Read Tshiluba Baruke 3 Bible Online

Baruke 3 - Tshiluba bible

Baruke 3

¹“Maweja-Nangila muena bukole buonsu, Mvidi Mukulu wa Izrayele, tudi mu dikenga, kabidi tudi batekete mu maboku, tudi tukubikila bua utuambuluishe.

²Maweja-Nangila ututeleje, umvue luse bualu tudi bakuenzele bibi.

³Wewe udiku kashidi. Kadi tuetu tudi mu njila wa kujimina kashidi kashidi.

⁴Nenku wewe, Maweja-Nangila muena bukole buonsu, Mvidi Mukulu wa Izrayele, uteleje dilomba dietu, tukadi bu bantu bafue. Tudi ndelanganyi ya bantu bavua bakutombokela, bavua kabayi bateleja diyi dia Maweja-Nangila Mvidi Mukulu wetu. Ke padi makenga matukuate.

⁵Kuena mua kuvuluka buenzayi bua bankambua betu. Kadi lelu, uvuluke amu bukole buebe ne lumu luebe,

⁶bualu wewe udi Maweja-Nangila Mvidi Mukulu wetu! Tudi tukutumbisha!

⁷Ke patudi bitabe bua kunemeka bukalenga buebe ne kukutendelela. Tuetu bikale mu bupika, tudi tukutumbisha, bualu tudi bele nyima ku malu mabi avua bankambua betu bakuenzela.

⁸Tuetu tudi lelu kule mu ditunga dia bende muudi mututangalaje. Bantu badi batupenda, batuela milawu. Kadi tudimu bua tudilengeje, tulekela buenzayi buonsu bua bankambua betu bavua bakubenga wewe, Maweja-Nangila Mvidi Mukulu wetu.”

⁹Nuenu bena Izrayele, telejayi mibelu idi mua kunupetesha muoyi. Teyayi matshi bua mibelu eyi, ibuele munda muenu, nupete meji.

¹⁰Nuenu bena Izrayele, munudi mu ditunga dia baluishi mbishi? Munudi nukulakajila mu buloba bua bende mbishi?

¹¹Nuenu bena Izrayele, munudi nulenga bantu bafue, nupia mikiya, kabidi mudi bantu banubadila mu mulongu wa badi bamana kubuela mu kandondu ka bafue mbishi?[20]

¹²Bualu nudi bamane kupetula mpokolu wa meji.

¹³Bu nuenu balonde njila wa Mvidi Mukulu, nuvua mua kusomba ne ditalala kashidi.

¹⁴Kebayi mua kumanya muaba unudi mua kupetela meji, bukole ne lungenyi. Nanku nenumanye kabidi diakamue muaba unudi mua kupetela muoyi, bua nulale panu, nuboboke, nuikale ne ditalala,[21] mesu enu aleja disanka.

¹⁵Muntu ukadi musangane muaba udi Meji masombe nnganyi? Ukadi mubuele muaba udiwu masokome nnganyi?

¹⁶Mbamfumu ba matunga anyi? Mbantu badi bamuna nyama ya difu anyi?

¹⁷Nansha badi mua kuikala bantu badi banaya ne nyunyi ya mulu anyi? Badi mua kuikala nansha bantu badi bakungija tshiamu tshitoke tshia mushinga mukole, ne mpawungi, bidi bantu batekemena, anyi?

¹⁸Badi mua kuikala bena midimu ya bianza, badi batula bintu ne tshiamu tshitoke tshia mushinga mukole, bakemesha bantu bua mudimu wabu anyi?

¹⁹Bonsu abu mbamane kubutuka, mbapueke mu kandondu ka bafue. Bantu bakuabu mbamana kubapingana.

²⁰Bavua balela ne bana, babu bana abu badi panu, kadi kabena bamanye njila udi ufika ku Meji nansha.

²¹Kabena bajingulula njila udibu mua kuapetela. Kabena banji kuapeta. Bana babu menemene bavuabu balele bavua bapambuke mu njila uvua batatuabu balonda.

²²Bantu kabavua bumvua baatela, mu ditunga dia Kenaane. Bantu kabavua baamona mu tshimenga tshia Temane.[22]

²³Kabidi nansha ndelanganyi ya Agare, ivua yakeba panu, bangenda mushinga ba bena Madiyane ne bena Temane,[23] kabidi ne beedi ba nsumuinu ne bena Meji mapiluke, kabena bamanye njila udi ufikisha ku Meji to. Kabena mua kudimukila nansha njila idi ifika ne ku meji nansha.

²⁴Eyi! Bena Izrayele, nudi nzubu udi Mvidi Mukulu munene wa bukole buonsu musombe. Buloba buende mbualabale!

²⁵Buloba buende kabuena ne nshikidilu. Budi butumbuke, bantu kabena mua kubupima.

²⁶Ku buloba aku, ke kudi kufumina bantu ba mfiondu ba ku tshibangidilu. Bavua bantu bale, bamanye mua kuluangana myita.[24]

²⁷Kadi Mvidi Mukulu kavua mubasungule, nansha mubaleje njila udi ufika kudi Meji to.

²⁸Kadi bavua babutuka, bualu kabavua bamanye mua kusunguluja malu to. Bavua badibutuisha bua butatakane buabu.

²⁹Muntu uvua mubande mulu bua kuangata Meji, kupueka nawu panshi nnganyi?

³⁰Muntu uvua musabuke mayi manene, kuya dia muamua, pashishe kuasumba ku mushinga wa mpawungi wa mushinga mukole, nnganyi?

³¹Kakuena muntu nansha umue udi mumanye njila wa kupetela Meji. Kakuena muntu nansha umue udi mua kubiika mushindu udibu mua kuapeta![25]

³²Kadi Mvidi Mukulu mumanyi wa bionsu ke udi mumanye Meji. Amu bua lungenyi luende, yeye kutandula muaba udi Meji.[26] Kulongololaye buloba kashidi. Pashishe kutekayemu nyama.

³³Mvidi Mukulu kutuma butoke, bobu kubanga luendu! Padiye ububikila, budi butumikila diyi diende, buzakala!

³⁴Mitotu idi ikenkela miaba idiyi ne disanka.

³⁵Padi Mvidi Mukulu uyibikila, idi itaba ne: “Tudipu!” Dibulunge dionsu didi diela nsese ne musangelu bua kusankisha udi mudifuke.[27]

³⁶Utua muyifuke awu, ke Mvidi Mukulu wetu! Kakuena mukuabu to, amu yeye!

³⁷Amu yeye ke udi mutandule njila onsu udi ufika ku Meji. Uvua mumuleje bena tshisamba tshia Yakobe, muntu wende, ne tshisamba tshia Izrayele, badiye munange.

³⁸Biangatshile ku tshikondu atshi, bantu kumona Meji pa buloba. Meji kusomba munkatshi mua bantu.[28]