Read Tshiluba Yezekiyele 8 Bible Online

Yezekiyele 8 - Tshiluba bible

Yezekiyele 8

¹Mu tshidimu tshisambombu tshitua bena Izrayele mu bupika, mu matuku atanu a ngondu muisambombu, bakulu ba bena Yuda[36] batua bafike kuanyi bua kunsombesha. Diakamue bukole bua Maweja-Nangila Mvidi Mukulu kuntulukila muaba awu.

²Meme kumona tshintu tshifuanangane ne muntu.[37] Muinshi mua tshimonu tshia tshintu atshi, meme kumona mubidi watshi umueneka bu kapia, ku mutu kua tshimonu tshia tshintu atshi, kuvua bu butoke bufuanangane ne tshiamu tshikunze tshibalakana bikole.

³Tshintu atshi kuolola tshintu bu tshianza, kunkuata ku nsuki. Nanku, pavua Mvidi Mukulu undeja bionsu ebi, meme kumvua Mueyelu wende ungambula mulu mu kapepe, kuya kuntuluila mu Yerushalayime. Uvua muntuluile munda mua tshimenga, pabuipi ne tshiibi tshia tshimenga tshidi luseke lua ku mutu, muaba uvuabu bateke kabidi lupingu ludi lufikisha Mvidi Mukulu munda.[38]

⁴Butumbi bua Mvidi Mukulu wa Izrayele kumuenekela muaba awu, anu bu mumvua mubumone mu tshibandabanda.[39]

⁵Mvidi Mukulu kungambila ne: — Yezekiyele,[40] tangila ku luseke lua ku mutu wa ditunga. Meme kutangila ku luseke alu. Ku mutu kua tshiibi, kuvua tshilambuilu. Meme kumona lupingu ludi lufikisha Maweja-Nangila munda ku mushiku udi mutangilangane ne tshilambuilu.

⁶Mvidi Mukulu kuamba ne: — Yezekiyele, udi mumone bimpe bidi bienzeka ebi anyi? Bena Izrayele badi benza malu mabi mapite adi mua kungumushisha mu muaba wanyi wa tshijila. Kadi, neumone malu mabi makuabu mapite.

⁷Kungambulaye bua kuya nanyi ku tshiibi tshidi mu lubanza lua pambelu pa nzubu wa Mvidi Mukulu. Muaba awu meme kumona disosu mu tshimana.

⁸Mvidi Mukulu kungambila ne: — Yezekiyele, diundisha disosu didi ku tshimana. Meme kudidiundisha, kuenza disosu dinene.

⁹Mvidi Mukulu kuamba ne: — Buelela mu tshimana, umone malu mabi mapite andi meme mubenge, kadi adi bantu aba benza muaba ewu.

¹⁰Meme kubuelela mu tshimana, kumona nseke yonsu muvua bantu bazole bimfuanyi bia bilandadi ne bia nyama mibi mikuabu ku bimana. Bavua bazolepu mpala ya mvidie yonsu idi bena Izrayele batendelela.

¹¹Bakulu makumi muanda mutekete ba bena Izrayele bavua bimane kumpala kua bimfuanyi abi. Ku bakulu aba, kuvua Yazaniya, muana wa Shafane. Mukulu yonsu uvua mukuate ku tshianza mbabula wa kuoshila manananshi. Muinshi wa musenga wa kamonya uvua ubanda mulu.[41]

¹²Mvidi Mukulu kunkonka ne: — Yezekiyele, udi mumone bimpe bidi bakulu ba bena Izrayele benza mu musokoku, muntu yonsu udi ku muaba udi bimfuanyi bia mvidie wende. Badi basue kudibingisha, bamba ne: “Maweja-Nangila kena mutumone to. Mmumane kumuangala mu ditunga.”

¹³Maweja-Nangila kuamba kabidi ne: — Neumone mudibu benza kabidi malu mabi makuabu, mapite wowu aa ku bubi.

¹⁴Maweja-Nangila kuya nanyi too ne ku tshiibi tshidi ku nzubu wende luseke lua ku mutu. Bakaji bavua muaba awu, badila mvidie uvua mufue, dina diende Tamuze.[42]

¹⁵Mvidi Mukulu kunkonka ne: — Yezekiyele, udi mumone bimpe bionsu ebi anyi? Neumone kabidi malu mabi makuabu.

¹⁶Mvidi Mukulu kungambula, kuya nanyi too ne mu lubanza lua munda mua nzubu wende. Ku tshibuelelu tshia nzubu wa Mvidi Mukulu pankatshi pa lutanda ne tshilambuilu, pavua bantu balume bu makumi abidi ne batanu. Bavua bela nyima ku nzubu wa Mvidi Mukulu, batangile luseke ludi diba dipatukila. Bavua batua binu bua kukukuila diba.

¹⁷Mvidi Mukulu kunkonka ne: — Yezekiyele, udi mumone bionsu ebi anyi? Kadi bena Yuda kabena benza bibi bindi mubenge amu muaba ewu to. Badi bakengesha bantu nabu mu ditunga dijima. Tangila mudibu bampenda muabu muonsu. Badi badiela tshisosa nkayabu mu diulu.[43]

¹⁸Nanku, nemfike munda, nembanyoke ne tshiji tshikole. Tshiena mua kubafuila luse, tshiena mua kulekela bilema biabu to. Nansha bobu bela mbila, balomba bua meme kubambuluisha, tshiakubateleja nansha.