Read Tshiluba Yezekiyele 11 Bible Online

Yezekiyele 11 - Tshiluba bible

Yezekiyele 11

¹Mueyelu wa Maweja-Nangila kungambula pa buloba, kuya kunteka ku tshiibi tshia luseke ludi diba dipatukila lua nzubu wa Mvidi Mukulu. Pabuipi ne tshibuelelu tshia nzubu wa Mvidi Mukulu, meme kumona bantu balume makumi abidi ne batanu. Ku bantu abu mvua mumanye balombodi babidi ba bantu: ke Yazaniya, muana wa Azure, ne Pelatiya, muana wa Benaya.

²Maweja-Nangila kungambila ne: — Yezekiyele,[52] mona bantu badi bela meji a kuenza malu mabi, bapesha kabidi bantu lungenyi lubi mu Yerushalayime.

³Bantu aba badi bamba ne: “Matuku makuabu kabakuasa kabidi nzubu munemu to! Tshimenga tshidi bu mudi luesu. Tuetu tudi munyinyi muteka munda mua luesu.[53]”

⁴Nanku, wewe muntu,[54] ufunde bantu aba ku tshilumbu, wenza mudimu webe wa buambi.

⁵Mueyelu wa Maweja-Nangila kuntulukila, ungambila mua kumanyisha bantu ne: — Telejayi bidi Maweja-Nangila wamba ne: Nuenu bena Izrayele, ndi mumanye tshinudi nuamba. Ndi mumanye meji adi anuvuila mu lungenyi.

⁶Nudi bashipe bantu ba bungi mu tshimenga emu. Mu njila yonsu mudi anu bitalu tente.

⁷Ke pandi meme Maweja-Nangila Mvidi Mukulu nnujadikila ne: tshimenga tshidi bu mudi luesu bushuwa. Kadi munyinyi udi munda mualu, ke bantu banudi bashipe mu tshimenga abu. Nanku nuenu, nennuipate mu tshimenga amu.

⁸Nudi nutshina mvita! Nanku meme Maweja-Nangila Mvidi Mukulu ndi nnujadikila ne: nennutumine mvita!

⁹Nennuipate mu tshimenga, nuuteke ku bumfumu bua bisamba bia bantu bakuabu. Ke mumvuavua kununyoka.

¹⁰Nansha munda mua ditunga dia bena Izrayele nennunyoke, nennushipe mu mvita, bua mimanye ne: meme ndi Maweja-Nangila.

¹¹Tshimenga etshi katshiakunulama munda muatshi bu mudi luesu lulama munyinyi to. Kadi nennunyokele nansha munda mua ditunga dia bena Izrayele.

¹²Diba adi, nenujadike ne: ndi Maweja-Nangila. Kanuvua balame meyi anyi, kanuvua bakumbaje mikenji yanyi, bualu nuvua balonde bibidilu bia bantu benyi badi banunyungulula.

¹³Pamvua ngambila bantu miaku ya Maweja-Nangila ayi, Pelatiya,[55] muana wa Benaya, kufua. Meme kutua mpala panshi, kuela mbila ne: — Eyi! Maweja-Nangila Mvidi Mukulu, neushipe bena Izrayele bonsu badi bashale anyi?

¹⁴Maweja-Nangila kungambila ne:

¹⁵— Yezekiyele, bantu bavua bashale mu Yerushalayime badi bambila bana benu bonsu, bena Izrayele nebe, bavuabu baye nabu mu bupika ne: “Nushale mu ditunga dia kule, mutantshi mule ne Maweja-Nangila. Bualu tuetu ke badiye mupeshe ditunga adi.”

¹⁶Nanku, ambile bana benu banudi nabu mu bupika malu andi meme Maweja-Nangila Mvidi Mukulu mbambila ne: “Mvua munutume ku matunga a kule, munkatshi mua bantu benyi. Kadi kuine aku, ndi amu munkatshi muenu, ndi bu muaba wa tshijila.[56]”

¹⁷Ubambile ne: meme Maweja-Nangila Mvidi Mukulu, ndi mbalaya ne: “Nennusangishile ku bisamba ne ku matunga kumvua munutume. Nennupingajile ditunga dia Izrayele.

¹⁸Panudi nufika mu ditunga amu, nennukandike bibidilu bibi bindi mbenga bia kutendelela mvidie.

¹⁹Nennupeshe bonsu muoyi wa mushindu umue. Nembueje munda muenu lungenyi lupialupia. Nengumushe muoyi unudi nawu mupape bu dibue. Nennupingajile muoyi wa kalolu.

²⁰Nanku nenukumbaje mikenji imvua munupeshe. Nenulonge meyi anyi, nuakumbaje. Nenuikale bantu banyi. Meme nengikale Mvidi Mukulu wenu.[57]

²¹Kadi badi batendelela mvidie, benza malu mabi andi mbenga, balonda mudi muoyi wabu mubi ubambila, nembanyoke bua bubi buabu. Ke mundi nnuambila nanku, meme Maweja-Nangila Mvidi Mukulu.”

²²Bakerubine kunyungisha mapuapua abu. Nkata kutuadija kunyunga musangu umue ne mapuapua. Butumbi bua Maweja-Nangila wa Izrayele buvua bubalakana pa bakerubine.

²³Pashishe butumbi bua Maweja-Nangila kubuka munkatshi mua tshimenga, kuya kuikila pa mukuna udi luseke ludi diba dipatukila lua Yerushalayime.

²⁴Meme kumvua Mueyelu wa Mvidi Mukulu ungambula pa buloba, uya kumpingaja ku Babilone mu bantu bavua mu bupika. Nanku, Maweja-Nangila kena mundeje kabidi malu makuabu to.

²⁵Meme kulondela bantu bavua mu bupika bionsu bivua Maweja-Nangila mundeje.