Read Tshiluba Daniyele 1 Bible Online

Daniyele 1 - Tshiluba bible

Daniyele 1

¹Yoyakime, mukalenga wa bena Yuda[1] mumane kushala bidimu bisatu mu bukalenga, Nebukadnesare, mukalenga wa Babilone, kukuataye tshimenga tshia Yerushalayime.

²Maweja-Nangila kufila Yoyakime mu bianza bia Nebukadnesare, kabidi ne bintu bikuabu bia tshijila bia mu nzubu wa Mvidi Mukulu. Nebukadnesare kuya ne bena lukanu mu Babilone, kuteka bintu bia tshijila abi mu nzubu wa mvidie yende, mu tshibambalu tshia kulamina bintu.[2]

³Nebukadnesare kuambila Ashepenaze, mulombodi wa bena mudimu bende, bua asungule munkatshi mua bena Izrayele, nsongalume mikuabu ya mu diku dia bukalenga, nansha ya mu meku a babanji.

⁴Nsongalume ayi ikale ne bukole bua mubidi, kayiyi ne bulema pambidi, ya mubidi mulenga, ya bukole, ya meji, ya dimanya dikumbane, ne ya lungenyi lutue lua kujingulula nalu malu, bua benzele mukalenga mudimu mu nzubu wende wa bukalenga. Nebabalongeshe mua kuakula ne kufunda muakulu wa bena Babilone.[3]

⁵Mukalenga kutuma diyi bua babapeshe dituku dionsu, biakudia ne maluvu bia momumue ne biende bivuaye udia, unua, ne bua babalongeshe bidimu bisatu. Pakumbana matuku awu nebatuadije kumuenzela mudimu.

⁶Nsongalume inayi ya mu tshisamba tshia Yuda ivua mu tshisumbu tshia ivuabu basungula ayi; mena abu: Daniyele, Ananiya, Mikayele ne Azariya.

⁷Mulombodi wa bena mudimu ba mukalenga kubinyika mena mapiamapia. Kuinyikaye Daniyele Beltashare; kupeshaye Ananiya dina dia Shadrake, Mikayele dia Meshake, ne Azariya dia Abede-Nego.[4]

⁸Bu muvua Daniyele ubenga kupia mikiya, kudikandikaye bua kudia ne bua kunua bivua mukalenga udia ne unua. Nanku Daniyele kuambila mulombodi wa bena mudimu bua kamupeshi biakudia bidi ne mikiya nansha.

⁹Mvidi Mukulu kupesha mulombodi wa bena mudimu muoyi muimpe bua kuitabaye bivua Daniyele ulomba.

¹⁰Mulombodi wa bena mudimu kuambila Daniyele ne: — Mukalenga wa bakalenga mene udi mufunde binudi mua kudia ne kunua. Kadi biamonaye mpala yenu neandamuke, mishilangane ne ya bansongalume ba mulongu wenu, nudi numbueja mu tshilumbu. Mukalenga udi mua kungenzela bibi.

¹¹Ke Daniyele kuambila muntu uvua mulombodi wa bena mudimu mupeshe bujitu bua kubatangila, yeye Daniyele, kabidi ne Ananiya, Mikayele ne Azariya, ne:

¹²— Ndi nkusengelela ne: bena mudimu bebe bidikije mua kutupesha amu bisakisaki ne mayi a kunua matuku dikumi.

¹³Pashishe ufuanyikije mpala yetu, ne ya bansongalume batu badia biakudia bia momumue ne bidi mukalenga udia. Nanku diba adi newenze netu muudi musue.

¹⁴Muntu awu kuanyisha, kupima bualu abu kudi Daniyele ne balunda bende mu matuku dikumi.

¹⁵Matuku dikumi akumbana, kumonabu mpala yabu mimpe, mibidi misenene bikole ne bujitu bupite bua nsongalume ivua idia biakudia bia mumue ne bia mukalenga.

¹⁶Kubangila ku dituku adi, mulami wabu uvua umbusha biakudia ne maluvu bivuabu mua kudia, ubapesha amu bisakisaki.

¹⁷Mvidi Mukulu kupesha bansongalume banayi aba disunguluja dia malu ne dimanya diwle mu miakulu ne mu meji a bantu. Daniyele uvua ne lungenyi lua kujingulula malu adi Mvidi Mukulu uleja, kabidi ne bilota.

¹⁸Matuku avua mukalenga Nebukadnesare muambe, bua kufikabu ne bansongalume bonsu kudiye, kukumbanawu. Mulombodi wa bena mudimu kufika nabu ku mpala kua Mukalenga.

¹⁹Mukalenga kuyukila nabu bonsu. Munkatshi muabu kavua musangane muntu ne lungenyi bu muvua Daniyele, Ananiya, Mikayele ne Azariya nalu. Ke kubuelabu ku mudimu kua mukalenga.

²⁰Pa malu onsu avua mukalenga ubakonka, avua atangila meji ne lungenyi, uvua ubasangana bapite misangu dikumi bena majimbu ne bena mbuku ba mu bukalenga buende.

²¹Daniyele kushala ku mudimu wa mukalenga too ne ku tshikondu tshiwa Koreshe mushale mukalenga wa bakalenga.[5]