Read Tshiluba Yezekiyele 2 Bible Online

Yezekiyele 2 - Tshiluba bible

Yezekiyele 2

¹Mvidi Mukulu kungambila ne: — Muntu,[8] juka, ndi musue kukuambila bualu.

²Pawaye wamba bualu abu, Mueyelu wa Mvidi Mukulu kuntulukila, kungimanyika kulu. Meme kumvua uvua ungakuisha, ungambila ne:

³— Muntu, ndi nkutuma kudi bena Izrayele. Bantu abu mbantombokele. Badi anu bambenga bu muvua bankambua babu bambenga.

⁴Nanku, ndi nkutuma kudi bantu aba ba tshitunu ne muoyi mupape. Neubambile ne: “Telejayi bidi Maweja-Nangila Mvidi Mukulu unumanyisha.”

⁵Diba adi, nansha bobu bakuteleje, nansha kabayi bakuteleje, bualu mbantu ba tshitunu, kadi nebamanye ne: muambi udi munkatshi muabu.

⁶Wewe Yezekiyele, kubatshinyi, kutshinyi nansha bidibu bamba to. Nebakukandike bua kuakula. Neusombe munkatshi mua meba a mingonga, ne mua tuminyiminyi. Kadi, kutshinyi miaku ya bantu aba, nansha bidibu benza, bualu mbantu ba tshitunu.

⁷Neubambuluile bionsu bindi nkuambila ebi, nansha bobu bakuteleje, nansha kabayi bakuteleje, bualu mbantu ba tshitunu.

⁸Kadi wewe Yezekiyele, kulondi tshitunu tshiabu to. Uteleje anu tshindi nkuambila. Ubulule mukana, udie tshionsu tshindi nkupesha bua kudia.

⁹Nanku, meme kumona tshianza tshingoluela, tshitua ne mukanda mutunga.[9]

¹⁰Tshianza tshitua tshivungulula mukanda kumpala kuanyi. Bavua bafunde miaku mu nseke yonsu ibidi ya mukanda.[10] Batua bafundemu miadi ya madilu, miyenga ne mikemu.