Read Tshiluba Osheya 8 Bible Online

Osheya 8 - Tshiluba bible

Osheya 8

¹Maweja-Nangila udi ungambila ne: Ela mpungi ya myita! Ela bibingu! Baluishi badi babuela mu ditunga dia Maweja-Nangila, bu nyunyi ya tshiminyi. Bualu Maweja-Nangila udi wamba ne: “Bena Izrayele mbanyange ndondu umvua mutue nabu. Kabena balonda mikenji yanyi.

²Nansha bobu balengelela, bangela mbila ne: ‘Mvidi Mukulu wetu, tuetu bena Izrayele tudi bakumanye!’

³Kadi kabena benza malu mimpe. Ke padi baluishi babipata.

⁴Bena Izrayele badi badilekela bamfumu, meme tshiyi muanyishe. Badi badisunguila babalombodi, meme tshiyi mumanye. Badi bangata tshiamu tshitoke tshia mushinga mukole ne tshia mpawungi, bua kudienzela mpingu. Badi benza nanku, badi bajimija bintu biabu.

⁵Nuenu bena Samariya, mbimpe numushe mvidie wenu wa kana ka ngombe ka tshiamu tshia mpawungi.[50] Nuenu nudi banjule tshiji. nTshikondu kaayi tshinualekela buenzayi?

⁶Mvidie ewu mmukebe tshinyi mu bena Izrayele.[51] Nsenda wenu ke udi mumufule. Eyowa, mvidie wa kana ka ngombe wa bena Samariya neatayike, bualu kena Mvidi Mukulu.

⁷Nanku, tshiudi ukuna, ke tshiudi upola. Udi ubuelakana ne mvidie ya patupu, udi udienza kabidi wa patupu. Tshikolakola katshiyi ne miepu, katshiena mua kupetesha ntete ya kuenza bukula to. Nansha yoyi mitupeshe bukula, nebabudie anu kudi bantu benyi.

⁸Bena Izrayele mbafuanangane anu ne bena bisamba bikuabu bia patupu. Munkatshi mua bisamba bikuabu badi bu luesu lubi ludi bonsu babenga.

⁹Bakuya ku bena Ashure. Nyama wa mpunde wa mu tshisuku, udi udienzela malu nkayende. Kadi bena Efrayime badi badikebela balunda, badi mua kubafikisha ku buenzayi.[52]

¹⁰Nansha bena Efrayime bapeshe bisamba bikuabu mabuejila a bungi, tshikondu tshiakumbanyi, tshia meme kubakunguja muaba umue. Nanku, matuku makese aa, nebapete dinyoka kudi mukalenga wa bena Ashure.[53]

¹¹Bena Efrayime bavua bavudije bilambuilu, kadi biobi abi bidi bibafikisha ku buenzayi bupite bungi. — Kia! Bilambuilu bidi bifikisha ku bubi! Ke bualu budi muntu mua kumvua anyi? —

¹²Nansha meme mubafundile mikenji binunu ne binunu, kabena bayangata ne mushinga to.

¹³mBasue kundambula milambu, kadi anu bua kudia minyinyi.[54] Kadi milambu ya mushindu ewu, kayena insankisha meme Maweja-Nangila to. Tshiena mpua buenzayi buabu muoyi. Nembalulule bilema biabu, nembanyoke, mbapingaje mu Ejipitu.

¹⁴Bena Efrayime mbase nzubu minene, bapue Mufuki wabu muoyi. Bena Yuda mbase bimenga bia bungi babikolesha ne bimana. Kadi meme Maweja-Nangila nengoshe bimenga abi. Kapia nekabutule nzubu yonsu mimpe ya mu bimenga abi.”