Read Tshiluba Yezekiyele 12 Bible Online

Yezekiyele 12 - Tshiluba bible

Yezekiyele 12

¹Maweja-Nangila kungambila ne:

²— Yezekiyele, udi musombe munkatshi mua bantomboji! Badi ne mesu, kadi kabena basue kumona. Badi ne matshi, kadi kabena basue kumvua, bualu badi bantu ba tshitunu.[58]

³Nanku, longolola bintu bua kuya nabi mu bupika. Ulongolole luendu luebe munda munya, bantu bonsu batangile. Umuke muaba uudi musombele, uye muaba mukuabu mu bupika. Umuke bantu bonsu batangile. Misangu mikuabu badi mua kudikonka, kuvuluka mudibu bena tshitunu.

⁴Munda munya, upatule bintu biebe kuebe, bobu batangile. Pashishe, dilolu uye bu mudi mupika umuka, bobu amu batangile.

⁵Utubule disosu ku tshimana tshia tshimenga, bobu amu batangile. Upatule bintu biebe mu disosu adi.

⁶Bantu bamone muudi ubiambula pa makaya, umuka nabi, ubuela mu midima. Udibuikile ku mesu bua kumonyi kuudi uya. Ndi nkutuma nanku bua umanyishe bena Izrayele malu onsu andi ne bua kubenzela.

⁷Meme kuenza bionsu bivua Maweja-Nangila mungambile. Munda munya, meme kupatuka ku nzubu kuanyi ne dibuki bu muntu udi uya mu bupika. Dilolu meme nkayanyi kutubula disosu ku tshimana tshia tshimenga. Bantu bavua bamone mumvua nya ne dibuki dianyi pa makaya, mbuela mu midima.

⁸Butshia dinda, Maweja-Nangila kungambila ne:

⁹— Yezekiyele, bantomboji ba bena Izrayele aba bavua mua kukukonka ne: tshiudi wenza ntshinyi?

¹⁰Ubandamune ne: “Maweja-Nangila Mvidi Mukulu udi unumanyisha ne: ndi nnuleja ebi, bua kubela mukalenga udi mu Yerushalayime, ne bena Izrayele bonsu badi basombamu.”

¹¹Ubambile ne: ndi muenze nenku bua kunuleja makenga anudi ne bua kupeta. Nebaye nenu mu bupika ku matunga a bende.

¹²Mukalenga udi unulombola neambuile bintu biende pa makaya, neumbuke mu tshimenga mu midima. Nebatubule tshimana bua kumonaye mua kupatuka. Neadibuikile mpala bua kamonyi mudiye uya.

¹³Kadi meme Maweja-Nangila ndi mmuteya bua bamukuate. Nemmutume mu ditunga dia bena Babilone, didiye kayi mua kumona. Kadi neafuilemu.[59]

¹⁴Bantu badiye nabu, bena mvita badi bamulame, ne bena tshiluilu tshiende bonsu, nembamuangalaje ku nseke yonsu inayi. Pashishe nembalondakaje ne muele wanyi.

¹⁵Pandi mumane kubamuangalaja mu bisamba ne mu matunga bia bende, nebamanye ne: meme ndi Maweja-Nangila.

¹⁶Kadi nempandishe bantu bakuabu ku mvita, ku tshiyole tshia nzala, ne ku disama dia tshiambu. Bobu nebalondele bena matunga adibu basombe mu bupika muvuabu benza malu mabi. Nanku bantu ba bisamba bia bende abu nebamanye kabidi ne: meme ndi Maweja-Nangila.

¹⁷Maweja-Nangila kuamba kabidi ne:

¹⁸— Yezekiyele, udie diampa diebe, uzakale; unue mayi, utshine, uzakale.

¹⁹Pashishe wambile bantu bonsu ne: “Maweja-Nangila Mvidi Mukulu udi unuambila ne: Bena mu Yerushalayime batua bashale mu buloba bua bena Izrayele nebadie, nebanue ne bowa, bazakala. Bushuwa ditunga diabu nedinyanguke, bualu bantu batua basombamu mbamane kudinyanga ne buenzavi buabu.

²⁰Mu bimenga nemushale mutupu, kamuyi muntu. Mpata neyishale tshipela. Nanku nenujadike ne: meme ndi-Maweja-Nangila.”

²¹Maweja-Nangila kungambila kabidi ne:

²²— Yezekiyele, mmunyi mudi bantu ba mu ditunga dia bena Izrayele bamba bambulula kasumuinu ka ne: “Matuku adi enda apita. Bidi Mvidi Mukulu mutulaye kabiena bienzeka!”

²³Wambile bena Izrayele ne: meme Maweja-Nangila Mvidi Mukulu, tshiena mua kuanyisha bua bele kabidi kasumuinu aku to. Kabena mua kukela kabidi mu ditunga dia Izrayele to. Kadi ubambile ne: “Matuku akadi pabuipi. Malu adi Mvidi Mukulu uleja adi akumbana.”

²⁴Kabena baleja kabidi bena Izrayele malu adi kaayi akumbana. Kabena mua kubambila kabidi malu a dishima.

²⁵Bualu meme Maweja-Nangila ndi ngakula. Kadi bindi ngamba bidi bienzeka lukasa, kabiyi binengakana to. Eyowa, nennunyoke, nuenu bantu banyi bantomboji, nuenu batshikale ne muoyi. Meme Maweja-Nangila ndi ngamba nanku.

²⁶Pashishe, Maweja-Nangila kuamba ne:

²⁷— Yezekiyele, bena Izrayele badi bamba ne: “Malu adi Mvidi Mukulu uleja kaena akumbana mpindiewu to.” Badi bamba kabidi ne: “Biudi wakula mu dina dia Maweja-Nangila nebikumbane amu mu tshikondu tshikuabu tshitshidi kule.”

²⁸Nanku, ubambile ne: meme Maweja-Nangila Mvidi Mukulu, ndi njadika ne: nenkumbaje lukasa dilaya dijima dimvua mubalaye bua kubanyoka.