Read Tshiluba Yowele 1 Bible Online

Yowele 1 - Tshiluba bible

Yowele 1

¹Telejayi miaku ivua Maweja-Nangila mumanyishe Yowele, muana wa Petuwele.

²Nuenu bakulu, umvuayi! Nuenu bonsu badi basombe mu ditunga dia Yuda,[1] telejayi! Bualu bua mushindu ewu mbumane kuenzeka mu tshikondu tshienu, nansha tshia bankambua benu anyi?

³Nubuambile bana benu: bana benu babuambile babu bana, bua bambile ndelanganyi idi ilonda.

⁴Tshintu tshiyuabu bashiye mu madimi kudi meshi, nebatshidie kudi mpasu; tshiwa mpasu mishiye, nebatshidie kudi mintuntu; tshivua mintuntu mishiye, nebatshidie kudi mpasu ya mikumbi.[2]

⁵Nuenu bakuatshiki ba maluvu, jukayi, dilaayi! Nuenu bonsu banu ba nwinyo, asayi miadi! Bualu bishi mbimane kudia tumuma tuonsu; nanku kanuakunua kabidi nwinyo mupiamupia!

⁶Bualu tshisumbu tshia mpasu ntshibuele mu ditunga dietu. Mpasu mmipite bungi, kabayi mua kuyibala. Idi ne lukuka, ne menu bu a nyama wa ntambue, ne mbanga bu ya ntambue mukaji. Idi inyanga madimi etu a mionji ya nwinyo,

⁷ibutula mitshi yetu ya mfiku butubutuu, iyikunya, iyivula bizubu, ishiya amu ku matamba kutooka too.

⁸Asayi muadi, mudi mukaji utshidi nsongakaji wenza mu madilu, udila bayende utshivua umuselelaku!

⁹Batuangaji badi benzela Maweja-Nangila mudimu, badi badila, bualu bantu kabatshiena bafika mu nzubu wa Mvidi Mukulu, ne milambu ya ntete, nansha ya maluvu.

¹⁰Madimi mmanyangakaja, buloba mbuume. Kamutshiena ntete ya kuenza bukula, kanutshiena maluvu. Kamutshiena mafuta, nansha dimata!

¹¹Babidime badi bapampakana, bena madimi a mionji ya nwinyo badi bateketa mu maboku, bualu ntete yonsu mmijimine, bia pa madimi bionsu mbifue.

¹²Mionji ya nwinyo mmiume, mitshi ya mfiku mmifube. Mitshi yonsu ya bimuma mmishawuke. Disanka dionsu ndijike munkatshi mua bantu.

¹³Nuenu batuangaji, vualayi bilamba bia mu madilu! Nuenu badi benza mudimu ku tshilambuilu, dilayi! Nuenu bantu ba Mvidi Mukulu wetu, luayi, bungamayi butuku bujima! Bualu milambu ya ntete, nansha ya maluvu, kabatshiena bafika nayi mu nzubu wa Mvidi Mukulu.

¹⁴Nuele diyi bua bantu bajile biakudia, nubueje tshisangilu tshinene, nusangishe bakulu, ne bantu bakuabu bonsu ba mu ditunga, bafike mu nzubu wa Mvidi Mukulu wetu, bamusengelele bua atuambuluishe.

¹⁵Eyi, dituku didi dikuatshisha bowa, dituku didi Maweja-Nangila ufika munda, dikadi pabuipi.[3] Didi difika pamue ne kabutu kavua Mvidi Mukulu wa bukole buonsu mumane kujadika.

¹⁶Bu mudi biakudia bietu bijimine, katuyi mua kuenza bualu, ke mudi disanka ne musangelu biumuke mu nzubu wa Mvidi Mukulu wetu.

¹⁷Maminu mmumine mu mabuwa a buloba. Mu mayeba mudi mushale mutupu, nzubu ya kulamina biakudia mmiupuke, ntete yonsu mmijike.

¹⁸Telejayi mudi nyama itua mikemu! Bisumbu bia ngombe bidi bitambakana nseke yonsu, bualu kayena kabidi ne bisosa bia kudia. Mikoku mene idi ifua.

¹⁹Maweja-Nangila, wewe ke undi mbikila! Kapia nkoshe bisosa bia mu mpata, ndimi ya kapia mmidie mitshi yonsu ya mu madimi.

²⁰Nyama ya tshisuku idi ikudidila, bualu misulu ya mayi mmikame. Kapia nkashidishe bisosa bia mu mpata.