Read Tshiluba Yezekiyele 29 Bible Online

Yezekiyele 29 - Tshiluba bible

Yezekiyele 29

¹Dituku dia dikumi ne dimue dia ngondu wa dikumi,[194] tshidimu tshia dikumi, tshitua bena Izrayele bamane kuya mu bupika, Maweja-Nangila kungambila ne:

²— Muntu, tangila kudi mukalenga wa bena Ejipitu, umumanyisha mundi mmukanyina yeye ne ditunga dijima dia bena Ejipitu.[195]

³Meme Maweja-Nangila Mvidi Mukulu ndi mmumanyisha ne: “Nenkunyoke wewe mukalenga wa bena Ejipitu. Udi bu ngandu munene wa tshidika, udi musombe munkatshi mua misapa ya Nile. Udi ujadika ne: musulu wa Nile nguanyi, bualu meme ngudi mudienzele wu.[196]

⁴Nanku nenkuele nkanu ku mbanga, ndamatshisha mishipa ya mu musulu webe ku mamba ebe. Nenkupatule mu musulu wa Nile ne mishipa yonsu eyi milamate ku mamba ebe.

⁵Nenkuimanshe mu tshipela, wewe ne mishipa yonsu ayi. Neufuilemu, kabayi bambule tshitalu tshiebe, kabayi batshijika.[197] Tshitalu tshiebe atshi nentshifile bua batshidie kudi nyunyi ne nyama ya tshisuku.

⁶Nanku, bena Ejipitu bonsu nebajadike ne: meme ndi Maweja-Nangila. “Bena Izrayele bavua batekemena kudi bena Ejipitu, kadi bena Ejipitu bavua anu bu dilenga ditekete didi muntu kayi mua kueyemina.

⁷Bavua bakukuata wewe Ejipitu mu tshianza. Kadi wewe kutshibukila mu bianza biabu. Wewe kubatapa mputa ku dikaya, kubatekesha ku muoyi.[198]

⁸Kadi meme Maweja-Nangila Mvidi Mukulu, ndi nkujadikila ne: Nenkutumine bena mvita. Nembutule bantu ne nyama bia mu ditunga diebe.

⁹Mu Ejipitu nemushale bu mu tshipela, kamuyi bantu. Nebamanye ne: meme ndi Maweja-Nangila. “Wewe uvua muambe ne: musulu wa Nile nguanyi, meme ke udi muwenze.

¹⁰Bu muudi wakula nanku, nenkunyoke wewe ne musulu webe. Nennyangakaje Ejipitu, nemmushiye tshipela, biangatshile ku tshimenga tshia Migdole ku mutu wa ditunga, too ne ku tshimenga tshia Ashuwane, ne ku mikalu ya ditunga dia bena Kushe, kuinshi mu ditunga.

¹¹Muntu nansha nyama kabiena mua kupitshilamu. Bidimu makumi anayi[199] kabakusanganamu muntu nansha nyama ne muoyi to.

¹²Nengenze Ejipitu tshipela munkatshi mua bipela bionsu. Bimenga biende nebishale bu mudi bimenga bikuabu bivuabu banyoke bishale makolu. Munkatshi mua bidimu makumi anayi abi, nentangalaje bena Izrayele mu bisamba bikuabu. Nembatume mu matunga a bende.

¹³“Meme Maweja-Nangila ndi ngamba ne: Papita bidimu makumi anayi, nenngumushe bena Ejipitu mu bisamba bia bantu muvuabu bamuangalake; nembasangishe.

¹⁴Nengandamune malu abu bua bapingane ku Patrose mu ditunga diabu dia kale. Nengenzemu bukalenga budi kabuyi ne bukole,

¹⁵budi bushadile ku makalenga onsu. Kabakuikala kabidi bamfumu ba bisamba bikuabu to. Nenkepeshe bungi buabu, bua kabikadi kabidi bamfumu mu matunga a bende to.

¹⁶Bena Izrayele kabakutekemena kabidi kudi bena Ejipitu to. Nanku kabakuenza kabidi bubi. Kabakubikila kabidi bena Ejipitu bua kubambuluisha.[200] Nanku, nebamanye ne: meme ndi Maweja-Nangila.”

¹⁷Dituku dimue dia ngondu wa kumpala,[201] tshidimu tshia makumi abidi ne muanda mutekete tshivua bena Izrayele bamane kuya mu bupika, Maweja-Nangila kungambila ne:

¹⁸— Yezekiyele, Nebukadnesare mukalenga wa Babilone uvua muenzeje bena mvita bende mudimu mukole bua kuluisha Tire. Nanku bena mvita bende badi mpindiewu ne mabala pa mitu, bapuluka pa makaya. Kadi, nansha mukalenga nansha bena mvita bende, kabena bapeta kantu mu mvita ya Tire to.[202]

¹⁹Meme Maweja-Nangila ndi ngamba ne: “Ndi mfila ditunga dia Ejipitu kudi Nebukadnesare, mukalenga wa mu Babilone. Neapawule bidi mu ditunga, abinyangakaje. Neangate bubanji buonsu, aye kufuta nabu bena mvita bende.

²⁰Ndi mmupesha ditunga dia Ejipitu, bua kumufuta bua midimu idiye mungenzele. Bualu bena mvita bende mbankuatshile mudimu. Meme Maweja-Nangila Mvidi Mukulu, ndi njadika bualu abu.

²¹“Diba dienzeka bionsu abi, nempeshe kabidi bena Izrayele bukole bupiabupia. Nenkupeshe wewe Yezekiyele bumfumu bua kuakula nabu,[203] bua bajadike ne: meme ndi Maweja-Nangila.”