Read Tshiluba Yezekiyele 15 Bible Online

Yezekiyele 15 - Tshiluba bible

Yezekiyele 15

¹Maweja-Nangila kunkonka ne:

²— Yezekiyele, mionji ya mvinyo idi ne mushinga mupite wa mabaya a mitshi ya ditu anyi?[69]

³Badi mua kuyikosa, kusonga nayi bintu bia nsongu anyi? Badi mua kusonga nayi tubaya tua kuasa ku tshimana bua kukudika bintu anyi?

⁴Mionji ya mvinyo idi mimpe anu bua bayele muiku. Padi kapia kuosha nsongu yonsu ibidi ya mionji ayi, kuosha kabidi mionji ne pankatshi payi,[70] batshidi mua kukuata nayi mudimu mukuabu anyi?

⁵Pavuayi mijima kabatua bakuata nayi mudimu to. Kadi kapia kamane kuyikuata, kayosha, idi ishala kashidi tshintu tshidi katshiyi ne mudimu.

⁶Meme Maweja-Nangila Mvidi Mukulu, ndi ngamba ne: badi bela mionji ya mvinyo muiku, kadi kabena belamu mabaya a mutshi nansha. Ke mundi musue kunyoka amu bena mu Yerushalayime.

⁷Nembakengeshe. Bavua bela meji ne: tukadi bamane kupanduka ku kamue kapia. Kadi kapia kakuabu nekababutule.[71] Nanku nenumanye ne: meme ndi Maweja-Nangila, bualu nembanyoke.

⁸Ditunga diabu nedishale tshipela, bualu kabavua bangitabe. Meme Maweja-Nangila Mvidi Mukulu, ndi njadika bualu ebu.