Read Tshiluba Yezekiyele 28 Bible Online

Yezekiyele 28 - Tshiluba bible

Yezekiyele 28

¹Maweja-Nangila kungambila ne:

²— Muntu,[188] umanyishe mukalenga wa bena Tire bindi meme Maweja-Nangila mmuambila ne: “Muoyi webe uvua ulunduka ne ditambisha. Uvua wamba ne:

³Ndi mvidie. Bu mudi mvidie yonsu, ndi nsomba mu nkuasa wa bukalenga munkatshi mua mayi manene’. Udi uditeka mulongu umue ne mvidie. Kadi udi amu muntu. Kuena mvidie nansha kakese to. Adi wela meji ne: ndi mupite Danele[189] ku meji; ndi mua kumvua malu masokome onsu.

⁴Udi mupete biuma, bualu udi ne lungenyi, mumanye malu. Udi ne tshiamu tshitoke tshia mushinga mukole ne tshiamu tshia mpawungi tshipite bungi.

⁵Udi muvudije biuma biebe, bualu udi mumanye mua kuenda mushinga. Kadi biuma bionsu ebi udi anu uditambisha nabi.

⁶“Nanku, teleja tshindi meme Maweja-Nangila Mvidi Mukulu nkuambila ne: uvua wela meji ne: ndi mulongu umue ne mvidie.

⁷Nanku nenkutumine bantu ba tshikisu ba mu bisamba bikuabu bua bakuluishe. Nebabutule bintu bilenga bionsu ebi, biuvua musangishe ne meji ebe. Nebanyange lumu luebe.

⁸Nebakutume ku dijimba dia bafue. Nebakutshimune, bakushipa munkatshi mua mayi manene.

⁹Padibu bafika bua kukushipa, newambe kabidi ne: ndi mvidie anyi? Udi muntu patupu! Bumvidie buebe kabuakumueneka diba didi bashipianganyi bakakuata.

¹⁰Neufue lufu lubi, bualu nebakushipe kudi bantu ba bisamba bikuabu, badi kabayi bamanye Mvidi Mukulu. Meme Maweja-Nangila Mvidi Mukulu ndi njadika bualu abu.”

¹¹Maweja-Nangila kungambila kabidi ne:

¹²— Yezekiyele, ela kasala ka muadi, udile mukalenga wa mu Tire. Umuambile ne: Maweja-Nangila Mvidi Mukulu ke uvua mummanyishe miaku ya kasala aka ne: “Wewe mukalenga wa Tire, uvua muntu wa tshitembu, wa meji matue, kabidi mulengele be.

¹³Uvua musombe mu Edene, mu lupangu lua Mvidi Mukulu. Bavua bakubuikile ne mabue a mushinga mukole a mishindu yonsu, makunze, matoke, a mayi a matamba, a mbongu, a mayi a nkunde, a komaline, a jaspe, a safire, a ngrenate ne a emerode. Uvua mutuale bilengejilu tatuabu benze ne tshiamu tshia mpawungi dituku divuabu bakufuka[190]

¹⁴Pabuipi nebe mvua muteke mukerubine munene bua akulame. Utua musombe pa mukuna wanyi wa tshijila, wenda munkatshi mua mabue atua akenka.[191]

¹⁵Utua wenza anu malu mimpe, katshia bakuluka too ne ku diba ditua malu mabi abanga kumueneka muebe.

¹⁶Utua musumbe bintu bitule, ubisumbisha. Ke tshitua tshikufikisha ku tshinyangu ne ku buenzavi. Ke pandi nkuipata pa mukuna wanyi, nkupingaja muaba wa bantu bakuabu bonsu. Mukerubine utua mukulame, wakuipatshi mutantshi mule ne mabue atua akenka.[192]

¹⁷Wewe kuditambisha bua lumu luutua nalu. Wewe kuenza bu muntu mupale bua bungi bua bintu biuvua mupete. Ke pandi nkuela panshi bua bakalenga bakuabu bakuseke.

¹⁸Utua wenda mushinga ne buivi. Uvua upisha miaba ya wewe kutendelela mikiya. Nanku ndi ntemesha kapia mu tshimenga tshiebe bua kukubutula. Bonsu badi bakutangila nebamone mundi nkuenza, nkushiya anu butu.

¹⁹Wewe newikale tshilejilu tshidi tshikuatshisha bonsu badi bakumanye bowa. Neushale tshintu tshia kutshinyishangana natshi, bualu neubutuke kashidi.”

²⁰Maweja-Nangila kungambila ne:

²¹— Yezekiyele, tangila ku tshimenga tshia Sidone.[193] Wambila bena tshimenga mundi mbakanyina.

²²Meme Maweja-Nangila Mvidi Mukulu ndi mbambila ne: “Nuenu bena Sidone nennunyoke. Nendeje butumbi buanyi ku malu andi nnuenzela. Pandi nnunyoka bantu bonsu nebamanye ne: meme ndi Maweja-Nangila. Ke mundi mbaleja mundi Mvidi Mukulu wa tshijila.

²³Nenkutumine disama dia tshiambu. Mashi neapueke mu misesu yenu. Nebanuluishe nseke yonsu. Nebashipe bantu bavule munkatshi mua tshimenga. Diba adi bantu bonsu nebamanye ne: meme ndi Maweja-Nangila.”

²⁴“Maweja-Nangila udi ujadika ne: Tshisamba nansha tshimue tshidi mutumba ne Izrayele, katshiena mua kupotela kabidi bena Izrayele to. Kabakubatatshisha kabidi bu mudi meba atua, enza mibundabunda. Nanku bantu nebajadike ne: meme ndi Maweja-Nangila.

²⁵“Meme Maweja-Nangila ndi ngamba ne: Nengumushe bena Izrayele bonsu miaba imvua mubatangalaje; nembasangishe muaba umue. Nanku nendeje bisamba bikuabu ne: meme ndi Mvidi Mukulu wa tshijila. Bena Izrayele nebasombe mu ditunga diabu dimvua mupeshe muntu wanyi Yakobe.

²⁶Nebasombemu talala. Nebasemu nzubu, bakuna mionji ya mvinyo. Nebasombe mu ditalala, bualu nennyoke bena mutumba nabu bavua babapetula. Nanku nebajadike ne: meme ndi Maweja-Nangila.”