Read Tshiluba Yezekiyele 22 Bible Online

Yezekiyele 22 - Tshiluba bible

Yezekiyele 22

¹Maweja-Nangila kungambila ne:

²— Muntu,[124] udilongolole bua kulumbuluisha tshimenga tshia Yerushalayime, tshia bashipianganyi. Kutshinyi to! Ubavuluije malu mabi avuabu benze.

³Ubamanyishe tshindi meme Maweja-Nangila Mvidi Mukulu ngamba ne: “Udi mulekele bantu bebe bua bashipangane. Ke mudibu bakukebela kabuta. Badi benza mpingu indi mubenge bua kutendelela mvidie. Badi bapisha buloba buebe mikiya.

⁴Nanku, wewe Yerushalayime udi muena tshibawu tshia bantu bonsu bavuabu bashipe muebe. Udi mupie mikiya bua mpingu eyi idi bantu bebe benze. Wewe nkayebe ke udi udisemejila pabuipi tshikondu tshia kabuta kebe. Mataku ebe mmabadika! Ke pandi muanyishe bua bakuseke kudi bantu benyi. Bantu ba mu matunga onsu nebakutuishe bundu.

⁵Ukadi ne lumu lubi. Ditunga diebe ndia tshimvundu. Matunga adi kule ne matunga adi pabuipi neakuseke.

⁶“Muebe, mulombodi yonsu wa bena Izrayele mmushipe bantu kabayi bualu, anu bua muanzu udiye nawu.[125]

⁷Muebe, muntu kena unemeka tatuende nansha mamuende. Badi bakengesha benyi, batatshisha bana ba nshiya ne bakaji bakamba.[126]

⁸Bantu kabena banemeka nansha kakese miaba yanyi ya tshijila. Badi banyanga dituku dia Dikisha.

⁹Muebe, bantu badi bashiminyina bakuabu malu bua babashipe. Pa mikuna bantu bebe badi badia bintu bia ku milambu idibu balambule mvidie.[127] Badi benza malu a bundu bupite.

¹⁰Bamue mbabuelele mukaji wa tatuabu mu nzubu. Bakuabu mbasombe ne bakaji ku bukole padibu ku tshijila tshia bakaji.[128]

¹¹Banga badi banyanga nzubu wa bende pa kuangata mukaji wa bende. Bakuabu badi bangata ku bukole mukaji uvua muana musele; nansha bana babu ba bakaji ba tatuabu, nansha ba mamuabu, benda nabu tshiendenda.

¹²Muebe, badi bangata bantu ku mudimu, babafuta bua bashipe bantu bakuabu. Badi basombeshangana makuta bua kupeta kasombele ka bungi. Badi banyenga bintu bia muena mutumba bua kunema nabi. Kadi badi bampua muoyi kashidi meme Maweja-Nangila Mvidi Mukulu. Ke malu andi mujadike awu.

¹³“Kadi nuenu bena Yerushalayime, nennunyoke bikole ne tshiji, bua bintu binuvua bapete pa kudinga bantu ne bua bantu banuvua bashipe.

¹⁴Nenuikale ne bukitu bukumbane, kabidi ne bukole bua kuluangana nanyi, pandi mfika bua kununyoka anyi? Bualu meme Maweja-Nangila nengenze amu tshindi ngamba.

¹⁵Nennutangalaje munkatshi mua bisamba bikuabu, mu matunga a bende. Nenjikije malu mabi onsu anudi nuenza.

¹⁶Nebanufuishe bundu ku mesu a bantu ba bisamba bikuabu. Nanku diba adi, nenumanye ne: meme ndi Maweja-Nangila.”

¹⁷Pashishe, Maweja-Nangila kuamba kabidi ne:

¹⁸— Yezekiyele, ndi mumone ne: bena Izrayele mbafuanangane ne bikanganya. Badi bu tshiamu tshitoke tshia mushinga mukole, nansha bu tshiamu tshia kabanda, nansha bu tshiamu tshikunze, nansha bu tshiamu tshia ntenda, bidibu bela mu kapia bua kubiengulula, kumusha bikanganya.[129]

¹⁹Ke pandi meme Maweja-Nangila Mvidi Mukulu mbambila ne: “Nudi bu biamu bibi bidibu kabayi banji kuengulula. Nanku ndi nnusangisha popamue mu tshimenga tshia Yerushalayime.

²⁰Badi basangisha biamu bitoke bia mushinga mukole, biamu bia kabanda, bia ntenda, nansha biamu bikuabu mu ditanda, babiela mu kapia bua kubiengulula! Ke munganuenzela, bua tshiji tshikole tshindi natshi. Nennusangishe kaba kamue, bua meme kunuengulula mu kapia.

²¹Mu Yerushalayime, nennuele mu kapia ka tshiji tshianyi, bua kunuengulula bu mudibu benza ne biamu.

²²Nenuikale bafuanangane ne tshiamu tshitoke tshia mushinga mukole tshidibu bengulula mu kapia. Nenku nenujadike ne: udi mutupumuine tshiji ke Maweja-Nangila.”

²³Maweja-Nangila kuamba kabidi ne:

²⁴— Yezekiyele, ambila bena Izrayele ne: ditunga dienu ndifuanangane ne buloba budi kabuyi bulokela mvula.[130] Nebubutuke bua tshiji tshianyi, bu mudi buloba budi kabuyi bupeta mayi.

²⁵Bu mudi nyama ya ntambue mikuate nyama ikungula, ke mudi balombodi benu bashipe bantu,[131] bangata ne bintu bia bantu ba bende, bashipesha balume ba bungi, bua bakaji babu bashale bakamba.

²⁶Batuangaji benu kabena balonda mikenji yanyi, kabena banemeka miaba idibu bajidila mu dina dianyi. Kabena basunguluja bintu bidi bia tshijila, ne bintu bikuabu bidi bia tshianana. Kabena balongesha bantu mudi bintu bikuabu kabiyi ne mikiya, bikuabu ne mikiya. Kabena banemeka kabidi dituku dia Dikisha; badi badilengulula ku bukole. Nanku, kamuena muntu nansha umue udi unnemeka, mudibu ne bua kunnemeka.

²⁷Balombodi benu badi bashipangana anu bua kunema, bu mudi nyama ya lonji ishipa nyama, iyipandabipese bipese.

²⁸Bambi benu badi babuikila bilema bienu abi, bu mudibu bela lupemba ku tshimana tshia nzubu.[132] Badi bashima bantu, babambila malu amvua tshiyi mubaleje. Badi bambila bantu malu, babadinga ne: mmafume kudi Mvidi Mukulu. Kadi meme Maweja-Nangila tshivua mubambile bualu to.

²⁹Miaba yonsu mu ditunga badi bakengesha bantu, biba bintu biabu. Badi bakengesha bapele ne bakengi. Badi batatshisha benyi, kabayi babanemeka.[133]

³⁰Mvua mukebe muntu uvua mua kuibaka tshimana, nansha uvua mua kuimana muaba uvuabu bakeba kushimbula, bua kunkandika bua tshibutudi tshimenga. Kadi tshiena mupete muntu nansha umue.

³¹Nanku meme kubapumuina tshiji tshianyi. Meme kubabutula mu kapia, bualu mvua mufike munda. Meme kubanyoka bua malu abu mabi. Ke mundi ngamba nanku meme Maweja-Nangila Mvidi Mukulu.