Read Tshiluba Yowele 2 Bible Online

Yowele 2 - Tshiluba bible

Yowele 2

¹Elayi mpungi mu Siyone, elayi mbila pa mukuna wa tshijila wa Mvidi Mukulu! Nuenu bonsu bena ditunga, nuzakale, bualu dituku didi Maweja-Nangila ufika munda dikadi pabuipi.[4]

²Dituku adi ndia miidima mikole, ndia mavuba ne mabungi. Tshisumbu tshia mpasu tshidi tshifika, tshinene, tshikuatshisha bowa![5] Tshidi tshifikisha panshi, bu mudi butuku bufikisha pa mikuna. Katshia kabena banji kumona bualu bua mushindu ewu, kabena mua kubumona kabidi to.

³Mpasu eyi idi ibutula bionsu, bidi kumpala ne bidi kunyima kuayi, bu mudi kapia kabutula, kashidisha. Pavua mpasu eyi kayiyi mianji kufika, buloba buvua bu lupangu lua Edene.[6] Kadi mpindiewu budi tshipela. Kayena mishiye tshintu nansha tshimue.

⁴Idi imueneka bu nyama ya tubalu, inyema lubilu bu mudi babandi ba pa tubalu baya mu mvita.

⁵Idi itupika ku mukuna, iya ku munga, yela tshiona bu tshia matempu a mvita, bu tshia kapia kadi kosha bisosa biume. Idi bu tshiluilu tshikole, tshidi tshiela mualu wa mvita.

⁶Padiyi isemena pabuipi, bantu bonsu badi bazakala, mpala yabu idi itokoloka.

⁷Idi inyema bu bilobu, ibanda pa tshimana mudi bena mvita benza. Mpasu yonsu udi uya buludi mu wende njila, kakuena udi usesuka.

⁸Kakuena nansha umue udi usakila mukuabu. Yonsu udi ulonda wende njila. Idi ipita bionsu bidibu bayijikila mu njila. Kakuena tshintu tshidi mua kuyimanyika.

⁹Idi itangalaka mu tshimenga, ibanda pa bimana, ibuelela mu nzubu ku madidishi bu bivi.

¹⁰Padi mpasu eyi isemena pabuipi, buloba budi buzakala, diulu didi dinyungakana, ngondu ne diba bidi bibuitshidila, mitotu kayena ikenka kabidi.

¹¹Maweja-Nangila udi wakula utantamana, ulombola bena mvita bende. Badi tshisumbu tshinene, batumikila diyi diende, kabayi ne udi mua kuambangana nabu. Dituku dia Maweja-Nangila, ndikuatshishe bantu bowa. Washala ne muoyi nnganyi?

¹²Maweja-Nangila udi wamba ne: “Patshidiku diba, pinganayi mpindiewu kundi, ne muoyi wenu mujima. Nujile biakudia, nudile muadi, nuntendelele!

¹³Pandayi mioyi yenu, kanupandi bilamba.” Eyowa, nupingane kudi Maweja-Nangila Mvidi Mukulu wenu. Udi ununanga, unufuila luse, udi ne lutulu lua bungi, udi wenzela bantu bimpe kayi upungila, ujinga amu kulengulula bivuaye ukanyina nabi bantu.

¹⁴Misangu mikuabu udi mua kushintulula meji adiye nawu, kunusankisha pa mutu pa kunukengesha. Diba adi, nudi mua kumutuadila milambu, ya ntete, ne ya maluvu.

¹⁵Elayi mpungi mu Siyone, nuele diyi bua bantu bajile biakudia, nubueje tshisangilu tshinene.

¹⁶Nusangishe bantu, babuele bonsu muaba wa tshijila! Nusangishe bakulumpe ne bana, too ne batshidi bamua dibela. Nanku batshidi babueleleku mu dibaka, bapatuke mu nzubu yabu, basangile pamue ne bakuabu.

¹⁷Batuangaji, badi bakuatshila Maweja-Nangila mudimu, badidile muadi mu nzubu wa Mvidi Mukulu, pankatshi pa tshibuelelu ne tshilambuilu, basengelele Mvidi Mukulu, bamuambile ne: “Maweja-Nangila, utufuile luse, tudi bantu bebe, kutufuishishi bundu, kuanyishi bua bantu batuseke, batukonke ne: ‘Tshidi Mvidi Mukulu wabu ubenzela ntshinyi?’ ”

¹⁸Maweja-Nangila mmunange ditunga diende, mmufuile bantu bende luse.

¹⁹Udi ubenzela bidibu bamulomba, ubalaya ne: “Nennutumine tshiakabidi ntete ya kuenza bukula, maluvu ne mafuta. Nenuhidie nukute! Tshiena nnufuisha kabidi bundu, munkatshi mua bisamba bia bende.

²⁰Baluishi benu badi batumina ku mutu kua ditunga, nembipate mutantshi mule, ku maloba a bipela ne minanga. Nengimanshe bena mvita babu badi benda kumpala mu Mayi manene a luepu; badi kunyima nembimanshe mu Mayi manene a pankatshi. Bitalu biabu nebinunke bibi, bantu kabayi mua kueyela bimpe. Nanku bantu bonsu bawa bakuenzela malu mabi mapite, nebajimine.

²¹Wewe buloba, kutshinyi kabidi, usanke, bualu Maweja-Nangila udi wenza malu manene.

²²Nuenu, nyama ya mu tshisuku, kanutshinyi kabidi, bualu bisosa bia mu mpata mbisampile, mitshi mmikuame bimuma, mitshi ya mfiku ne mionji ya mvinyo mmikuame bipite bungi.

²³Nuenu badi basomba mu Siyone, sankayi bualu bua Maweja-Nangila Mvidi Mukulu wenu, udi unulokeshila mvula mbedi unuvua nukengela, unulokeshila mvula ya bungi pa bikondu biayi, muvuaye munuenzele kale.

²⁴Mayeba neuwule tente ne ntete; mvinyo ne mafuta nebiuwule mu bipanza.”

²⁵Maweja-Nangila udi wamba ne: “Nennupingajile bintu bienu, biwabu badie kudi meshi, mintuntu, ne mpasu ya mikumbi, bimvua munutumine bisumbu ne bisumbu bua kunukengesha.[7]

²⁶Nenudie, nenukute. Nenuntumbishe meme Maweja-Nangila Mvidi Mukulu wenu, udi unuenzela malu a kukema. Tshiena mua kufuisha bantu banyi bundu kabidi musangu nansha umue.

²⁷Nanku, nuenu bena Izrayele, nenumanye ne: ndi munkatshi muenu. Maweja-Nangila Mvidi Mukulu wenu mmeme, kakuena mukuabu. Tshiena mua kufuisha bantu banyi bundu kabidi musangu nansha umue.”