Read Tshiluba Daniyele 4 Bible Online

Daniyele 4 - Tshiluba bible

Daniyele 4

¹“Meme Nebukadnesare, mvua musombe bimpe ne ditalala divule mu nzubu wanyi wa bukalenga.

²Dituku dikuabu, pa bulalu buanyi, meme kulota tshilota tshivua tshinkuatshisha bowa. Meji amvua ngela pamvua mulale, ne malu avua Mvidi Mukulu undeja, kunkuatshishabi bowa bukole.

³Meme kutuma diyi bua bena meji[21] bonsu ba mu Babilone bafike kundi bua kunjanduila tshilota.

⁴Babuki ba mbuku, bena majimbu ne bena bilengulengu, bamanyi ba malu a mitotu, bonsu kufika. Meme kubawila tshilota. Muntu nansha umue wa kudibu kavua ne lungenyi lua kutshinjinguluila.

⁵Katupa kipi kapita, Daniyele kabidi kufika kuanyi. Ke muntu udibu binyika kabidi ne Beltashare, dina difuma ku dina dia mvidie wanyi. Daniyele udi ne mueyelu wa mvidie ya tshijila.[22] Meme kumuambila ne:

⁶Beltashare, mfumu wa babuki ba mbuku, ndi mumanye ne: udi ne mueyelu wa mvidie ya tshijila. Nanku kakuena bualu busokome budi mua kukukolela. Unjinguluile tshilota.

⁷Pamvua mulale mu bulalu buanyi, mvua mulote nenku: Mutshi mule uvua muimane kulu munkatshi mua buloba.

⁸Mutshi awu kuenza munene mupite, wa bukole kabidi. Matamba awu male avua mafike ne mu diulu. Bavua baumone pa buloba bujima.

⁹Uvua ne mabeji mimpe matambe, ukuama bimuma bipite bungi, bua bonsu bamone mua kubidia, kuukuta. Nyama ya mu mpata ivua ikisha mu dileji dia mutshi awu. Nyunyi ivua ibaka masua ayi mu matamba awu. Tshifukibua tshionsu tshidi ne muoyi tshiwa tshipetelaku tshiakudia tshiatshi.

¹⁰“Amu pantshivua mulale, meme kumona kabidi mutumibue wa Mvidi Mukulu upueka, ufuma mu diulu.

¹¹Kuelaye diyi dikole ne: Upulayi mutshi ewu, kosayi matamba awu, popolayi mabeji awu, tangalajayi bimuma biawu. Nyama idi muinshi muawu inyeme, nyunyi idi pa matamba ibuke!

¹²Kadi nushiye amu tshikuku mu buloba ne miji yatshi, tshishale munkatshi mua bisosa bia mu mpata. Nutshisuike ne lukanu lua tshiamu tshifiike, ne lua tshiamu tshikunze, bua tshishale panshi. Lumuma lutshiboleshe, tshidie bisosa bia mu mpata, mudi nyama yenza.

¹³Bumbushe lungenyi luatshi lua muntu, batshipingajile lungenyi lua nyama. Tshishale nanku bidimu muanda mutekete!

¹⁴Batumibue ba Mvidi Mukulu kufikisha dipangadika edi, bua bantu bonsu badi ne muoyi bamanye ne: Mvidi Mukulu, Muena kulu, udi mfumu wa makalenga a bantu. Udi upesha muntu udiye musue bukalenga. Udi mua kubupesha nansha muntu udi mushadile ku bonsu.

¹⁵Etshi ke tshilota tshimvua mulote, meme mukalenga Nebukadnesare. Nanku wewe Beltashare utshinjinguluile. Bualu kakuena muena meji nansha umue mu bukalenga buanyi udi mutshinjinguluile. Kadi wewe udi mua kutshinjinguluila, bualu udi ne mueyelu wa mvidie ya tshijila.[23]”

¹⁶Daniyele udibu binyika kabidi ne: Beltashare, kumvua bowa katupa, meji ende kulubakana. Mukalenga kumuambila ne: — Beltashare, tshilota etshi ne diumvuija diatshi, kabikuenji bowa nansha! Beltashare kumukudimuna ne: — Mukalenga, tshilota etshi ne diumvuija diatshi, bu biobi mua kutangila amu baluishi bebe!

¹⁷Uvua mumone mutshi munene, mukole, matamba a kulu matue mu diulu. Bantu bonsu ba pa buloba bawa baumona!

¹⁸Mutshi awu wa mabeji mimpe uvua mukuame bimuma bia bungi, bivua bantu bonsu mua kudia kuukuta. Nyama ya mu mpata ivua ilala mu dileji diawu, nyunyi ivua mibake masua ayi mu matamba awu.

¹⁹Mukalenga, mutshi awu ngwewe! Wewe kudiunda, kukola. Bunene buebe kupita, kutua mu diulu. Bukalenga buebe kutanta, kufika ne ku ntengu ya buloba.

²⁰Pashishe wewe kumona mutumibue wa Mvidi Mukulu upueka panshi, utumina mu diulu, wamba ne: “Shimbulayi mutshi ewu, nuukosolole! Kadi nushiye tshikuku ne miji yatshi mu buloba munkatshi mua bisosa bia mu mpata. Nutshisuike ne lukanu lua tshiamu tshifiike ne lua tshiamu tshikunze. Lumuma lutshiboleshe, tshidie bisosa bia mu mpata, mudi nyama yenza; bienzeke nanku bidimu muanda mutekete.”

²¹Mukalenga, tshilota tshiebe tshidi tshiumvuika nenku: bilondeshile dipangadika dia Mvidi Mukulu, Muena kulu,

²²nebakuipate munkatshi mua bantu! Neusombe ne nyama ya mu tshisuku. Neudie bisosa mudi ngombe idia. Lumuma lukuboleshe! Neushale mushindu ewu bidimu muanda mutekete, too ne pawamanya ne: Mvidi Mukulu, Muena kulu, ke udi mfumu wa makalenga a bantu, kabidi udi upesha muntu udiye musue bukalenga.

²³Pashishe mukenji wa kushiya tshikuku tshia mutshi ne miji yatshi, udi utumanyisha ne: Nebakupingajile bukalenga buebe, pawamanya ne: Mvidi Mukulu wa mu diulu ke udi Mfumu.

²⁴Nanku, Mukalenga, anyisha mubelu undi nkupesha: lekela mibi yebe, ne bilema biebe. Wenze malu mimpe,[24] ufuile bapele luse. Nanku misangu mikuabu nebalepeshe tshikondu tshia diakalenga diebe.

²⁵Malu onsu, avuabu bamane kuambila mukalenga Nebukadnesare, kukumbanawu.

²⁶Tshidimu tshijima tshimane kupita, mukalenga uvua wendakana pa musaka wa nzubu wa bukalenga wa mu Babilone.

²⁷Mukalenga kuela lubila ne: — Ewu mBabilone, tshimenga tshinene tshimvua muibake, bua tshikale muaba wa mukalenga kusomba. Tshimenga etshi tshidi tshileja mudi bukole buanyi, ne mudi lumu lua bukalenga buanyi!

²⁸Amu patshivua mukalenga ne miaku eyi mukana, diyi kufuma mu diulu diamba ne: — Mukalenga Nebukadnesare, teleja: Bakunyengi bukalenga!

²⁹Nebakuipate munkatshi mua bantu! Neusombe ne nyama ya mu tshisuku. Neudie bisosa, mudi ngombe idia! Neushale mushindu awu bidimu muanda mutekete, too ne pawamanya ne: Mvidi Mukulu, Muena kulu, ke udi mfumu wa makalenga a bantu, ke udi upesha muntu udiye musue bukalenga.

³⁰Diakamue bualu ebu kuenzekabu. Kuipatabu Nebukadnesare munkatshi mua bantu. Kubangaye kudia bisosa, mudi ngombe idia. Mubidi wende kubola ne lumuma. Nsuki yende kulepa, bu masala a nyunyi ya tshiminyi. Nzadi yende kudiunda bu ya nyunyi.

³¹Nebukadnesare kuamba ne: — Bidimu muanda mutekete kupita, meme kutangila mu diulu. Meji anyi a bumuntu kumpingana. Meme kuela Mvidi Mukulu Muena kulu, udi ne muoyi tshiendelele tuasakidila. Meme kumutumbisha, ngimba butumbi buende. Bumfumu buende mbua kashidi. Bukalenga buende kabuena bujika.

³²Bantu bonsu ba pa buloba, nansha bobu bungi munyi, kabena ne mushinga ku mesu kuende. Udi wenza mudiye musue ne ba mu diulu, mudiye wenza ne ba pa buloba. Kakuena udi mua kumutuila nkanana, nansha kumutandisha.

³³“Diba adi, kumpingajilabu meji anyi a buntu. Lumu lua bukalenga buanyi, bunene buanyi, ne bubanji kupinganabi kundi. Meme kubanza tshiakabidi mu bukalenga, kupeta lumu lupite lumvua nalu diambedi.

³⁴Ke pandi meme Nebukadnesare mpindiewu ntumbisha, nganyisha, nnemeka Mukalenga wa diulu! Tshionsu tshidiye wenza tshidi tshiakane. Malu ende onsu adi pa wowu. Yeye udi ne bukole bua kupuekesha nansha bantu bena diditambisha.”