Read Tshiluba Baruke 1 Bible Online

Baruke 1 - Tshiluba bible

Baruke 1

¹Mukanda ewu bavua baufundile mu Babilone kudi Baruke, muana wa Neriya, muikulu wa Maseya.[1] Maseya uvua wa ku ndelanganyi ya Sedekiya, Asadiyasene Ilkiya.

²Mukanda ewu udi uleja mufikilu wa bidimu bitanu, kutuadija dituku dia muanda mutekete dia ngondu muitanu,[2] divua bena Babilone bakuate Yerushalayime.

³Baruke uvua mubale mukanda ewu kumpala kua Yekonya, muana wa Yowakime, mukalenga wa bena Yuda.[3] Bantu bavule bavua bafika kabidi bua kumvua bivua munda mua mukanda awu.

⁴Bantu bonsu bavua mu Babilone, basombele ku mielelu ya musulu wa Sude[4] bavua bonsu muaba awu. Ke balombodi ba mu bukalenga, bana ba bakalenga, bamfumu ba meku ne bantu bashilangane.

⁵Bantu aba bavua badila muadi Maweja-Nangila mubatangile, bavua bajila biakudia, batendelela Maweja-Nangila.

⁶Pashishe bavua basangisha makuta, muntu yonsu ufila muende muvuaye namu.

⁷Bobu kuatumina mutuangaji Yowakime, muana wa Ilkiya, muikulu wa Shalume uvua mu Yerushalayime. Kuatuminabu kabidi batuangaji bakuabu, ne bantu bonsu pamue ne Yowakime mu Yerushalayime.

⁸Mu dituku dia dikumi dia ngondu wa Sivane,[5] Baruke uvua mumane kuangata binta bia mu nzubu wa Maweja-Nangila bivuabu bumushe mu muaba wa tshijila. Uvua musue kubipingaja mu ditunga dia Yuda. Ke binta bia tshiamu tshitoke tshia mushinga mukole bivua Sedekiya, muana wa Yoshuwa, mukalenga wa bena Yuda muenzeje.

⁹Uvua mubienzeje pavua Nebukadnesare, mukalenga wa bena Babilone mumane kukuata Yekonya ku Yerushalayime, pamue ne balombodi ba ditunga ne bena midimu ya bianza,[6] kabidi ne balombodi ba mu bukalenga ne bantu bakuabu ba mu ditunga, muye nabu ku Babilone.

¹⁰Nanku bantu ba mu Babilone kutuminabu bena mu Yerushalayime mukanda ne: “Tuvua banutumine makuta bua nusumbe musenga wa kamonya ne nyama ya mulambu wa kuosha, ne wa difuilangana luse. Nudi ne bua kulambula milambu eyi, pamue ne bia mu madimi amu pa tshilambuilu tshia Maweja-Nangila, Mvidi Mukulu wetu.

¹¹Nulombe bua Nebukadnesare, mukalenga wa bena Babilone, kabidi ne bua muanende Baltazare.[7] Nutendelele Mvidi Mukulu, bua bikale ne muoyi kashidi bu mudi diulu ne buloba bikaleku.

¹²Nuenze nanku bua Nebukadnesare, mukalenga wa bena Babilone pamue ne muanende Baltazare, batalame biakane. Tubakuatshile mudimu matuku mavule. Bamone mua kumfuila luse.[8]

¹³Nutendelele kabidi Maweja-Nangila Mvidi Mukulu wetu, nutulombele, bualu tudi bamuenzele bibi too ne lelu. Ke padi tshiji tshiende katshiyi tshitushila muaba.

¹⁴Nubale mukanda utudi tunutumina ewu mu nzubu wa Maweja-Nangila, bantu bonsu bateleja, mu tshibilu tshia Tuzubu tua bisasa.[9]”

¹⁵Telejayi munudi mua kutendelela: “Maweja-Nangila, kakuena bualu butudi mua kukudiwula nansha. Kadi, tuetu tudi ne bundu too ne lelu. Eyowa, mbutukuate tuetu badi basombe mu ditunga dia Yuda ne dia Yerushalayime.

¹⁶Mbukuate kabidi bakalenga betu, ne balombodi betu ba matunga ne batuangaji betu, pamue ne bambi betu pashishe ne bankambua betu.

¹⁷Tudi bakuenzele bibi Maweja-Nangila.

¹⁸Tuvua bakuele nyima, katuvua bateleje diyi diebe wewe Maweja-Nangila Mvidi Mukulu wetu. Pauvua wamba bua tuetu kulonda mikenji iuvua mumfundile.

¹⁹Katshia upatuisha bankambua betu mu Ejipitu too ne lelu, tudi amu bakuele nyima, Maweja-Nangila Mvidi Mukulu wetu, tudi amu tupetula mua kuteleja biudi utuambila.[10]

²⁰Ke mutudi mmona too ne lelu, makenga amu matukuata, pamue ne mitshipu ivua muntu webe Moshe mumane kutudimuja, ku dituku diuvua mupatuishe bankambua betu mu Ejipitu bua wewe kubapesha ditunga didi ne biakudia bivule.[11]

²¹Wewe kututumina bambi. Kadi katuvua bateleje bivuabu bandongesha mu dina diebe.

²²Kadi muntu yonsu wa kutudi uvua wenza amu malu mabi avua munda muende, uvua ukuatshila nwidie mikuabu midimu, wenza bidi kabiyi bilengelela Maweja-Nangila Mvidi Mukulu wetu.[12]