Read Tshiluba Osheya 13 Bible Online

Osheya 13 - Tshiluba bible

Osheya 13

¹Pavua bena Efrayime bakula, bantu bonsu bavua batshina. Bobu ke bavua bamfumu,[93] mu bukalenga bua bena Izrayele. Kadi, bavua benza bibi, batendelela mvidie Baale. Ke tshivua tshibafikisha ku lufu.

²Mpindiewu, monayi bena Efrayime abu, batshidi anu batungunuka ne buenzayi. mBadienzele mvidie, ne lupingu lua tshiamu tshitoke tshia mushinga mukole. Nansha mudimu ewu muenza kudi basongi ba mpingu, badi anu bamba ne: “Lambulayi mvidie ewu milambu!” Padi bantu bupukilangana ne mpingu ya tuana tua ngombe,[94] nudi mua kumvua bualu ebu anyi?

³Nanku, bena Efrayime nebajimine, bu dibungi dia mu dinda, bu lumuma ludi lujika ku bisosa, bu bisote bipepula kudi mvunda, bibuka muaba udibu bashipuila ntete, nansha bu muinshi, upatukila mu musonga wa nzubu.

⁴Maweja-Nangila udi wamba ne: Nuenu bena Izrayele, katshia nupatuka mu Ejipitu, meme ndi anu Maweja-Nangila Mvidi Mukulu wenu. Kanuena bamanye Mvidi Mukulu mukuabu, anu meme. Kakuena mupandishi mukuabu, anu meme.

⁵Meme ke uvua munulame,[95] panuvua mu tshipela, mu ditunga divua ne munanga.

⁶Panuvua bafike muaba uvua ne bisosa, nzala yenu kujika diakamue. Kadi bamane kudia buukute, ke nuenu kuditambisha.[96] Ke munuvua bampue muoyi.

⁷Nanku, meme kudienza bu nyama wa ntambue munkatshi muenu, bu nyama wa tshisumpa ntambue, tshialamine ku muelelu wa njila.

⁸Ndi nnubunda, mudi nyama wa nkashama wenza, padibu bamunyenga muana. Nennusunsule tshiadi tshienu. Nebanudie kudi mbua.[97] Nyama ya tshisuku neyisunsule bitalu bienu.

⁹Nuenu bena Izrayele, ndi mumane kunubutula. Kakutshiena udi mua kunuambuluisha.[98]

¹⁰Mukalenga wenu udi penyi? Ke yeye uvua ne bua kunusungidila! Bamfumu benu bonsu badi penyi? Ke bavua ne bua kunulombola! Nuenu ke bavua bandomba mukalenga, bandomba kabidi ne bamfumu.[99]

¹¹Meme kunupesha bakalenga, kadi ne tshiji! Bu mumvua munufikile munda, meme kununyengabu.[100]

¹²Buenzayi bua bena Efrayime, mbamane kubufunda. Bimanyinu bia bubi buabu, mbiteka muaba musunguluke.

¹³Nanku, bena Efrayime nebakenge, mudi mukaji ukenga pa kulela. Kadi, muana awu kakuledibua bimpe to. Pakumbana diba dia kumulela, neabenge kupatuka mu difu dia mamuende.

¹⁴Nanku, meme Maweja-Nangila, nempandishe bena Izrayele ku lufu anyi? Nembumushe muaba wa bafue anyi? Lufu, bukole buebe budi penyi?[101] Lufu, leja bukole buudi ushipangana nabu. Meme tshiakubafuila luse to.

¹⁵Bena Efrayime nebavulangane munkatshi mua bana babu.[102] Kadi, lupepele ludi lumisha bintu nelujuke, lufumina mu tshipela. Maweja-Nangila ke udi mutume lupepele alu. Nanku mayi a mu mpokolu neakame, mayi a mu mishimi neume, Lupepele neluambule bintu bionsu bia mushinga mukole bidi mu tshibutshilu.