Read Tshiluba Yezekiyele 26 Bible Online

Yezekiyele 26 - Tshiluba bible

Yezekiyele 26

¹Tshidimu tshia dikumi ne tshimue tshivuabu bamane kuya netu mu bupika, dituku dia kumpala dia ngondu,[162] Maweja-Nangila kungambila ne:

²— Yezekiyele, bena Tire badi baseka Yerushalayime, bamba ne: “Ekelekele! Ekelekele! Tshimenga tshia Yerushalayime, muaba uvua bantu ba matunga onsu bapitshila, ntshibutuke. Mpindiewu bantu nebafike kuetu bua kusakula. Netuneme bikole bipite, bualu mpindiewu Yerushalayime mmunyanguke![163]”

³Nanku meme Maweja-Nangila Mvidi Mukulu ndi njadika ne: “Wewe tshimenga tshia Tire, nenkunyoke bikole. Nentume bantu ba mu bisamba bivule bua bakuluishe. Nebabuele muebe ne bukole bu bua mavuala a mayi manene.

⁴Nebashimbule bimana biebe, babumbule tuleya tuebe. Nenkombe bintu bionsu bidi bishale. Nenshiye anu lubuebue patupu.

⁵Nemushale amu tshidila,[164] muaba udi balobi binyina tupamba tuabu. Meme Maweja-Nangila Mvidi Mukulu, ndi njadika nanku. Bantu ba mu bisamba bikuabu ne balue kupawula tshimenga.

⁶Nebanyange misoku iudi mutuangane nayi, idi ku muelelu wa mayi manene. Nanku bantu nebamanye ne: meme ndi Maweja-Nangila.

⁷“Meme Maweja-Nangila Mvidi Mukulu ndi ngamba kabidi ne: Wewe tshimenga tshia Tire, ndi nkutumina mukalenga Nebukadnesare wa bena Babilone udi mupite bakalenga bonsu ku bukole. Neafume ku mutu kua ditunga. Nealue kukuluisha ne nyama ya tubalu, matempu, babandi ba pa tubalu, kabidi ne bena mvita bakuabu ba bungi.

⁸Neanyange misoku iudi mutuangane nayi ku muelelu wa mayi manene. Pashishe baluishi bebe nebumbule mikidi, nebele mishiki ya buloba bua kubandabu, kukuluisha. Nebakunyunguluile ne ngabu mipite bungi.

⁹Nebashimbule bimana bia muebe ne biamu biabu bia mvita. Nebabumbule tuleya tuebe ne bikasu.

¹⁰Lupuishi ludi tubalu tuabu tua bungi tujule panshi nelukubuikile. Bimana biebe nebizakale ne mikuma ya nyama ya tubalu, kabidi ne mutoyi wa matempu abu a mvita. Nanku, nebabuele ku biibi biebe, anu bu mudibu babuela mu tshimenga padibu bamane kushimbula tshitupa tshia tshimana tshia tshimenga.

¹¹Baluishi bebe nebendeshe nyama yabu ya tubalu mu misesu ya muebe. Nebashipe bantu bebe ku muele. Nebupule makunji manene a muebe.[165]

¹²Nebibe bubanji buebe. Nebakunyenge bintu bionsu bidi bishale muebe bia kuenda nabi mushinga. Nebanyange bimana biebe, nebupule nzubu mimpe idi muebe. Nebangate mabue, mabaya, ne bintu bikuabu bionsu bia ku nzubu ayi, babiela mu mayi manene.

¹³Nenkandike bantu bua kabimbi kabidi misambu muebe. Kabakumvua kabidi muebe lunzenze ludila to.

¹⁴Nenkushiye anu lubuebue lutupu, muaba udi balobi ba minyinyi ya mu mayi banyikila makondu abu. Kabakuibaka kabidi tshimenga to. Meme Maweja-Nangila Mvidi Mukulu ndi njadika nanku.

¹⁵“Meme Maweja-Nangila Mvidi Mukulu ndi ngambila bena mu tshimenga tshia Tire ne: Bantu badi basombe kule ku mielelu ya mayi manene, ne mu bidila, nebazakale pandi mbutula tshimenga tshienu. Nebakuatshike bowa padibu bumvua mudi bantu badibu batapa mputa, bakeba kushipa muebe, batua mikemu.

¹⁶Bakalenga badi balombola bantu badi ku muelelu wa mayi manene, nebatuluke mu nkuasa yabu. Nebavule binkutu biabu, ne bilamba biabu bivuabu balengeje ne buanda.[166] Nebasombe panshi, bazakala amu kuzakala, bakuatshika bowa pa kumona bidi binuenzekela.

¹⁷Nebadile miadi bimba bualu buebe ne: Eyi, mbabutule tshimenga tshivua ne lumu lunene. Majuwa atshi kaena enda kabidi pa mayi manene.[167] Bena tshimenga etshi bavua bamfumu ba mayi manene, bavua batshinyisha bonsu bavua basombe ku muelelu wa mayi manene.

¹⁸Mpindiewu bantu bonsu aba badi bazakala, padibu bamona tshimenga etshi tshidibu babutule. Bantu badi basomba mu bidila, nansha ku muelelu wa mayi manene, badi bazakala bua padi tshimenga etshi tshijimine.

¹⁹“Eyowa, meme Maweja-Nangila Mvidi Mukulu ndi ngamba ne: Tire, nenkubutule bu mumvua muenze ne bimenga bikuabu, bua muntu nansha umue kasombi kabidi muebe. Nenjule mavuala a mu mayi manene bua akubuikile.

²⁰Nenkutume mu dijimba dia bafue, bua usombemu ne bantu bafuile kale. Neushale muinshi mua buloba mu kandondu kafuanangane ne makolu, bua usombe ne bafue bavua badianza kufika muaba awu. Kuena upatukamu kabidi to. Pa buloba muaba udi bantu ne muoyi, kuakupeta muaba kabidi to.[168]

²¹Bantu bonsu nebakeme batshina, pa kumona muudi ubutuka kashidi. Nebakukebe, kadi muntu nansha umue kakukumona kabidi to. Udi wamba nanku ke meme Maweja-Nangila Mvidi Mukulu.”