Read Tshiluba Yezekiyele 13 Bible Online

Yezekiyele 13 - Tshiluba bible

Yezekiyele 13

¹Maweja-Nangila kungambila ne:

²— Muntu,[60] funda ku tshilumbu bantu bonsu badi badiamba ne: tudi bambi mu Izrayele, kadi badi balongesha amu mu dina diabu bobu nkayabu. Ubambile bua bateleje bidi Maweja-Nangila Mvidi Mukulu wamba.

³Meme Maweja-Nangila Mvidi Mukulu, ndi ngamba ne: Dikenga nedikuate bambi batshimbakane aba! Badi balonda amu lungenyi luabu bobu, baleja bantu malu a dishima.

⁴Nuenu bena Izrayele, bambi benu kabena benza bualu bua nsongu. Badi anu bu nyama ya mibuabua idi yendakana patupu mu makolu.

⁵Kabena baye kulongolola miaba ya ku bimana bia tshimenga ivua minyanguke. Kabena bibake tshimana bua kupeta muaba wa kunyemena mvita dituku didi Maweja-Nangila ufika munda.[61]

⁶Bambi aba badi bambila bantu malu a dishima, babadinga. Badi bamba ne: “Telejayi malu adi Maweja-Nangila unumanyisha.” Kadi meme Maweja-Nangila tshivua mubatume to. Kadi badi amu batekemena bua nkumbaje miaku yabu.

⁷Kadi ndi mbambila ne: “Malu anudi nuleja bantu, ne anudi nubalongesha, ki mmalu a dishima anyi? Nudi nuambila bantu ne: tudi tunumanyisha malu a Mvidi Mukulu, kadi meme tshiena munuambile bualu nansha bumue!

⁸Nanku, meme Maweja-Nangila Mvidi Mukulu, ndi nnujadikila ne: nennunyoke, bualu nudi bambile bantu malu a dishima a kubadinga nawu. Meme Maweja-Nangila Mvidi Mukulu ndi ngamba nanku.

⁹“Bambi badi bambila bantu malu a dishima adi afuma amu ku lungenyi luabu nkayabu, nembaleje bukole buanyi. Kabakuikala ne muaba mu tshipangu tshia bantu banyi. Kabena babafunda mu mukanda udi ne mena a bena Izrayele.[62] Kabakupingana mu ditunga diabu. Nanku nebajadike ne: meme ndi Maweja-Nangila Mvidi Mukulu.

¹⁰“Bambi badi bashima bantu banyi, padibu babambila ne: malu onsu adi anu mempe, eku malu kaayi mempe to. Bantu badi bibaka bimana ne mabue adi kaayi malamakane, kadi bobu badi anu baalaba lupemba.

¹¹Nanku, wambile balabi ba lupemba abu ne: Tshimana netshiupuke. Mvula mukole nealoke. Mabue a mvula neapone. Tshipepele tshia mvula wa tshipupu netshijuke.

¹²Padi bimana biupuke, bantu nebanukonke ne: lupemba lunuvua balabe luvua Imulengelela ku tshinyi?

¹³Meme Maweja-Nangila Mvidi Mukulu, ndi nnuambila ne: Tshiji tshianyi netshijule mvula wa tshipupu, difika dianyi dia munda nedijule mvula wa tshipepele tshikole. Pandi mfika munda, nendokeshe mvula wa mabue bua kunubutula.

¹⁴Nenshimbule tshimana tshinudi balabe lupemba. Nentshiupule tshionsu panshi. Tshitaku tshiatshi netshimueneke. Tshimana netshiupuke tshinuboza. Nanku nenujadike ne: meme ndi Maweja-Nangila.

¹⁵Tshiji tshianyi netshinyange tshimana, tshikengeshe ne bantu bavua balabe lupemba ku tshimana. Bantu nebanuambile ne: ‘Tshimana ntshiupuke! Bavua balabe lupemba abu, kuabu kuajiki!

¹⁶Bambi ba bena Izrayele bavua bamanyishe malu avua atangila Yerushalayime, bamba ne: malu onsu adi bimpe, kadi kaayi mimpe nansha kakese, kuabu kuajiki![63]’ Ke mundi ngamba nanku, meme Maweja-Nangila.”

¹⁷— Yezekiyele, mpindiewu ubele bakaji ba mu Yerushalayime, badi bambila bantu malu mu dina diabu bobu nkayabu, babamanyisha malu a dishima.

¹⁸Meme Maweja-Nangila Mvidi Mukulu, ndi ngamba ne: “Ubambile ne: diakabi nedinukuate! Bualu nudi nutela mikaba bua kusuika ku maboku onsu. Nudi nutela bitambala bidi bantu bonsu, bana ne bakulumpe, mua kusuika ku mitu bua nuikale bamfumu ba mioyi yabu.[64] Kadi nudi mua kudia bantu banyi, nuenu kushala ne muoyi anyi?

¹⁹Nudi numpepeja[65] ku mesu a bantu banyi, anu bua kupeta dianza dia bukula ne bipesa bia mampa. Panudi nutshimbisha bantu banyi, bena bitabataba, nudi nukebela badi kabayi ne bualu lufu, kadi nudi nulama ne muoyi badi bakanyina lufu.

²⁰Ke pandi meme Maweja-Nangila Mvidi Mukulu nnuambila ne: ndi munyenga mikaba yenu inudi nukuata nayi mioyi ya bantu. Nenyikutulule ku maboku enu, nyipande. Nempikule bantu banudi bakuate ku bupika.[66]

²¹Nempande bitambala bienu bia ku mitu. Nengumushe bantu banyi ku bumfumu buenu. Kabena mua kuikala kabidi tshiakudia tshienu to. Nanku nenumanye ne: meme ndi Maweja-Nangila.

²²Panudi nushima bantu, nudi nutekesha bantu ba nsongu ku muoyi, bantu bamvua tshiyi musue kukengesha. Kadi, nudi nuambuluisha bantu babi bua batungunuke ne malu abu mabi, bafuane kujimija muoyi wabu.

²³Nanku, kuenu kuajiki. Malu enu anudi nudinga nawu bantu, ne malongesha enu a dishima ajiki. Ndi ngumusha bantu banyi ku bumfumu buenu. Nanku nenumanye ne: meme ndi Maweja-Nangila.”