Read Tshiluba Yezekiyele 6 Bible Online

Yezekiyele 6 - Tshiluba bible

Yezekiyele 6

¹Maweja-Nangila kungambila ne:

²— Muntu, tangila ku mikuna ya mu Izrayele, umanyishe bantu badiku tshindi nkuambila![22]

³Bantu badi basomba ku mikuna minene ne mikese, mu bibandabanda ne mu mpongu, bakuteleje. Meme Maweja-Nangila Mvidi Mukulu ndi mbambila ne: “Nennutumine mvita bua kunyanga miaba yenu inudi nutendelela mvidie.

⁴Nebanyange bilambuilu bienu. Nebazaze mbabula yenu inudi nuoshila manananshi.[23] Bantu ba bungi ba munkatshi muenu nebafuile kumpala kua mvidie yenu mibi.

⁵Nengimanshe bitalu bia bena Izrayele panshi kumpala kua mvidie yabu. Nengele mifuba yabu ku nseke yonsu ya bilambuilu biabu.[24]

⁶Miaba yonsu inudi nusomba, nebabutule bimenga bienu. Miaba yenu ya kutendelela neyishale munda mutupu. Bilambuilu bienu nebinyanguke, bishale bintu bia tshianana.[25] Nebazaze mpingu yenu, bayumbushe. Nebanyange mbabula yenu ya kuoshila manananshi. Bintu bionsu binudi benze nebijimine.

⁷Bantu ba bungi ba kunudi nebafue. Nanku nenujadike ne: meme ndi Maweja-Nangila.

⁸Kadi bantu bakese ba kunudi nembasungidile, nembapandishe ku mvita. Nembatume mu matunga a bantu benyi.

⁹Nebanwuluke munkatshi mua bisamba mudibu basombela mu bupika. Nebakuluke mumvua mubanyoke,[26] bualu muoyi wabu uvua mumbenge. Bavua banange, batangile anu mvidie ya tshianana. Diba adi nebanyingalale bikole, nebadiwule bua malu mabi avuabu benza.

¹⁰Nebajadike ne: meme Maweja-Nangila pamvua mubambile bua kubatumina makenga, tshivua mbashima to. Bualu makenga ke adibu nawu lelu!”

¹¹Maweja-Nangila Mvidi Mukulu udi wamba ne: “Kanutekemenyi kabidi to. Nutue mikuma panshi, nuele mbila bua kudiwula malu mabi onsu adi bena Izrayele benze. Nebafuile mu mvita, ku tshiyole tshia nzala, ne ku disama dia tshiambu.

¹²Bantu badi mitantshi mile, nebafue ku disama dia tshiambu. Badi pabuipi, nebafue ku mvita. Badi bashale ne muoyi mu tshimenga tshidibu baluisha, nebafue ku nzala. Nembenzele mudi tshiji tshianyi tshingambila.

¹³Bitalu biabu nebishale panshi munkatshi mua mpingu yabu, ne ku nseke yonsu ya bilambuilu biabu, ku nsongu ya mikuna minene ne mikese, muinshi mua mitshi idi ne mabeji mabishi mapite bungi, ne ku miaba mikuabu yonsu idibu balambuila mvidie yabu milambu.[27] Nanku muntu yonsu neashindike ne: meme ndi Maweja-Nangila.

¹⁴Nembaleje bukole buanyi. Nennyange ditunga diabu, nembutule bantu badi basombamu, biangatshile ku luseke lua ku tshipela tshidi kuinshi mu ditunga, too ne ku tshimenga tshia Ribla tshidi ku mutu wa ditunga. Bantu bonsu nebajadike ne: meme ndi Maweja-Nangila.”