Read Tshiluba Osheya 11 Bible Online

Osheya 11 - Tshiluba bible

Osheya 11

¹Maweja-Nangila udi wamba ne: “Patshivua bena Izrayele bana batekete, meme mvua mubanange. Mvua mbabikila ne: mbana banyi. Meme kubapatula mu Ejipitu.[76]

²Kadi pamvua mbikila bena Izrayele nanku, munanukile, bavua bambenga anu kubenga.[77] Bantu banyi badi balambula mvidie Baale milambu. Mvidie yonsu ya mushindu ewu, badi bayoshila milambu.

³Kadi meme ke uvua mulongeshe bena Efrayime mua kuambula dikasa. Meme ke uvua mubambule mu maboku anyi.[78] Kadi, kabena bavuluka ne: meme ke uvua ndeji wabu to.

⁴Mvua mubaludike ne luse ne dinanga. Mvua mubambule, mudi tatu ukongoloja muanende mutekete ku ditama.[79] Mvua muiname bua kudisha bena Izrayele.

⁵Bena Izrayele, kabakupingana kabidi mu Ejipitu to. Kadi, bena Ashure nebikale bamfumu babu. Bualu, bena Izrayele bavua babenga kupingana kundi meme Maweja-Nangila.

⁶Ke mudi bena myita babuela mu bimenga bia bena Izrayele, babinyangakaja, banyangakaja kabidi bintu bionsu. Ke difutu didi bena Izrayele bapete, bua meji abu mabi.

⁷Bantu banyi bena Izrayele mbantombokele. Badi babikila mvidie Baale. Kadi mvidie ewu kena mua kubambuluisha to.[80]

⁸Nuenu bena Efrayime, tshiena mua kunutekela to. Nuenu bena Izrayele, tshiena mua kunuelela meji mabi to. Tshiena mua kunubutula, mumvua mubutule bimenga bia Adma ne Seboyime to.[81] Bualu meme muenze nanku, ndi mua kumvua bibi; nengikale ne kanyinganyinga kakole.

⁹Tshiena nnunyoka, bilondeshile tshiji tshianyi to. Tshiena mbutula bena Efrayime musangu muibidi to, bualu meme tshiena muntu, ndi Mvidi Mukulu. Nuenu bena Efrayime, numanye ne: meme Mvidi Mukulu wa tshijila ndi nenu. Tshiena musue kufika kunudi mufike munda.”

¹⁰Bena tshimuangi nebalonde Maweja-Nangila. Yeye udi udila bu nyama wa ntambue. Padiye udila, bana bende badi bafika, benda bazakala, batumina dishiya dia mayi manene.

¹¹Nebafumine kabidi ku Ejipitu bu mudi nyunyi ya mishamisha, ne ku bena Ashure, bu mudi tshisaku tshia nyunyi ya nkudimba. “Nembapingaje mu ditunga diabu.” Ke mudi Maweja-Nangila wamba nanku.