Read Tshiluba Amosa 2 Bible Online

Amosa 2 - Tshiluba bible

Amosa 2

¹Teleja tshidi Maweja-Nangila wamba ne: “Ndi ndumbuluisha bena Mowabe, mbapisha bua malu mabi mavule, kadi nangananga, bualu bakosha mifuba ya mukalenga wa bena Edome, bua kuenza nayi lupemba.[12] Nanku tshiena mua kubafuila luse! Nenkumbaje bindi mujadike ne:

²Nengoshe ditunga dia Mowabe. Kapia nekashidishe nzubu mimpe, idi mu tshimenga tshia Keriyote.[13] Bena Mowabe nebabutuke mu tshimvundu tshia mvita. Baluishi babu nebele mbila, nebadidishe mpungi.

³Nenshipeshe mukalenga wabu, nemfuishe bamfumu bende bonsu musangu umue. Meme Maweja-Nangila ndi njadika nanku.”

⁴Teleja tshidi Maweja-Nangila wamba ne: “Ndi ndumbuluisha bena Yuda, mbapisha bua malu mabi mavule, kadi nangananga, bualu mbalengulule malu onsu amvua mubamanyishe. Mbadiate mikenji yanyi ku makasa. Bavua bapambuka mu njila, batendelela mvidie, ivua bankambua babu mene bakukuila. Nanku tshiena mua kubafuila luse! Nenkumbaje bindi mujadike ne:

⁵Nengoshe ditunga dia bena Yuda. Kapia nekashidishe nzubu milenga idi mu Yerushalayime.”

⁶Teleja tshidi Maweja-Nangila wamba ne: “Ndi ndumbuluisha bena Izrayele, mbapisha bua malu mabi mavule. Nanku tshiena mbafuila luse. Nenkumbaje bindi mujadike. Ndi mbapisha, nangananga bualu mbasumbishe mu bupika[14] muntu uvua kayi ne bualu, bua bamone mua kufuta mabanza. Mbapane mupele, uvua kayi mua kufuta dibanza diende, amu dia mukolu wa bisabata.

⁷Badi badiata ku makasa badi kabayi ne bukole. Ku kabadi badi banyanga tshilumbu tshia mupele udi kayi ne kantu ku bianza. Tatu ne muanende wa balume, badi benza malu a buendenda mu bulalu bumue ne nsongakaji mupika wa momumue. Ke mudibu banyanga dina dianyi dia tshijila.[15]

⁸Bilamba bivua bapele bafila bu tshieya,[16] badi babiadija panshi, balalapu miaba yonsu idibu batendelela mvidie. Mu nzubu ya mvidie yabu ayi, badi banuinamu maluvu, avuabu banyenge bantu ku bukole.

⁹Kadi meme mvua munubutuile bena Amore. Bavua bantu bale, bu mitshi ya sedre, bakole bu mitshi ya nsanga. Ke meme kukosa nsongu yayi, kuyijula ne miji yayi.[17]

¹⁰Nkavua mudianjile kunupatula mu Ejipitu, meme kuenda nenu mu tshipela bidimu makumi anayi, meme kunuludika bimpe, kunufikisha mu ditunga dia bena Amore bua nudikuate.

¹¹Pashishe meme kusungula bana benu ba balume, bua bangenzele mudimu wa buambi. Meme kubikila bansongalume benu, bua benze dilaya, badijidile kundi.[18] Bena Izrayele, mmomu anyi ki mmomu?

¹²Kadi bantu banyi ba tshijila, nuenu kubanuisha maluvu. Nuenu kukandika bambi bua kabambidi bantu malu mu dina dianyi.

¹³Nennutekakaje[19] mudi ditempu ditenkakana, divuabu buwuje ne miepu, bapitshisha.

¹⁴Nansha muntu ne lubilu lukole, muaba wa kunyemena, kakuufika. Nansha tshilobu mene katshiakupeta bukole. Bena mvita ba bukitu kabakudisungidila ku lufu.

¹⁵Muena buta bua mikete, kakutua mukolu panshi. Udi ne lubilu lupite, kakupanda to. Nansha udi ubanda pa nyama wa kabalu, kakunyema nansha.

¹⁶Nansha bena bukitu ba muoyi mukole, nebanyeme bamane kuimansha bia mvita. Meme Maweja-Nangila ndi njadika nanku.”