Read Tshiluba Yezekiyele 32 Bible Online

Yezekiyele 32 - Tshiluba bible

Yezekiyele 32

¹Dituku dia kumpala dia ngondu wa dikumi ne muibidi,[219] tshidimu tshia dikumi ne tshibidi tshivuabu bamane kuya ne bena Izrayele mu bupika, Maweja-Nangila kungambila ne:

²— Muntu, ela kasala ka muadi, ubele mukalenga wa bena Ejipitu, umuambila ne: “Munkatshi mua bantu udi bu muana wa nyama wa ntambue. Kadi udi wenza malu bu nyama wa ngandu: udi wendakana, unaya mu misapa ya mu musulu webe, uvuandulula mayi ne makama ebe, enza bu muenji.[220]”

³“Nanku wambila mukalenga wa bena Ejipitu ne: Maweja-Nangila Mvidi Mukulu udi wamba ne: Bantu ba bungi nebasangile muaba umue. Diba adi nenkukuate mu bukondu buanyi. Bantu nebakoke bukondu abu ku tshibungubungu, bakupatula ku mukuna.

⁴Nenkuele ku mukuna, nenkushiye mu mpata, bua nyunyi yonsu ya mulu ikile pambidi pebe, bua nyama yonsu ya muitu isunsule mubidi webe.

⁵Bisunsukile bia munyinyi webe bidi bibole nembitangalaje pa mukuna ne mu tshibandabanda.

⁶Nenguwuje buloba ne mashi ebe. Neapueke pa mikuna, uwuje mbuwa.

⁷Paudi ukula muoyi, nemfikishe kulu, mbuikile mitotu, mbuikile diba ne divuba. Ngondu kakukenka kabidi.

⁸Bualu buebe nemfikishe mulu muonsu. Nentume midima mu ditunga dienu dijima. Meme Maweja-Nangila ndi njadika ne: nengenze nanku.

⁹Bantu ba bungi nebakeme, too ne ba matunga audi kuyi mumanye, pandi mbamanyisha malu a lufu luebe.[221]

¹⁰Nebakeme bua mushindu undi nkunyoka. Bakalenga babu nebazakale ne bowa, pandi nsempela ne muele wanyi wa mvita pa mitu yabu. Dituku diudi ukula muoyi, nebazakale kabayi ne dikisha, batshina lufu.

¹¹“Meme Maweja-Nangila ndi ngamba ne: Tshiluilu tshia mukalenga wa mu Babilone netshikuluishe.

¹²Nentume bena mvita ba bukitu, badi kabayi ne luse, ba mu bisamba bionsu bua bashipe bantu bebe bavule. Nebabutule bionsu biudi uditambisha nabi, bashipe bantu bebe bonsu.

¹³Nenshipeshe bimuna biebe bionsu bidi ku muelelu wa musulu wa Nile. Makasa a bantu ne mikonu ya nyama, kabiakuvuandulula kabidi mayi, kuanyanga.

¹⁴Nendekele mayi abutama, apueka bitekete bu mafuta. Meme Maweja-Nangila ndi njadika nanku.

¹⁵Nenshiye ditunga dia Ejipitu tshipela. Nengumushe bubanji buadi buonsu. Nembutule bantu badimu. Nanku nebamanye ne: meme ndi Maweja-Nangila.”

¹⁶Bakaji ba mu bisamba bionsu nebele kasala ka madilu, badila Ejipitu ne bantu bende bafuile. Meme Maweja-Nangila ndi njadika nanku.

¹⁷Matuku dikumi ne atanu a ngondu wa dikumi ne muibidi,[222] tshidimu tshia dikumi ne tshibidi tshivuabu baye ne bena Izrayele mu bupika, Maweja-Nangila kungambila ne:

¹⁸— Yezekiyele, dila muadi bua bena Ejipitu. Muadi webe ubalunguluje mu kandondu ka bafue pamue ne bisamba binene bikuabu.

¹⁹Ubambile ne: “Nudi nudimona ne: nudi bapite bantu bakuabu ku mushinga anyi? Puekayi nuye kulala munkatshi mua bantu ba bisamba bikuabu bavua bafue mu mvita.

²⁰Eyowa, bena Ejipitu nebafue mu mvita. Miele ya mvita idibu bapatule mu bibubu neyishipe bena tshiluilu bonsu ba bena Ejipitu![223]

²¹Mu kandondu ka bafue, bena mvita ba bukitu ne bantu bavue batue ndondu ne bena Ejipitu kale, nebele mbila ne: ‘Bantu ba bisamba bia benyi badi bafue mu mvita aba, bakadi bapueka bua kulala munkatshi muetu.’

²²“Mukalenga wa bena Ashure[224] udi muaba awu ne bena tshiluilu tshiende. Udi munkatshi mua nkita ya bantu bende bonsu badi bafue mu mvita.

²³Nkita yabu idi mu kandondu ka bafue, luseke lua lukita lua mukalenga wabu. Bantu bonsu aba mbafue mu mvita. Bobu aba bangabanga ke bavua bakuatshisha bantu bowa pa buloba.

²⁴“Mukalenga wa bena Elame[225] udi muaba awu ne tshiluilu tshiende. Lukita luende ludi munkatshi mua nkita ya bena mvita bende bonsu bafuile mu mvita. Bantu aba, bavua bakuatshisha bantu bowa pa buloba, badi lelu mu kandondu ka bafue. Badi bumvua bundu, bualu badi balala pamue ne bantu bafue bakuabu ba patupu.

²⁵Eyowa, mukalenga wa bena Elame udi ulala munkathi mua bena tshiluilu tshiende badi bafue mu mvita. Lukita luende ludi munkatshi mua nkita mivule ya bena mvita bende. Bantu bonsu aba mbafue mu mvita. Bavua bakuatshisha bantu bowa pa buloba. Mpindiewu badi balala kabayi ne lumu, pamue ne bantu bakuabu badi bafue mu mvita.

²⁶“Bakalenga ba mu Mesheke ne ba mu Tubale[226] badi muaba awu ne tshiluilu tshiabu. Badi balala munkatshi mua nkita ya bena mvita babu. Bantu aba, mbavuabu kabayi bateka panshi, mbafuile mu mvita. Bobu ke bavua bakuatshisha bantu bowa pa buloba!

²⁷Kabena babajike ne lumu muvuabu bajika bena mvita ba bukitu kale, bavua bakuatshisha bantu bowa pa buloba. Bena mvita ba bukitu aba, mbabatume mu kandondu ka bafue, ba-vuala bintu biabu bionsu bia mvita: bavua bateka mutu pa muele, ngabu pa tshiadi.[227]

²⁸Nuenu bena Ejipitu, nenufue kabidi. Nebanujike munkatshi mua bantu badibu kabayi bateke panshi, bafue mu mvita.

²⁹“Muaba awu, bena Edome,[228] bakalenga babu ne bamfumu badimu. Bavua bantu ba bukitu. Kadi mpindiewu badi anu balala bu bantu bakuabu bafue mu mvita. Mbabajike mu kandondu pamue ne bantu badibu kabayi bateke panshi.

³⁰“Balombodi ba bantu badi basomba mu matunga a ku mutu, ne bena Sidone,[229] badi muaba awu, mbaye kupetangana ne bafue bakuabu. Bavua bantu ba bukitu, bakuatshisha bowa. Kadi mpindiewu bantu badibu kabayi bateke panshi abu mbafue. Badi balala ne bundu muaba udi bantu bakuabu ba bungi bafue mu mvita. Badi ne bundu budi bonso badi bamane kubuela mu kandondu ka bafue nabu.

³¹“Bena mvita bonsu aba, mukalenga wa bena Ejipitu neabasangane mu kandondu ka bafue. Nansha bamushipa mu mvita ne bena mvita bende, neakoleshe muoyi padiye umona bena mvita bakuabu bonsu abu. Meme Maweja-Nangila ndi njadika nanku.

³²Tshimvua mubenge bua mukalenga wa bena Ejipitu akuatshishe bantu bowa pa buloba. Kadi mpindiewu, yeye ne bantu bende, nebabajike munkatshi mua bantu badi bafue mu mvita. Meme Maweja-Nangila Mvidi Mukulu ndi njadika nanku awu!”