Read Tshiluba Osheya 14 Bible Online

Osheya 14 - Tshiluba bible

Osheya 14

¹Nebanyoke bena Samariya[103] bua buenzayi buabu, bualu mbatombokele Mvidi Mukulu wabu. Nebafue mu myita ne bana babu, nebatundule bakaji babu badi ne mafu.

²Nuenu bena Izrayele, pinganayi kudi Maweja-Nangila Mvidi Mukulu wenu. Panudi nudishinda, ke tshipeta tshia bubi buenu.

³Pinganayi kudi Maweja-Nangila, numulomba ne: “Utufuileku luse. Wanyishe bua tukutumbishe.[104]

⁴Bena Ashure kabena mua kutupandisha to. Katuena mua kubanda kabidi, pa nyama ya tubalu tua myita to. Mpingu yetu, mbintu bivuabu basonge. Katuena mua kuyinemeka kabidi bu Mvidi Mukulu wetu to. Bualu anu wewe nkayebe, ke udi ufuila bana ba nshiya luse.”

⁵— Maweja-Nangila udi wamba ne: Meme nendongolole bena Izrayele, bua bangitabe tshiakabidi. Ki mbikole bua meme kubaleja dinanga dianyi to. Nkadi mumane kubafuila luse, tshiena nabu kabidi ne tshiji.

⁶Nengikale munkatshi mua bena Izrayele, bu lumume ludi bambuluisha buloba. Nanku, bena Izrayele nebalengele, bu tshilongu tshia nsungubidi. Nebele miji bu mitshi ya mu Lebanone.

⁷Bena Izrayele nebavulangane. Nebikale balengele bu mutshi wa olive. Nebanunke mupuya muimpe bu wa manananshi a mitshi ya mu ditu dia mu Lebanone.

⁸Bantu banyi nebapingane kundi, bua meme kubalama.[105] Nebadime, banowe ntete ya kuenza bukula. Nebalambe bu mionji ya mvinyo. Nebikale ne lumu, bu mudi maluvu mimpe a mu Lebanone.

⁹Bena Efrayime, mpingu idi inuenzela tshinyi? Meme ke udi upesha bena Efrayime bionsu bidibu balomba. Meme ke udi ubalama. Meme ndi mutshi wa siprese udi usasa[106] matuku onsu kauyi uuma to. Meme ke udi ubapesha maminu.

¹⁰Pikala muntu ne lungenyi, neumvue tshidi Osheya wamba.[107] Muntu udi ne meji, neajingulule tshidiye ulongesha. Bualu njila idi Maweja-Nangila musebele, idi anu milulame. Bantu badi bamuitaba, badi mua kuendelamu. Kadi, bantu badi bamutombokela, badi badishinda mu njila amu.