Read Tshiluba Yezekiyele 42 Bible Online

Yezekiyele 42 - Tshiluba bible

Yezekiyele 42

¹Pashishe muntu kuya nanyi mu lubanza lua pa mbelu, kumfikisha ku bibambalu bivua ku mutu kua nzubu, bilulamangane ne muaba uvua mushale mutupu, kabidi ne ku tshibambalu tshivuabu bibake mu mfundu mua nzubu wa Mvidi Mukulu.

²Bibambalu abi bavua babiasa luseke lua ku mutu kua nzubu. Bivua ne metre makumi atanu mu bule, ne metre makumi abidi ne atanu mu butshiama.

³Luseke lumue, bibambalu ebi bivua bitangilangane ne muaba uvua mushale, wa butshiama bua metre dikumi. Muaba awu, uvua munyungulule nzubu wa Mvidi Mukulu. Lunga luseke bivua bitangilangane ne lubanza lua pa mbelu. Bivua ne milongu isatu ya tuzubu tuvuabu batentakaja.[290]

⁴Kumpala kua bibambalu luseke lua lubanza lua munda mua nzubu, kuvua njila muikale ne metre atanu mu butshiama, ne metre makumi atanu mu bule.[291] Bua kubuela mu nzubu emu, bavua bapitshila ku luseke lua ku mutu wa nzubu.

⁵Tuzubu tua mulu tuvua tubulakana ku tua muinshi, ne tua munkathi mua bibambalu, bualu mu tuzubu tua kulu muaba wa kupitshila uvua munene.

⁶Milongu isatu ya tuzubu atu kayivua ne makunji bu mudi bibambalu bikuabu bia mu lubanza. Tuzubu tua mulongu muibidi tuvua tubulakana ku tua mulongu wa kumpala, tua mulongu muisatu ku tua mulongu muibidi.

⁷Luseke lua lubanza lua pa mbelu, tshimana tshia bibambalu abi tshivua ne metre makumi abidi ne atanu mu bule,

⁸bualu tshibambalu tshivua kabidi ne bule bua metre makumi abidi ne atanu. Kabidi bibambalu bivua bitangilangane ne nzubu wa Mvidi Mukulu, bivua ne metre makumi atanu mu bule.

⁹Muinshi mua bibambalu ebi, ku luseke ludi diba dipatukila luabi, kuvua mushiku, bua bantu bavua bafuma mu lubanza lua pa mbelu.

¹⁰Mushiku wa tshibuelelu ewu, uvua muaba uvua tshimana tshia lubanza tshituadijila. Ku luseke lua kuinshi kua nzubu,[292] kuvua kabidi bibambalu bitangilangane ne muaba uvua mushale mutupu, kabidi ne tshibambalu tshivuabu basa mu mfundu mua nzubu wa Mvidi Mukulu.

¹¹Njila uvua upitshila kumpala kua bibambalu abi. Bibambalu abi bitata mushindu umue ne bibambalu bivua luseke lua ku mutu kua nzubu ku bule, butshiama, bibuelelu ne milongu ya tuzubu.

¹²Ke mutata kabidi biibi bia bibambalu abi bia luseke lua kuinshi kua nzubu mushindu umue. Ku ntuadijilu wa njila, kuvua mushiku wa mbelu mutangilangane ne tshimana tshitata tshilama muaba wa tshijila.[293] Bavua babuelelamu ku luseke ludi diba dipatukila lua nzubu.

¹³Muntu kungambila ne: — Bibambalu bia luseke lua ku mutu kua nzubu ne bia luseke lua kuinshi kua nzubu, bidi bia tshijila. Batuangaji badi mua kubuela muaba wa tshijila wa Maweja-Nangila, badi badila milambu ya tshijila anu mu bibambalu ebi. Nanku bibambalu ebi bidi bijidila. Badi batekamu milambu ya tshijila menemene: ya biakudia, ne ya nyama ya milambu ya mishindu yonsu idibu bashipa, bua kudikobolola.

¹⁴Batuangaji badi bamane kubuela muaba wa tshijila, padibu bapatuka, kabena mua kuya diakamue mu lubanza lua pa mbelu to. Badi ne bua kukopola bilamba bia tshijila bivuabu bavuala bua kuenzela Maweja-Nangila mudimu, kubishiya mu bibambalu ebi. Muaba ewu badi ne bua kuvuala bilamba bikuabu, bua bamone mua kuya muaba udi bantu basangile.

¹⁵Muntu mumane kupima bibambalu bionsu bitua munda mua nzubu wa Mvidi Mukulu, kupatukilaye nanyi ku tshiibi tshia luseke ludi diba dipatukila lua nzubu wa Mvidi Mukulu. Kutuadijaye kupima muaba uvua munyungulule nzubu wa Mvidi Mukulu.

¹⁶Uvua upima ne mutshi wende.[294] Kusanganaye luseke lua nzubu wa Mvidi Mukulu ludi diba dipatukila luikale ne metre nkama ibidi ne makumi atanu mu bule.

¹⁷Kupimaye tshiakabidi luseke lua nzubu wa Mvidi Mukulu lua ku mutu, lua kuinshi, ne lua kudi diba dibuelela, kusanganaye miaba yonsu mikale anu bule bumue bua metre nkama ibidi ne makumi atanu.

²⁰Ke mutotabu bapima tshimana tshidi tshinyungulule nzubu wa Mvidi Mukulu ku nseke yatshi yonsu inayi. Tshimana tshitata ne nseke inayi, bule bua metre nkama ibidi ne makumi atanu ku luseke. Tshitata tshiabuluja miaba ya patupu, ne muaba mujidila Mvidi Mukulu.[295]