Read Tshiluba Daniyele 2 Bible Online

Daniyele 2 - Tshiluba bible

Daniyele 2

¹Nebukadnesare mumane kukumbaja bidimu bibidi mu bukalenga, kulotaye tshilota. Bowa kumukuata, kupangaye mua kulala tulu.

²Mukalenga kubikidisha babuki ba mbuku, benji ba majimbu, bapaki ba manga ne bena bilengulengu, bua kumujinguluilabu tshilota tshiende. Kufikabu, kuimanabu kumpala kua mukalenga.

³Mukalenga kubambila ne: — Ndi mulote tshilota, tshinkuatshisha bowa. Ndi musue nungambile tshidi tshilota etshi tshiumvuija.

⁴Bena bilengulengu kuandamuna mukalenga mu muakulu wa bena Arame[6] ne: — Mukalenga, kuata ku mundundu! Tuawilaku tshilota, netukujinguluiletshi!

⁵Mukalenga kubambila ne: — Ndi mumane kupangadika ne: panudi nupanga kungambila tshindi mulote, kanuyi mua kutshinjinguluila, nebanukose bitupa bitupa. Nzubu yenu neyikudimuke dikolu.

⁶Kadi nuenu bangambila tshilota tshianyi, nennupeshe bintu bivule. Nenuikale kabidi ne lumu lunene. Nenku nungambile tshindi mulote, nutshingumvuije.

⁷Bena bilengulengu kuandamuna mukalenga tshiakabidi ne: — Mukalenga, tuambilaku tshiudi mulote, netumone mua kukujinguluila.

⁸Mukalenga kuandamuna ne: — Ndi mumone ne: nudi basue kulepesha diba, bualu nudi bamone mundi mumane kupangadika mua kuenza.

⁹Panudi kanuyi nungawila tshindi mulote, tshibawu netshikale tshia mumue bua bantu bonsu. Bualu nudi bumvuangane bua kungambila miaku ya dishima ne ya tshianana, too ne pandi ngandamuna bimvua mupangadike. Kadi ndi musue nungawile tshilota. Nenku nemmanye ne: nudi mua kutshinjinguluila.

¹⁰Bena bilengulengu kuandamuna mukalenga ne: — Kakuena muntu pa buloba apa udi mua kuenza tshiudi ujinga to. Kabidi kakuena mukalenga, nansha munene, nansha wa bukole bua bungi, ukadiku muebeje mubuki wa mbuku, nansha muena majimbu, anyi muena bilengulengu, bualu bua mushindu ewu.

¹¹Bualu buudi ujinga mbukole. Kakuena muntu udi mua kukuambilabu, anu mvidie, kadi kayena isomba mu bantu ba pa buloba.

¹²Nanku mukalenga kufika munda bikole, kutuma diyi bua bashipe bena meji[7] bonsu ba mu Babilone.

¹³Kukosabu tshilumbu. Bawa bamanyisha bantu ne: nebashipe bena meji. Kukebabu kabidi Daniyele ne balunda bende bua kubashipa.

¹⁴Pashishe Ariyoke, mulombodi wa bena mvita ba mukalenga, kupatuka bua kuya kushipa bena meji ba mu Babilone. Daniyele kuyukila nende, ne meji ne budimu bua bungi. Kumukonkaye ne: mukalenga mmukoleshe tshilumbu nanku bua tshinyi? Ke Ariyoke kulondela Daniyele bualu bujima.

¹⁵

¹⁶Daniyele kuya diakamue ku nzubu kua mukalenga, kumusengelela bua amuambile tshikondu tshidiye mua kumujinguluila tshilota tshiende.

¹⁷Daniyele upingana ku nzubu kuende, kulondela balunda bende Ananiya, Mikayele ne Azariya bualu bujima abu.

¹⁸Kubambilaye bua balombe luse kudi Mvidi Mukulu wa mu diulu, abamanyishe tshilota tshisokome atshi, bua kabavu kubashipa pamue ne bena meji bakuabu ba mu Babilone.

¹⁹Nenku butuku, Mvidi Mukulu kulotesha Daniyele tshilota, kumujinguluila tshia mukalenga. Ke Daniyele kutumbisha Mvidi Mukulu wa mu diulu,

²⁰wamba ne: “Tuelayi Mvidi Mukulu tuasakidila diba dionsu! Yeye udi ne meji ne bukole.

²¹Udi ukudimuna bikondu ne malu mudiye musue. Udi umusha bakalenga mu nkuasa, nansha ubatekamu. Yeye ke udi ufila meji kudi bena meji, upesha bajinguludi ba malu lungenyi.

²²Yeye udi utanduila bantu malu makole adi masokome. Udi mumanye malu adibu basokoke mu midima, bualu muaba udiye udi butoke.

²³Mvidi Mukulu wa bankambua banyi, ndi nkuanyisha, nkutumbisha. Udi mumpeshe meji ne bukole. Udi mummanyishe bualu butuvua bakulombe, mututanduile bualu buvua butatshisha mukalenga.”

²⁴Pashishe Daniyele kuya kua Ariyoke, uvua mukalenga mupeshe bukenji bua kushipa bena meji ba mu Babilone. Ufika, kumuambilaye diakamue ne: — Kushipeshi bena meji ba mu Babilone nansha! Umfile kudi mukalenga. Meme nemmujinguluile tshilota tshiende.

²⁵Ariyoke kufila Daniyele pa lukasa kuvua mukalenga, umuambila ne: — Mukalenga, ndi mupete muntu udi mua kukujinguluila tshilota tshiebe. Udi wa ku tshisumbu tshia bena Yuda badibu bakuate, bafike nabu kuneku ku bupika.

²⁶Mukalenga kuebeja Daniyele, muabu binyika kabidi ne: Beltashare, ne: — Bulelela, wewe udi mua kungambila tshindi mulote, ne kutshinjinguluila kabidi anyi?

²⁷Daniyele kumuandamuna ne: — Mukalenga, bualu busokome buudi webeja, mbualu budi bena meji, bena bilengulengu, bamanyi ba malu a mitotu, bena majimbu, ne babuki ba mbuku, kabayi mua kujingulula.

²⁸Kadi mu diulu mudi Mvidi Mukulu, udi umanyisha bantu malu masokome. Yeye ke udi mukumanyishe wewe mukalenga Nebukadnesare malu adi ne bua kuenzeka matuku atshidi kumpala. Kadi tshiuvua mulote ntshietshi.

²⁹Mukalenga, pauvua mulale uvua welangana meji bua malu atshidi kumpala. Ke padi Mvidi Mukulu, udi umanyisha bantu malu masokome, mukumanyishe malu adi ne bua kuenzeka matuku adi kumpala.

³⁰Kadi Mvidi Mukulu mmummanyishe ndota eyi, ki mbua ne: ndi ne meji mapite a bantu bonsu, kadi amu mbua ne: muntu akujinguluile tshilota tshiebe, akutanduile tshidi tshipampakaja lungenyi luebe.

³¹“Mukalenga, tshiuvua mumone ntshietshi: Kumpala kuebe kuvua lupingu lunene, lupite bunene, bikenka bikole, lukuatshisha bowa.

³²Mutu wa lupingu alu uvua wa tshiamu tshia mpawungi menemene, tshiadi tshialu ne maboku alu bivua bia tshiamu tshitoke tshia mushinga mukole, difu dialu ne bibelu bivua bia tshiamu tshikunze,

³³mikolu yalu ivua ya tshiamu tshifiike, makasa alu avua tshitupa tshiamu tshifiike ne tshitupa tshikuabu buloba bosha.

³⁴Wewe utua ubandila lupingu elu, too ne diba diwamonu dibue dilamuka ku mukuna,[8] kadiyi dinyungisha kudi muntu. Dibue kudikuma ku makasa a lupingu avua tshitupa tshiamu tshifiike, tshitupa tshikuabu buloba bosha. Kubitshibuladi bitupa bitupa.

³⁵Nenku diakamue tshiamu tshifiike, dima, tshiamu tshikunze, tshiamu tshitoke tshia mushinga mukole, ne tshiamu tshia mpawungi, kusunsukabi, kuenza lupuishi ludi lupepele lupepula, mudi bisote bipepuka mu tshikondu tshidibu bapepula ntete.[9] Lupepele kupepula bionsu, kaluyi lushiya kantu ka lupingu nansha kamue. Kadi dibue divua didikume ku lupingu adi kuenzadi mukuna munene, uvua muwuje buloba bujima.

³⁶“Ke muvua thilota tshiebe nanku. Mukalenga, mpindiewu teleja tshidi tshilota tshileja:

³⁷Wewe udi mukalenga mupite bakalenga bonsu. Mvidi Mukulu wa mu diulu udi mukupeshe bukalenga, dikanda, bukole ne lumu.

³⁸Mmukuteke ku mutu kua bukua bantu, kua nyama ya mu mpata, ne kua nyunyi ya mulu. Udi mfumu wabi miaba yonsu idibi. Mukalenga, mutu wa tshiamu tshia mpawungi ke wewe!

³⁹Kunyima kua bukalenga buebe, nekupatuke bukalenga bukuabu bushadile ku buebe. Pashishe bukalenga buisatu, budibu baleja kudi tshiamu tshikunze, nebumueneke, butangalaka buloba bujima.

⁴⁰Bukalenga buinayi, budi ne bukole bu bua tshiamu tshifiike, nebulonde. Bu mudi tshiamu tshifiike tshizaza bintu bia mishindu yonsu tshibisunsula, bukalenga ebu nebuzaze, busunsula makalenga onsu avua mabudianjidile.[10]

⁴¹Bu muuvua mumone makasa ne minu ya makasa bia lupingu bikale tshitupa tshia buloba bosha ne tshitupa tshikuabu tshia tshiamu tshifiike, bidi bileja ne: bukalenga abu nebuikale bukosoloke. Kadi munda mua bukalenga abu nemuikale tshintu tshikole bu tshiamu, bualu uvua mumone tshiamu tshifiike tshisangisha ne buloba bosha.

⁴²Kadi bu mutua minu ya makasa mikale ya tshiamu tshifiike tshisangisha ne buloba bosha, mmumue ne: bukalenga ebu nebuikale tshitupa tshikole, tshitupa tshitekete.

⁴³Mukalenga, uvua mumone tshiamu tshifiike tshisangisha ne buloba bosha. Mbuena kuamba ne: bena bukalenga ebu nebatue ndondu, babuelakana ne bakuabu, baseleshangana bana. Kadi kabena balamatangana kashidi, bualu tshiamu tshifiike katshitu tshilamatangana ne buloba bosha nansha.[11]

⁴⁴“Mu matuku adi bakalenga aba mu bumfumu, Mvidi Mukulu wa mu diulu neajule bukalenga bukuabu budibu kabayi mua kubutula nansha musangu umue. Tshisamba tshikuabu katshiena mua kuangata bukalenga abu nansha. Bukalenga abu nebubutule makalenga onsu adi mabudianjidile. Nebuashidishe, kadi bobu nebujalame kashidi.

⁴⁵Uvua mumone dibue dilamuka ku mukuna, kadiyi dinyungisha kudi muntu, bua divue kusunsula tshiamu tshifiike, tshikunze, buloba bosha, tshiamu tshitoke tshia mushinga mukole, ne tshiamu tshia mpawungi bivua ku lupingu.[12] Mvidi Mukulu udi nkumanyisha wewe, Mukalenga, malu adi ne bua kuenzeka matuku adi kumpala. Tshilota tshiebe mbualu budi Mvidi Mukulu mukuleje bulelela. Dijingulula dindi mukuambile didi pa diodi.”

⁴⁶Nanku, mukalenga Nebukadnesare kutua mpala panshi, kudiela ku makasa a Daniyele, kutuma diyi bua bamulambule nyama ne manananshi.

⁴⁷Pashishe mukalenga kuambila Daniyele ne: — Bulelela, Mvidi Mukulu webe udi munene mupite mvidie yonsu, udi mfumu wa bakalenga. Yeye nkayende udi umanyisha malu masokome, bualu wewe nkayebe uvua mua kuntanduila bualu ebu busokome.

⁴⁸Pashishe mukalenga kupesha Daniyele mianzu minene, ne bintu bia disanka bia bungi, bia mushinga mukole. Kumutekaye mulombodi wa buloba bua Babilone, kabidi mfumu munene wa bena meji bonsu ba mu Babilone.

⁴⁹Mukalenga kuteka Shadrake, Meshake ne Abede-Nego ku mutu kua midimu minene ya mu buloba bua bena Babilone, muvua Daniyele mumulombe. Kadi Daniyele kushala mufidi wa ngenyi mu lubanza lua bukalenga.