Read Tshiluba Baruke 4 Bible Online

Baruke 4 - Tshiluba bible

Baruke 4

¹Meji ke mukenji wa Mvidi Mukulu, mukenji wende udi ushala kashidi. Badi baufunda mu mukanda wa mikenji yende. Muntu udi ulama mikenji udi upeta muoyi. Kadi udi uyipetula udi ufua.[29]

²Ndelanganyi ya Yakobe, pinganayi tshianyima! Kuatayi Meji. Endayi mu butoke budi bufumina kudi Meji.

³Kanuena mua kutumbisha bantu bakuabu, kanuena mua kupa bantu benyi lumu luenu.

⁴Tuetu bena Izrayele tudi bena diakalenga, bualu tudi bamanye bionsu bidi bilengelela Mvidi Mukulu!

⁵Wewe tshisamba tshianyi, kolesha muoyi. Wewe nkayebe udi ne dina dia Izrayele.

⁶Bavua banupana ku ba bende, kadi kanutua mua kubutuka nansha. Bualu nutua bafikishe Mvidi Mukulu munda, ke pavuaye munufile kudi baluishi benu.

⁷Nutua balambule nwidie ya dishima milambu, kadi kanutua bamulambule yeye to, nutua bakebe matandu kudi Mvidi Mukulu utua munufuke.[30]

⁸Nutua bapue Mvidi Mukulu wa tshiendelele muoyi! Yeye ke uvua munudishe! Nuenu kubungamija bikole mamuenu Yerushalayime, uvua munukoleshe.

⁹Pavuaye umona muvua Mvidi Mukulu munufikile munda, kuambaye ne: “Ntelejayi, nuenu bimenga bidi mutumba ne Siyone, Mvidi Mukulu muntumine dikenga dinene.[31]

¹⁰Ndi mumone, muvua Mvidi Mukulu wa tshiendelele mutuma bana banyi, ba balume ne ba bakaji mu bupika.

¹¹Ndi mukoleshe bana banyi ne disanka, kadi meme kubungama, kunyingalala bikole pavuabu baye nabu.

¹²Muntu nansha umue kena mua kusanka padiye umona, meme mushale mukamba, tshiyi ne bana banyi nansha umue. Nkadi mushale tshipela tshia munda mutupu, bua mibi ya bana banyi, bavua bumuke mu njila wa Mvidi Mukulu.

¹³Kabavua banyisha mikenji yende, kabavua bateleja mibelu yende kabidi, kabavua nansha balonda njila wa buakane uvua Mvidi Mukulu ubaleja.

¹⁴Nuenu bena mutumba ne Siyone! Luayi numone. Nuvulukayi muvua Mvidi Mukulu wa tshiendelele mutume bana banyi, ba balume ne ba bakaji mu bupika!

¹⁵Uvua mubatumine bantu ba kule bua babakengeshe, bantu badi kabayi luse, badi bakula muakulu wa benyi. Kabena banemeka bakulakaja, kabena bafuila bana luse.[32]

¹⁶Meme mukamba, bantu aba kuyabu ne bana banyi ba balume, bamvua munange, mu bupika, kunshiya nkayanyi tshiyi ne bana banyi ba bakaji.

¹⁷“Kadi bana banyi, mundi mua kunuambuluisha mbishi?

¹⁸Amu udi unutumina makenga awu ke udi mua kunupandisha mu bianza bia baluishi benu.

¹⁹Bana banyi, nuaya bimpe. Meme ndi nshala nkayanyi, tshiyi ne muana.

²⁰Ndi nkopola muntumpu umvua muvuale matuku atuvua ne disanka. Ndi mvuala kabidi tshilamba tshia madilu.[33] Ndi ngela amu kuela Mvidi Mukulu wa tshiendelele mbila matuku anyi onsu bua angambuluishe.

²¹Bana banyi, koleshayi muoyi! Elayi Mvidi Mukulu mbila. Neanupandishe ku tshinyangu tshia baluishi benu.

²²Bualu, meme ndi ntekemena kudi Mvidi Mukulu wa kashidi, yeye neanupandishe. Ndi muindile bua anusungidile. Mvidi Mukulu wa tshijila mmumpe disanka. Ndi mumanye ne: Musungidi wenu neanufuile luse mpindiewu.

²³Bualu mvua ne dikenga ne dibungama dituku divuabu baye nenu! Kadi Mvidi Mukulu neanupingaje kashidi kundi. Nanku nensanke ntua tshianga[34] kashidi.

²⁴Bakaji bena mutumba wanyi, mbamone muvuabu baye nenu mu bupika. Kadi nebamone mudi Mvidi Mukulu uvua mpindiewu kunupatulamu, ne butumbi buende ne bumfumu buende.

²⁵Bana banyi, umvuayi ne lutulu, dinyoka didi Mvidi Mukulu unutumina. Muluishi wenu udi unutatshisha, kadi nenumumone mudibu bamubutula mpindiewu nenumudiate pa dikoshi diende.[35]

²⁶Bana banyi banange, nuvua bapitshile mu njila ya mabue. Bavua banunyenga bu mudi bivi bakuata nyama, biiba.

²⁷Bana banyi, koleshayi muoyi, elayi Mvidi Mukulu mbila yenu, bualu Mvidi Mukulu uvua munufile ku bupika, neanuvuluke.

²⁸Nuvua bapangadike bua kuela Mvidi Mukulu nyima, mpindiewu, nukebe ne disuminyina dikole bua nupingane kudiye nudilengeje.

²⁹Bualu Mvidi Mukulu utua munutumine makenga aa, neanupandishe, kabidi neanusankishe kashidi.”

³⁰Yerushalayime, kolesha muoyi! Mvidi Mukulu uvua mukuangate ku mudimu wende,[36] neakusambe.

³¹Bantu bavua bakuenzela bibi, bavua basanka bonsu, pauvua mudishinde, mbena diakabi.

³²Diakabi ndia bimenga bitua bibueja bana bebe mu bupika! Diakabi nangananga ndia tshimenga tshivua tshikunyenga bana bebe ba balume.[37]

³³Bu muvuatshi tshisanka, pautua mudishinde, tshitue tshianga pauvua mu dikenga, nanku netshibutuke tshishale tshipela.

³⁴Tshidi tshimue tshia ku bimenga bidi ne bantu bavule. Nanku, ditambisha diatshi nedijike, dikamakama diatshi nedienze dikenga.

³⁵Bualu meme Mvidi Mukulu wa kashidi nendokeshemu kapia, kadi mua kutshibutula bua matuku mavule. Nenku, mikishi[38] mibi isombemu matuku mapite bungi kabidi.

³⁶Yerushalayime, tangila luseke ludi diba dipatukila. Mona disanka didi Mvidi Mukulu mukutuadile.

³⁷Tangila bana bebe bavuabu baye nabu ku bupika mudibu bapingana kuudi. Mvidi Mukulu wa tshijila mmuele diyi, badi basangila eku ne eku. Mpindiewu badi bapingana, benda batumbisha Mvidi Mukulu.[39]