Read Tshiluba Yezekiyele 40 Bible Online

Yezekiyele 40 - Tshiluba bible

Yezekiyele 40

¹Mu tshidimu tshia makumi abidi ne tshitanu, tshivuabu bamane kuya netu mu bupika bidimu dikumi ne binayi, kunyima kua dikuata dia tshimenga tshia Yerushalayime,[267] amu dituku divuabu batshikuata, mu matuku dikumi a ngondu, bukole bua Mvidi Mukulu kuntulukila, kumfila mu Yerushalayime.

²Meme kumvua muvua Mvidi Mukulu ungambula, uya nanyi mu ditunga dia Izrayele. Uvua munteke mu katongobela ku mukuna mupite bule. Mu tshibandabanda tshia mukuna, luseke lua kuinshi kuatshi, muvua nzubu miasa mifuanangane ne tshimenga.

³Mvidi Mukulu kumfikisha mu tshimenga atshi. Meme kumona muntu ubalakana bu tshiamu tshikunze. Muntu awu uvua ne muonji mu tshianza, ne mutshi wa kupima nawu bule bua bintu. Uvua muimane kulu pabuipi ne tshiibi.[268]

⁴Kungambilaye ne: — Yezekiyele, tabala, uditelejile ne matshi ebe. Wikale ne ntema ku bionsu bindi nkuleja. Bualu bavua bakufila kuneku bua wewe kumona bionsu bindi nkuleja. Pashishe newambile bena Izrayele malu onsu audi mumone.[269]

⁵Mvua mumone tshimana tshivua tshinyungulule lubanza lua pambelu lua nzubu wa Mvidi Mukulu nseke yonsu. Muntu uvua ne mutshi wende mu bianza wa bule bua metre asatu. Uvua upima mupimbu ne butumbuke bia tshimana atshi. Uvua musangane tshimana ne bule bua metre asatu mu mupimbu ne mu butumbuke.

⁶Kuyaye ku tshiibi tshia luseke ludi diba dipatukila, kubandaye pa tshibandilu, kupimaye butshiama bua tshibuelelu. Buvua bua metre asatu.[270]

⁷Kunyima kua tshibuelelu, kuvua muaba wa kupitshila, ne bibambalu bisatu ku luseke ne ku luseke. Tshibambalu tshionsu tshivua ne metre asatu mu bule ne mu butshiama. Bimana bivua bikosolola bibambalu abi bivua ne butumbuke bua metre abidi ne tshitupa. Kunyima kua bibambalu abi kuvua tshibuelelu tshia tshibambalu tshinene, tshivua tshitangilangane ne nzubu wa Mvidi Mukulu. Tshibuelelu atshi tshivua ne butshiama bua metre asatu.

⁸Muntu awu kupima kabidi tshibambalu tshinene atshi. Tshivua ne butshiama bua metre anayi. Bimana biatshi bia pambelu bivua ne mupimbu wa metre umue. Tshibambalu atshi tshivua ku ndekelu kua muaba wa kupitshila, tshitangilangane ne nzubu wa Mvidi Mukulu.

⁹

¹⁰Bibambalu bisambombu bia balami ba nzubu abi bivua ku tshiibi tshia luseke ludi diba dipatukila, bivua ne bule ne butshiama bua momumue. Bivua bisatu nseke yonsu ibidi. Bimana bivua bibikosolola bivua bionsu ne mupimbu wa momumue.

¹¹Muntu uvua upima kabidi butshiama bua tshibuelelu tshia tshiibi. Buvua bua metre atanu. Butshiama bua muaba wa kupitshila buvua bua metre asambombu ne tshitupa.[271]

¹²Kumpala kua bibambalu bia balami ba nzubu, bivua metre asatu mu bule ne mu butshiama, kuvua tshimana tshikese tshia santimetre makumi atanu mu butumbuke.

¹³Muntu kupima mutantshi uvua pankatshi pa tshimana tshia munda mua tshibambalu ne tshimana tshivua munda mua tshibambalu tshia luseke lukuabu. Kupetaye butshiama bua metre dikumi ne abidi ne tshitupa.

¹⁴Kupimaye kabidi tshibambalu tshinene tshivua ku ndekelu kua muaba wa kupitshila. Tshivua butshiama bua metre dikumi. Lubanza lua nzubu wa Mvidi Mukulu luvua lunyungulule tshibambalu atshi nseke yonsu.[272]

¹⁵Biangatshile ku mushiku wa kumpala wa ku tshiibi tshia pa mbelu pa lubanza, too ne ku tshimana tshia tshibambalu tshinene tshivua ku ndekelu, kuvua metre makumi abidi ne atanu.

¹⁶Madidishi avuabu bakoleshe ne tukanu avua ku bimana bia pa mbelu bia bibambalu, ku bimana bivua bikosolola bibambalu, too ne ku bimana bia tshibambalu tshinene tshia ndekelu. Madidishi onsu aa avua amueneka pambelu makese, kadi munda mikale manene.[273] Bavua bazola malala a mabue ku bimana bia munda mua bibambalu.

¹⁷Muntu awu kumfikisha mu lubanza lua pambelu pa nzubu wa Mvidi Mukulu. Mu lubanza elu bavua balamika mabue manene panshi. Bavua basa bibambalu makumi asatu, bivua bilamakane ne tshimana tshivua tshinyungulula lubanza.

¹⁸Mabue aa avua mabuikile buloba miaba yonsu ivua biibi, ne miaba mikuabu ivua mishale mitupu. Tshibumba tshia lubanza lua pambelu tshivua tshipi ku tshibumba tshia lubanza lua munda mua nzubu wa Mvidi Mukulu.

¹⁹Muntu kupima kabidi mutantshi uvua pankatshi pa tshibuelelu tshia mu lubanza lua pa mbelu, ne tshibuelelu tshia lubanza lua munda mua nzubu wa Mvidi Mukulu. Uvua mupete bule bua metre makumi atanu. Uvua mupime mutantshi awu luseke ludi diba dipatukila lua nzubu, ne luseke lua ku mutu kua nzubu.

²⁰Kupimaye kabidi bule ne butshiama bua tshiibi tshia kubuela mu lubanza lua pa mbelu tshia ku luseke lua ku mutu kua nzubu.

²¹Tshibuelelu atshi tshivua kabidi ne bibambalu bisambombu bia balami ba nzubu. Bibambalu bisatu luseke lumue, bisatu luseke lukuabu lua muaba wa kupitshila. Bimana ne bibambalu bivua bule ne butshiama bumue ne bia tshibuelelu tshia luseke ludi diba dipatukila. Bule bujima bua tshibuelelu buvua bua metre makumi abidi ne atanu, butshiama buatshi buvua bua metre dikumi ne abidi ne tshitupa.

²²Tshibambalu tshinene, madidishi, ne malala a mabue bivuabu bazole, bivua mushindu umue ne bia tshiibi tshikuabu. Bua kufika ku tshiibi tshia ku mutu, bavua ne bua kubanda bibandilu muanda mutekete. Ku ndekelu kua tshibuelelu kuvua kabidi tshibambalu tshinene bua kufika mu lubanza lua pa mbelu.

²³Bitangilangane ne tshibuelelu tshia ku mutu kua nzubu, kuvua tshiibi tshia kubuela mu lubanza lua munda mua nzubu, bu muvuabi kabidi ku luseke ludi diba dipatukila. Muntu kupima mutantshi uvua pankatshi pa biibi bibidi, uvua ne bule bua metre makumi atanu.

²⁴Pashishe kuyaye nanyi luseke lua kuinshi kua nzubu. Meme kumona tshiibi tshikuabu. Kupimaye bibambalu bia balami ba nzubu, bimana, ne tshibambalu tshinene. Bule ne butshiama bua bionsu bivua mushindu umue ne bia biibi bikuabu.

²⁵Muaba awu kabidi kuvua madidishi ku nseke yonsu ya tshiibi, ne ku tshibambalu tshinene. Avua a mushindu umue ne avua ku luseke ludi diba dipatukila lua nzubu, ne avua ku luseke lua ku mutu wa nzubu. Bule bua tshibuelelu tshijima buvua bua metre makumi abidi ne atanu, butshiama bua metre dikumi ne abidi ne tshitupa.

²⁶Bavua ne bua kubanda bibandilu muanda mutekete bua kufika ku tshiibi. Ku ndekelu kua tshibuelelu kuvua tshibambalu tshinene. Ku bimana bia munda mua bibambalu ku luseke ne ku luseke lua muaba uvua bantu bapitshila, bavua bazolaku malala a mabue.

²⁷Bitangilangane ne tshibuelelu etshi, muvua tshiibi tshikuabu bua kubuela mu lubanza lua munda mua nzubu. Muntu kupima mutantshi uvua pankatshi pa biibi bibidi bivua kuinshi kua nzubu. Kusanganaye bule bua metre makumi atanu.

²⁸Nanku, muntu awu kumfikisha mu lubanza lua munda mua nzubu ku tshiibi tshia kuinshi kua nzubu. Kupimaye bule bua tshiibi atshi. Bule buvua bua momumue ne bua biibi bivua mu tshimana tshia lubanza lua pa mbelu.[274]

²⁹Bibambalu bia balami, bimana bivua bikosolola bibambalu, tshibambalu tshinene, bionsu abi bivua mushindu umue mu bule ne mu butshiama ne bivua ku biibi bikuabu. Madidishi avua ku nseke yonsu ya tshibambalu tshinene. Tshibuelelu tshijima tshivua ne bule bua metre makumi abidi ne atanu. Butshiama buatshi buvua ne metre dikumi ne abidi ne tshitupa.

³⁰[275]

³¹Tshibambalu tshinene tshitua tshitangilangane ne lubanza lua pa mbelu. Ku bimana bia munda mua bibambalu batua bazola malala a mabue. Bavua babanda bibandilu muanda mukulu bua kufika ku tshiibi.

³²Pashishe muntu kupitshila nanyi ku tshiibi tshia luseke ludi diba dipatukila lua nzubu, bua kubuela mu lubanza lua munda mua nzubu. Muntu kupima tshiibi, kusanganaye bule buatshi anu bua momumue ne bua biibi bikuabu.

³³Bibambalu bia balami, bimana bitata bikosolola bibambalu, ne tshibambalu tshinene, bionsu bivua anu bule ne butshiama bumue ne bia ku biibi bikuabu. Madidishi avua ku nseke yonsu ya tshiibi, ne ya tshibambalu tshinene. Tshibuelelu tshijima tshivua ne bule bua metre makumi abidi ne atanu. Butshiama buatshi buvua bua metre dikumi ne abidi ne tshitupa.

³⁴Tshibambalu tshinene tshivua tshitangilangane ne lubanza lua pa mbelu. Ku bimana bia munda mua bibambalu bivua nseke yonsu ibidi ya muaba wa kupitshila, bavua bazolaku malala a mabue. Bavua ne bua kubanda bibandilu muanda mukulu bua kufika ku tshiibi.

³⁵Muntu awu kumfikisha kabidi ku tshiibi tshia ku mutu wa nzubu. Kutshipimaye. Tshivua mushindu umue ne biibi bikuabu.

³⁶Ku tshiibi atshi kuvua kabidi bibambalu bia balami, bimana bivua bikosolola bibambalu, tshibambalu tshinene, ne madidishi nseke yonsu. Bule bujima bua tshibuelelu buvua metre makumi abidi ne atanu, butshiama buatshi metre dikumi ne abidi ne tshitupa.

³⁷Tshibambalu tshinene[276] tshivua tshitangilangane ne lubanza lua pa mbelu. Ku bimana bia munda mua bibambalu bivua nseke yonsu ibidi ya muaba wa kupitshila, bavua bazolaku malala a mabue. Bavua ne bua kubanda bibandilu muanda mukulu bua kufika ku tshiibi.

³⁸Ku tshiibi tshia ku mutu wa nzubu kuvua tshibambalu tshikuabu tshivua tshilamatangane ne tshibambalu tshinene. Ke muaba uvuabu basukuila minyinyi ya nyama ivuabu bashipa bua kuyilambula Mvidi Mukulu bu milambu ya kuosha.

³⁹Ku tshimana tshia ku ndekelu kua tshibambalu tshinene, nseke yonsu ibidi, kuvua mesa abidi. Pa mesa apa bavua bakoselapu mitu ya nyama ivuabu balambula Maweja-Nangila bu milambu ya kuosha, nansha bu milambu mikuabu ya kudikobolola.

⁴⁰Pa mbelu pa tshibambalu tshinene, pavua kabidi mesa anayi. Pavua bantu babuela ku mushiku wa tshiibi tshivua ku mutu wa nzubu, bavua mua kumona mesa abidi ku nseke yonsu.

⁴¹Nanku bavua bateke mesa muanda mukulu bua kushipelapu nyama ya milambu, mesa anayi ku luseke lua tshiibi, manga anayi ku luseke lukuabu.

⁴²Mesa anayi avuabu bateke bua kulongolola nyama ya milambu ya kuosha avua a mabue masonga. Avua ne butshiama bua santimetre makumi muanda mutekete ne itanu nseke yonsu, ne santimetre makumi atanu mu bule. Bavua batekapu biamu bia kusaya nabi nyama ivuabu bafila bua milambu ya kuosha.

⁴³Bavua benza minkoloji ya santimetre makumi muanda mukulu ku nseke yonsu inayi ya mesa aa. Bavua bateka pa mesa apu minyinyi ya nyama ya milambu.

⁴⁴Muntu kumfikisha mu lubanza lua munda mua nzubu. Muvua bibambalu bibidi,[277] tshimue tshivua ku luseke lua tshiibi tshia ku mutu wa nzubu, kadi tshibuelelu tshiatshi tshivua tshitangila luseke lua kuinshi kua nzubu; tshikuabu tshivua ku luseke lua tshiibi tshia kuinshi kua nzubu, kadi tshibuelelu tshiatshi tshivua tshitangila ku mutu kua nzubu.

⁴⁵Muntu kungambila ne: “Tshibambalu tshidi tshitangila luseke lua kuinshi, ke nzubu wa batuangaji badi benza midimu mishilangane mu nzubu wa Mvidi Mukulu.

⁴⁶Kadi tshibambalu tshidi tshitangila luseke lua ku mutu, ke nzubu wa batuangaji badi benza mudimu wa kulambula milambu.” Kuambaye kabidi ne: “Munkatshi mua bena Levi, anu ndelanganyi ya Sadoke[278] ke idi mua kubuela muaba wa tshijila bua kuenzela Maweja-Nangila mudimu.”

⁴⁷Muntu kupima lubanza lua munda mua nzubu, luvua butshiama bua metre makumi atanu nseke yonsu. Tshilambuilu tshivua kumpala kua nzubu wa Mvidi Mukulu.

⁴⁸Kuyaye nanyi mu tshibuelelu[279] tshia nzubu wa Mvidi Mukulu. Mupimbu wa makunji abidi a tshiibi uvua wa metre abidi ne tshitupa ku dikunji dionsu. Tshibuelelu tshivua ne metre muanda mutekete mu butshiama. Bimana bia ku luseke lua tshibuelelu bivua ne mupimbu wa metre umue ne tshitupa.

⁴⁹Tshibuelelu tshivua metre dikumi mu bule, metre isambombu mu butshiama. Bavua ne bua kubanda ku bibandilu dikumi bua kubuela mu tshibambalu. Ku mushiku wa mbelu kuvua makunji abidi, dimue ku luseke lumue, dikuabu ku luseke lukuabu.[280]