Read Tshiluba Osheya 6 Bible Online

Osheya 6 - Tshiluba bible

Osheya 6

¹Nudi nuamba ne: “Tuyayi, tupinganayi kudi Maweja-Nangila. Yeye udi mututape mputa, neatuondape kabidi. Yeye udi mutukume, neatusuike tshilamba pa mputa.

²Papita matuku abidi nansha asatu, neatufululule. Netuende ne muoyi kumpala kuende.

³Tuenzayi muetu muonsu bua kumanya Maweja-Nangila, tukumbaje bidiye musue. Difika diende ndimane kujadika, anu bu mudi butuku butshia misangu yonsu. Neafike bua kutuambuluisha, bu mudi mvula mbedi uloka, bua kutalaja buloba.”

⁴Kadi Maweja-Nangila udi unukonka ne: “Bena Efrayime, nennuenzele tshinyi? Bena Yuda, nennuenzele tshinyi? Dinnanga dienu didi dijika lukasa, bu mudi dibungi dia mu dinda, nansha bu mudi lumuma, ludi luuma amu mpindiewu.

⁵Ke pandi nnuluisha, nnutumina bambi bua banubele. Ndi nnumanyisha ne: nenubutuke. Tshindi njinga bualu buenu, tshidi patoke too bu munya.[36]

⁶Tshindi nkeba ndinanga, ki mmilambu to.[37] Ndi musue bua bantu benze tshindi njinga. Kadi, tshiena musue bua bandambule anu milambu ya nyama nansha.”

⁷Kadi, nuenu bena Izrayele, panuvua mu tshimenga tshia Adame,[38] nuvua bambenge, banyangakaje ndondu utuvua batue nenu.

⁸Ngilaade ntshimenga tshia benzedianganyi ba bibi, badi bela mashi a bantu panshi.[39]

⁹Bu mudi benzedianganyi ba bibi balamina bantu mu njila, batuangaji mbashipe bantu mu njila wa ku Shekeme.[40] Ebu bualu mbubi butambe!

¹⁰Ndi mumone malu mabi matambe mu tshisamba tshia bena Izrayele. Ditendelela dia mvidie dia bena Efrayime, ndinyange bena Izrayele bonsu.

¹¹Nuenu kabidi bena Yuda,[41] ndi nnulongoluela tshikondu tshia kunowa.