Read Tshiluba Bele 1 Bible Online

Bele 1 - Tshiluba bible

Bele 1

¹Mukalenga wa bena Madayi Astyaje, mumane kufua, Koreshe wa bena Persa kupeta bukalenga.[1]

²Daniyele uvua mulunda wa mfumu, uvua ulondelangana nende malu. Mfumu uvua mumuanyishe bikole bipite bia bafidi ba ngenyi ba mfumu bonsu.

³Kadi bena Babilone bavua ne lupingu lua tshimfuanyi tshia nwidie Bele. Bavua batuula ku dituku dionsu bua nwidie awu kilo ya bukula ipatshila ku nkama itanu,[2] mikoku makumi anayi ne litre nkama ibidi ne makumi atanu ya nwinyo.

⁴Mukalenga uvua utendelela lupingu ku dituku dionsu ulukukuila. Kadi Daniyele uvua ukukuila amu Mvidi Mukulu. Mukalenga kuebeja Daniyele ne: — Kuena ukukuila Bele bua tshinyi?

⁵Daniyele kuandamuna ne: — Tshiena mua kutendelela mpingu mienza kudi bantu to. Ndi nnemeka amu Mvidi Mukulu wa muoyi, wakafuka diulu ne buloba,[3] udi ne bumfumu bua bintu bionsu.

⁶Mukalenga kumuebeja ne: — Bele kena nwidie wa muoyi anyi? Kuena mumone bionsu bidiye udia ne unua ku dituku dionsu anyi?

⁷Daniyele kuseka, kuandamuna ne: — Mukalenga kudishimi nansha! Lupingu elu kaluena luanji kudia nansha kunua kantu to. Ludi amu diima didibu balamika tshiamu tshikunze.[4]

⁸Mukalenga kufika munda, kubikidisha batuangaji bende, ubambila ne: — Nuenu kanuyi bangambila udi udia bionsu bidi bantu balambula lupingu elu, badi banufundila tshibawu tshia lufu.

⁹Kadi panuikala bajadike mudi Bele ubidia, Daniyele neafue, bualu udi usendeka Bele. Daniyele kuandamuna mukalenge ne: — Bienzeke muudi wamba amu!

¹⁰Batuangaji ba Bele bavua makumi muanda mutekete, katuyi tubala bakaji ne bana babu. Mukalenga ne Daniyele kuya ku nzubu uvuabu batendelela Bele.

¹¹Batuangaji ba Bele kumuambila ne: — Mukalenga, tuetu tudi tupatuka mu nzubu udibu batendelela Bele, wewe ufile biakudia ne nwinyo muele mayi,[5] ubilambule Bele. Pashishe winjile tshiibi, utueku tshitampi tshia kakanu kebe.

¹²Patuikala bapingane dinda, wewe kuyi musangane Bele mudie bintu bionsu, tuetu netufue. Kadi pikalaye mubidie, Daniyele neafue, bualu mmutushiminyine bualu.

¹³Batuangaji bavua bakula ne kapeja, bualu bavua bumbula mukidi musokome muinshi mua mesa a tshilambuilu. Bavua babuelelamu misangu yonsu bua kudia bintu bivuabu batekela nwidie wabu.

¹⁴Nenku batuangaji bamane kupatuka, mukalenga kulambula nwidie biakudia. Pashishe Daniyele kutumina bena mudimu bende diyi, bua batuale butu. Babumiamine mu nzubu wa nwidie mujima. Mukalenga nkayende uvua mujadike tshivua Daniyele wenza atshi. Kujika, kupatukabu bonsu, kuinjila tshiibi, kutuabu tshitampi tshia mukalenga nkayende.[6] Pashishe kuyabu.

¹⁵Butuku, bilondeshile tshibidilu tshiabu, batuangaji kufika ne bakaji ne bana babu, kudiabu kabidi kunuabu bionsu bivua bilambula Bele.

¹⁶Mukalenga kubika dinda dionsu, kuyaye pamue ne Daniyele ku nzubu wa nwidie.

¹⁷Kuebejaye Daniyele ne: — Tshitampi tshianyi tshidi amu mumvua mutshitue anyi? Ke Daniyele ne: — Eyowa, mukalenga tshidi amu bu numvua mutshitue!

¹⁸Kadi bobu bamane kunzulula tshiibi, mukalenga utangila pa mesa, kuelaye lubila lukole ne: — Bele[7] mmunene! Udi nwidie kamuyi mpata!

¹⁹Daniyele kubanga kuseka, ukandika mukalenga bua kabuedi munda mua nzubu wa nwidie, umuambila ne: — Tangila panshi, udi mua kumanya bena makasa aa anyi?

²⁰Mukalenga kuandamuna ne: — Ndi mumone makasa a bantu balume, a bakaji ne a bana!

²¹Mukalenga kupeta tshiji, kukuatshisha batuangaji, ne bakaji babu pamue ne bana babu. Batuangaji kumuleja mukidi musokome uvuabu babuelele mu nzubu wa Bele bua kudia bivua pa mesa a milambu.

²²Mukalenga kubashipesha, kupaye Daniyele lupingu lua Bele. Yeye kuluvingutula. Kubumbulaye[8] kabidi ne nzubu wa Bele.

²³Bena Babilone bavua batendelela kabidi nyoka munene.

²⁴Mukalenga kuambila Daniyele dituku dikuabu ne: — Kuena mua kungambila ne: Nyoka wa tshidika ewu kena nwidie wa muoyi to. Udi amu ne bua kumukukuila!

²⁵Daniyele kuandamuna ne: — Nenkukuile amu Maweja-Nangila Mvidi Mukulu[9] wanyi, bualu amu yeye nkayende ke Mvidi Mukulu wa muoyi.

²⁶Kadi mukalenga wewe muanyishe, nshipe nyoka wa tshidika ewu tshiyi ne muele nansha ne mutshi ku bianza. Mukalenga kuandamuna ne: — Ndi muanyishe.

²⁷Daniyele kuangata budimbu, mafuta ne miosa kubisabisha pa kapia bionsu pamue, kubienzaye tukata, kutuelaye mukana mua nyoka. Nyoka kutumina, kutayika. Daniyele kuamba ne: — Monayi tshintu tshinudi nutendelela!

²⁸Bena Babilone kumvua lumu alu, kunyingalalabu bikole. Kudikungijabu kubengabu mukalenga, bela mbila ne: “Mukalenga mmumane kushala muena Yuda. Mmumane kubutula lupingu lua Bele, washipi Nyoka wa tshidika, wabutudi ne batuangaji!”

²⁹Pashishe kuyabu kudi mukalenga bamuambila ne: — Utupe Daniyele, wewe mubenge tudi tukushipa, wewe ne bena diku diebe bonsu.

³⁰Mukalenga umona ne: badi bamukanyina bikole, kuanyishaye mua kubapesha Daniyele mu bianza biabu.

³¹Bena Babilone kuelabu Daniyele mu tshiina tshia nyama ya ntambue.[10] Kushalaye momu matuku asambombu.

³²Mu tshiina amu muvua nyama ya ntambue muanda mutekete. Bavua bayidisha dituku dionsu, bantu babidi bashipa ne mikoku ibidi. Kadi musangu awu kabavua bayipesha kantu to; anu bua imone mua kudia Daniyele.

³³Tshikondu atshi, muambi Abakuke uvua mu ditunga dia Yuda. Uvua mulambishe musabu mu luesu, muelemu ne tupese tua mampa. Uvua ubituadila bantu bavua banowa biakudia mu madimi.

³⁴Mutumibue wa Maweja-Nangila kuambila Abakuke ne: — Utuadile Daniyele biakudia biudi nabi ebi. Yeye udi mu Babilone mu tshiina tshia nyama ya ntambue.

³⁵Abakuke kuandamuna ne: — Maweja-Nangila, tshiena muanji kutua makasa mu Babilone to, kabidi tshiena mumanye muaba udi tshiina tshia nyama ya ntambue to.

³⁶Mutumibue wa Maweja-Nangila kumubakula ku lusongu lua mutu, mumukuatshile ku nsuki, kuya nende lubilu bu lua lupepele[11] too ne ku Babilone, kumutuluila ku muelelu wa tshiina tshia nyama ya ntambue.

³⁷Abakuke kubikila: — Daniyele, Daniyele, angata biakudia bidi Mvidi Mukulu mukutumine!

³⁸Daniyele kuela lubila wamba ne: — Mvidi Mukulu wanyi, udi mumvuluke, kabidi kuena ulengulula bantu badi bakunanga![12]

³⁹Daniyele kutuadija kudia. Mutumibue wa Maweja-Nangila kupingaja kabidi diakamue Abakuke mu ditunga diende.

⁴⁰Dituku dia muanda mutekete, mukalenga kudidisha madilu a Daniyele. Ufika ku tshiina, winangila munda, kumonaye Daniyele musombe kayi upampakana.

⁴¹Mukalenga kuela lubila lukole wamba ne: — Maweja-Nangila, Mvidi Mukulu wa Daniyele, udi munene, kamuena Mvidi Mukulu mukuabu, amu wewe.[13]

⁴²Mukalenga kutumaye diyi bua bapatule Daniyele mu tshiina. Pashishe kupingajamu bavua bajingila Daniyele lufu, kubadiabu kudi nyama, mfumu mutangile.[14]