Read Tshiluba Yezekiyele 27 Bible Online

Yezekiyele 27 - Tshiluba bible

Yezekiyele 27

¹Maweja-Nangila kungambila ne:

²— Muntu,[169] dila muadi bualu bua tshimenga tshia Tire,

³tshidi ku tshibuelelu tshia mayi manene, tshienda mushinga pamue ne bantu ba bungi badi basombela miaba mikuabu ku muelelu wa mayi. Umanyishe Tire ne: meme Maweja-Nangila Mvidi Mukulu ndi nkuambila ne: “Wewe Tire, udi uditemba ne: ndi muimpe be!

⁴Pa mayi manene, mfumu uvua amu wewe! Mbakuibake bu mudibu base majuwa mimpe, mayi mikale nseke yonsu.

⁵Bavua bakuibake ne mabaya a mitshi ya siprese, ivuabu bakebe ku mikuna ya Senire.[170] Bavua bangate mutshi wa sedre wa mu Lebanone, bawimanyike munkatshi mua majuwa bua kusuikaku bilamba bia buatu.

⁶Bavua benza mibambu ne mabaya a lusanga lua mu Bashane. Bavua bibake majuwa, benza ne bisasa, ne mitshi ya Sedre ya mu bidila bia bena Ngreke, balamikaku mibanga.

⁷Bavua batela bilamba bia buatu, ne buanda buimpe bua mitshi ya mu Ejipitu. Patshidi bantu kule, badi bamona mekala abi, bakumanya! Bilamba bifikuluke ne bikunze, bidi bifuma ku tshidiila tshia Shipre, bavua benza nabi nzubu ya wewe kuteka bintu biebe bia kupana.

⁸Uvua muangate bantu ba mu Sidone, ne ba mu Arvade[171] ku mudimu wa kuita matu. Bantu ba muebe mu Tire bavua bamanye bimpe mudimu wabu, bavua bendesha majuwa.

⁹Bena midimu ya bianza ba mu Babilone, bena lungenyi lutue, bavua bamanye mudimu wabu bimpe. Bavua bakuate mudimu wa kulongolola mitanta ya ku majuwa. Majuwa onsu avua enda pa mayi avua imana muebe, bendeshi bavua basumba bintu muebe.

¹⁰Bena mvita ba bena Persa, ba mu Lude ne ba mu Pute,[172] bavua benza mudimu mu tshiluilu tshiebe, bavua bakudika ngabu ne bifulu biabu bia biamu ku bimana bia muebe. Bavua baluangana bua kukukebela lumu.

¹¹“Bena Arvade pamue ne bena mvita bebe, bavua benda pa bimana bia tshimenga tshiebe bua kutentekela baluishi. Bena Ngamade[173] bavua balama tuleya tuebe. Bavua bakudika ngabu yabu ku bimana bia tshimenga. Ke muvuabu bakulengeje bimpe be!”

¹²“Bena Tarshishe[174] batuta basumbishangana nebe bintu bitule. Batua basumba bintu biebe, bakufuta ne tshiamu tshitoke tshia mushinga mukole, tshia ntenda ne biamu bikuabu.

¹³Bena Ngreke, bena Tubale ne bena Mesheke,[175] bavua basumbishangana nebe bintu, bakupesha bapika ne bintu bia tshiamu tshikunze, bua kubishintakajangana ne bintu biuvua wewe nabi.

¹⁴Mu Bete-Togarma[176] batua bakupesha nyama ya tubalu idi ikoka matempu, nyama mikuabu ya mvita, ne ya mpunde.

¹⁵Bena Dedane bavua kabidi basumbishangana nebe bintu. Uvua mufike mu bidila bia bungi bua kuenda mushinga. Batua bakufute ne mibanga ne mabaya mafike fitutuu.[177]

¹⁶Bena Edome[178] batua basumba bintu bia bungi kuudi, bakufuta mabue a mushinga mukole a mishindu mishilangane; batua bakufute bilamba bifikuluke, bilamba bitela biela malenda, ne bilamba bia buanda bua ndanda.

¹⁷Bena Yuda ne bena Izrayele bavua basumbishangana nebe bintu, bakupesha ntete ya kuenza bukula ya mu tshimenga tshia Minite;[179] batua bakupesha mponda, buitshi, mafuta ne kamonya ka mupuya muimpe.

¹⁸Bena Damase batua basumba bintu biebe bia bungi bia mishindu ne mishindu. Bavua bakufuta malutu a mvinyo a mu ditunga dia Elbone, ne bilamba bia buoya bua nyama ya mu tshimenga tshia Sakare.[180]

¹⁹Biangatshile ku tshimenga tshia Uzale, bena Dane ne bena Yavane,[181] batua bakufuta tshiamu tshifula mu ditanda, ne bintu bia muenyi muimpe.

²⁰Bantu ba mu Dedane batua bakufuta bilamba bia kuteka pa nyama ya tubalu.

²¹Bena Arabe ne balombodi ba ditunga dia Kedare bavua basumbishangana nebe bintu.[182] Batua bakufuta bana ba mikoku, mikoku ne mbuji.

²²Bangenda mushinga ba mu Saba ne ba mu Ragma,[183] nuvua nusumbishangana nabu bintu. Bavua bakufuta ne manananshi mimpe, mabue a mushinga mukole a mishindu yonsu, ne tshiamu tshia mpawungi.

²³Bimenga ebi, Arane, Kane, ne Edene, bivua bisumbishangana nebe bintu, kabidi ne bangenda mushinga ba mu Saba, bimenga bia mu Ashure, ne bia mu Babilone.[184]

²⁴Bavua benduluka ne bilamba bia mushinga, bafika mu bisalu biebe ne bilamba bifikuluke, bilamba biela malenda, biata bia panshi bia mibidi mishilangane, ne mionji ya bipia miluka bikole.”

²⁵[185] “Majuwa manene a bungi atua mambule bintu biebe bia kusumbisha, aya nabi miaba yonsu. Muebe muvua bintu bia bungi bia kusumbisha. Uvua mufuane majuwa avua enda pa mayi manene, muwule ne bintu tente.

²⁶Bitshi bebe ba matu bavua baye nebe pa mayi manene mutantshi mule. Lupepele lufume ku luseke ludi diba dipatukila kukutshibula.

²⁷Bubanji buebe, bintu biebe bia kupana, biebe bionsu, balombodi ba majuwa, bena mudimu wa bianza bavua balongolola majuwa, bangenda mushinga, bena mvita bauvua muangate ku mudimu, bonsu bauvua nabu mu majuwa, bionsu bivua bidina mu mayi, diba diuvua mutshibuke.

²⁸Muadi wa bendeshi ba majuwa uvua uzakeja bantu bavua basombe ku muelelu wa mayi manene.

²⁹Nanku, bantu bonsu bavua bita ne mibambu, bavua batuluka ku majuwa abu. Bavua benda pa mayi manene mu majuwa, bavua batuluka panshi.

³⁰Bavua bakudila, badila muadi wa kanyinganyinga. Bavua badiela lupuishi mu mutu, babunguluka mu butu.

³¹Bavua babeya nsuki bualu buebe, bavuala bilamba bikayabale.[186] Bavua babungama, bakudila, batua mikemu bikole.

³²Bu muvuabu ne dibungama, bavua bakuimbila misambu ya muadi, bakuelela kasala ka madilu. Tire, kakuvua tshimenga tshikuabu bu wewe to. Mpindiewu udi mushale tshianana, munkatshi mua mayi manene.[187]

³³Pavuabu bapatule mu majuwa ebe bintu biuvua musumbishe, bantu ba bungi bavua babipeta. Bakalenga ba pa buloba kupeta bubanji, ku biuma biebe ne ku bintu biuvua wenda usumbisha.

³⁴Kadi mpindiewu mavuala mmakutshibule, makuine ne mu mayi mondoke! Bintu biebe ne bonsu bavua bakuendesha, mbidine nebe mu mayi manene.

³⁵Bantu bonsu badi basomba kule ku mielelu ya mayi manene, badi bakema, bakuatshika bowa. Bakalenga babu badi bazakala. Bowa ne luzakalu bidi bimueneka pa mpala yabu.

³⁶Bangenda mushinga ba bisamba bia benyi, badi batshina, bakuzakela, batua mikemu, bualu wewe udi ubakuatshisha bowa, bu muudi munyanguke kashidi!”