Read Tshiluba Baruke 5 Bible Online

Baruke 5 - Tshiluba bible

Baruke 5

¹Yerushalayime, vula muntumpu uuvua mutuale diba dia dikenga, uvuale tshilamba tshia lumu tshidi Mvidi Mukulu mukupe bua kashidi.[40]

²Dibuikila tshinkutu tshia buakane. Ke lupandu ludi lufuma kudi Mvidi Mukulu. Butumbi bua Mvidi Mukulu wa tshiendelele, budi bu nsala wa ka lumbandi udi muasa ku mutu kuebe.[41]

³Bualu Mvidi Mukulu nealeje bantu bonsu pa buloba bujima lumu ludiye mukupe.

⁴Neakupe bua kashidi dina dia ne: “Tshimenga tshia bupole tshidi Mvidi Mukulu wambuluisha, kabidi tshimenga tshidi ne lumu, bualu bantu badimu badi balamata Mvidi Mukulu.[42]”

⁵Yerushalayime, juka, banda pa mukuna, ukenzakane, utangile kudi diba dipatukila, umone mudi Mvidi Mukulu wa tshijila usangisha bana bebe ku luseke ludi diba dibuelela too ne kudidi dipatukila. Bonsu badi basanka padi Mvidi Mukulu mubavuluke.

⁶Bavua bumuke kuebe benda ku makasa, benda babasakila kudi baluishi. Kadi Mvidi Mukulu wabapingaji kuudi, badi ne butumbi bu bua bakalenga badi mu nkuasa ya bamfumu.

⁷Bualu Mvidi Mukulu mmutume diyi bua mikuna yonsu ipuekele, kabidi ne tukuna tutumbuke, uvua muele diyi bua buwuje mpangu ne buloba, bua buloba buikale bulandakane,[43] bua Izrayele apingane kuende amu bimpe, wenda utumbisha Mvidi Mukulu.

⁸Mvidi Mukulu muntume diyi bua metu ne mitshi yonsu idi ne mupuya muimpe, bifile dileji kudi bena Izrayele.

⁹Bualu Mvidi Mukulu neapingaje Izrayele kuende, neamulombole ne butumbi buende, neapingane ne disanka, bualu Mvidi Mukulu mmumufuile luse mmumane kumupandisha.