Read Tshiluba Baruke 2 Bible Online

Baruke 2 - Tshiluba bible

Baruke 2

¹“Nanku, Maweja-Nangila, udi mukumbaje muuvua musue kutunyoka tuetu, balombodi betu, bavua bakosa nsambu ya bena Izrayele, bakalenga betu, balombodi betu ba matunga, bena Izrayele kabidi ne bena Yuda.

²Pa buloba kabavua banji kupeta dikenga muaba mukuabu bu diuvua mukengeshe nadi Yerushalayime. Bavua bafunda bua dikenga edi mu Mikenji ya Moshe.

³Ke patudi bafike, bua muntu kudiaye muanende wa balume, mukuabu kudiaye muanende wa bakaji.[13]

⁴Pashishe wewe Maweja-Nangila uvua mubafile mu bianza bia makalenga onsu adi matunyungulukila, bua bantu babapende, kabidi bahele bibingu kudi bena mutumba bonsu bauvua mubatangalaje.

⁵Nenku, pa mutu pa tuetu kutshimuna baluishi betu, bobu bavua batupita bukole, bualu tuvua bakuenzele wewe Maweja-Nangila Mvidi Mukulu wetu bibi, katuvua balonde tshiuvua mutuambile nansha.

⁶“Maweja-Nangila Mvidi Mukulu wetu, katuena mua kukudiwula. Kadi tuetu ne bankambua betu, tudi ne bundu too ne lelu.

⁷Maweja-Nangila, makenga onsu auvua mututumine mmamane kutukuata.

⁸Kadi katuena balombe kuudi Maweja-Nangila bua umushe yonsu wa kutudi mu njila yende mibi.

⁹Nenku Maweja-Nangila, uvua amu mutumina makenga aa bua atukuate. Bionsu biudi wewe Maweja-Nangila ututumina diyi bua kuenza bidi anu pa bualu.

¹⁰Kadi katuvua bakuteleje pauvua utuambila bua tuetu kulonda mikenji iuvua mutuelele.

¹¹“Maweja-Nangila Mvidi Mukulu wa Izrayele, ku bukole buebe ne bukitu, wewe kupatula bantu bebe mu ditunga dia Ejipitu, wewe kuenza bishima bia mishindu yonsu ne malu a dikema. Wewe kudileja muebe muudi too ne mutudi tukumona ne lelu. Mpindiewu,

¹²tuetu tudi bavuluke mutuvua benze bibi, bakutombokela. Tuvua bele mikenji yebe yonsu nyima.

¹³Kadi kutufikidi munda nansha, bualu tudi amu bantu bakese bashale mu matunga a bende audi mututangalajile.

¹⁴Maweja-Nangila muteleje patudi tukutendelela, nkulomba, mukebele luse, kudi bantu badi batutuuta mu bupika.

¹⁵Nanku, bantu ba mu buloba bujima nebamanye ne: wewe udi Maweja-Nangila Mvidi Mukulu wetu. Tuetu, tshisamba tshia Izrayele, amu wewe ke udi mutusungule munkatshi mua bisamba bikuabu.[14]

¹⁶Maweja-Nangila, mulu muudi mu nzubu webe wa tshijila, ututangile, utuvuluke, muteleje, utumvuile luse,

¹⁷utabale, utumone, tudi bamanye ne: bantu badi mu kandondu ka bafue, badi bamane kukula muoyi[15] kabena mua kukutumbisha, kabena mua kumanyisha bantu muudi muakane.

¹⁸Kadi muntu udi uvua kukutumbisha, umanyisha bantu muudi muakane, ke muntu udi ukenga bikole, muikale ne nzala, udi amu mutekete mubidi, kabidi mukobama, katshiyi ujadika bidiye umona.

¹⁹“Maweja-Nangila Mvidi Mukulu wetu, nenku patudi tuvua kukusengelela bua utufuile luse, katuena batekemene bua midimu mimpe ivua bankambua betu ne bakalenga betu bakuate nansha.

²⁰Bualu uvua mutufikile munda bikole, anu bu muuvua mumane kumanyisha bambi bebe, bena mudimu bebe ne:

²¹Maweja-Nangila udi wamba ne: ‘Dipuekeshayi, nukuatshile mukalenga wa bena Babilone mudimu. Nanku nenushale mu ditunga dimvua mupeshe bankambua benu.[16]

²²Kadi bu mundi nnuambila emu, nuenu babenge mua kutumikila diyi dia mukalenga wa bena Babilone,

²³nenkandike mu bimenga bia Yuda ne bia Yerushalayime, mitoyi ya tshianga mu bibilu, ne tshianga tshia mu disanka dionsu ne misambu ya batshidi babuelelaku mu dibaka. Ditunga dijima nedishale amu tshipela, kadiyi ne bantu.[17]’

²⁴“Kadi katuena bitabe diyi diebe. Katuena batumikile diyi dia mukalenga wa bena Babilone. Uvua mukumbaje miaku iuvua muambe bua kututumina makenga auvua mumane kuambila bambi bebe bena mudimu ne: mifuba ya bakalenga betu ne ya bankambua betu, nebayijule mu nkita idibu bayijike.

²⁵Bankambua betu ne bakalenga betu mbafuile amu mu makenga mabi a nenku: ku tshiyole tshia nzala, ku muele wa mvita ne ku bupika. Bitalu biabu mbijula mu nkita, bianyika pa munya ne mashika a butuku.[18]

²⁶Kadi bua nzubu udibu bantendelela, bantu mbamone muudi mumunyange bua bubi buvua bena Izrayele ne bena Yuda benze.

²⁷“Kadi, Maweja-Nangila Mvidi Mukulu wetu, uvua mutuenzele bionsu abi ne lutulu, mutuleje kabidi luse luebe lunene.

²⁸Bilondeshile biuvua mumane kumanyisha muntu webe, muena mudimu webe Moshe, tshikondu tshiuvua mumutumine diyi bua kufundaye mikenji yebe, bena Izrayele bonsu batangila. Uvua muambe ne:

²⁹‘Panudi kanuyi nuteleja bindi ngamba, nansha nuenu nutanta bu munudi mpindiewu, nenushale anu bakesemu matunga andi nnutangalaja.

³⁰Ndi mumanye ne: kanuakungitaba to, bualu nudi bantu badi bantombokela. Kadi nuenu bamane kubuela mu bupika, nenushishe kuela meji makane.

³¹Nanku nenuvuluke ne: Meme ke Maweja-Nangila Mvidi Mukulu wenu. Pashishe nennupe muoyi ne matshi bidi biumvua malu bialama.

³²Nenutumbishe mu ditunga dia bupika didibu baya nenu. Nenuvulukemu dina dianyi.

³³Nenumone kudi njila uvua bankambua benu balonde mubafikishe patuabu bantombokela meme Maweja-Nangila. Nenku, nenubenge buntomboji buenu kabidi ne buenzayi buenu.

³⁴“Nanku nennupingaje mu ditunga dimvua mulaye bankambua benu aba: Abrahame, Izake ne Yakobe. Ditunga edi nedishale dienu. Pa mutu pa meme kunubutula, nennutantshishe bikole.

³⁵Nentue nenu ndondu kashidi, bua meme kuikala Mvidi Mukulu wenu ne nuenu kuikala bantu banyi. Tshiena mua kunupatula kabidi nuenu bantu banyi bena Izrayele mu ditunga dindi mumane kunupa nansha.[19]’