bantu aba bayilamuna mpawungi ne tshiamu tshitoke tshia mushinga mukole, bayumbusha, baya ne bilamba bivuabu bayibuikila, nwidie eyi kayena ne mushindu wa kutua nkanana to.

⁵⁸Mukalenga udi umueneka ne bukitu mu mvita, nansha luesu ludi biambuluisha mfumu alu, nansha tshiibi tshidi tshisokoka bidi mu nzubu, nansha dikunji dia mutshi didi mu nzubu wa bukalenga… bia nanku, mbipite nwidie ya dishima eyi.

⁵⁹Bualu, diba, ngondu ne mitotu bidi bikenka kulu, bidi bikuata wabi mudimu, bidi biambuluisha.

⁶⁰Muele wa mvula kabidi, padiwu upenya, udi umueneka ne udi mua kuenza bualu kampanda. Bidi nanku kabidi ne bua lupepela ludi lutuuta mu buloba bujima.

⁶¹Bidi momumue kabidi padi Mvidi Mukulu utumina mavuba diyi bua afile dileji pa buloba bujima, adi akumbaja mudimu udibu baafundile awu.

⁶²Kabidi nkuba, padi Mvidi Mukulu umutuma panshi bua kuosha, kubutula mikuna ne metu, udi wenza amu mudimu udibu bamufundila. Kadi nwidie yoyi kayena mifuanangane ne bintu ebi ku bulenga nansha ku bukole.

⁶³Katuena mua kubipesha lumu, nansha kuamba ne: ebi bidi nwidie to, bualu kabiena ne bukole budi mua kukosa nsambu pa yoyi, nansha kuenzela bantu malu mimpe.

⁶⁴Nanku kanuena mua kuyinemeka, bualu ki mmvidie to.

⁶⁵Kayena ne bukole budi mua kutshipa nabu bakalenga nansha kubeela lupemba.

⁶⁶Kayena ne bukole budi mua kuleja nabu matunga malu a dikema adi mu diulu. Kayena mua kukenka bu diba, nansha kuenza bu mudi ngondu wenza.

⁶⁷Nyama ya muitu idi miyipite, bualu idi inyema, ikeba kaba ka kusokoma, idi idipandisha.

⁶⁸Nanku katuena mua kuyitangila nansha kakese bu nwidie to. Katuena mua kuyinemeka to!

⁶⁹Mvidie yabu ya mitshi milamike mpawungi ne tshiamu tshitoke tshia mushinga mukole, idi amu bu tshintu tshia kutshingisha natshi nyunyi, tshidibu bateka mu budimi bua njilu, kadi katshiyi ne buditshi mua kuenza.[17]

⁷⁰Nansha kabidi, tufuanyikija nwidie yabu ayi ne mitshi ya meba idi mu lupangu. Nyunyi yonsu udi amu wikilaku. Idi kabidi bu tshitalu tshimansha mu miidima mu tshiina.

⁷¹Paudi utangila bilamba biayi bia mushinga mukole ne bilamba biayi bia buanda bua mitshi[18] binyanguke, bibola, udi ujadika ne: bintu ebi ki mmvidie to. Kumana kumana bintu ebi nebabidie kudi musuasua. Benaditunga nebafue bundu.

⁷²Muntu udi mulamate Mvidi Mukulu, kayi utendelela nwidie eyi, udi muimpe mupite nwidie ya mafi ku mushinga. Kabena mua kumutuisha bundu to.