Read Tshiluba Amosa 7 Bible Online

Amosa 7 - Tshiluba bible

Amosa 7

¹Teleja bivua Maweja-Nangila Mvidi Mukulu mundeje: meme kumona muvuaye mufuke mpasu mipite bungi. Bantu bakavua bamane kunowa bidibu ne bua kulambula mukalenga wa ditunga. Bisosa bi-kavua bituadija kutoloka tshiakabidi.

²Ke mpasu kudia bisosa ne bisaala bionsu bivua mu ditunga. Nanku meme kuamba ne: “Maweja-Nangila Mvidi Mukulu, ndi nkusengelela: fuila bantu bebe luse. Tshianana, nebashale ne muoyi bishi? Bualu badi amu bakese, batekete kabidi.”

³Ke Maweja-Nangila kubafuila luse, wamba ne: “Mbimpe, biudi mumone kabiakuenzeka nansha!”

⁴Ke Maweja-Nangila Mvidi Mukulu kundeja bualu bukuabu: kubikilaye kapia kakole bua kanyoke bantu. Kapia kukamisha mayi onsu, nansha a muinshi mua buloba. Kakavua kashidisha ditunga dia bena Izrayele.

⁵Ke meme kuamba ne: “Maweja-Nangila Mvidi Mukulu, ndi nkutendakena ne: lekela kuenza nanku. Tshianana, bantu bebe nebashale ne muoyi bishi? Badi anu bakese, batekete kabidi!”

⁶Ke Maweja-Nangila kubafuila luse, wamba ne: “Mbimpe, biudi mumone kabiakuenzeka nansha!”

⁷Maweja-Nangila kundeja kabidi bualu ebu: Yeye mene uvua muimane pa tshimana,[43] ne nshinga wa kuludika nende mu bianza.

⁸Kunkonkaye ne: — Amosa tshiudi umona ntshinyi? Ke meme kuandamuna ne: — Ndi mmona nshinga wa kuludika nende. Ke Maweja-Nangila kungambila ne: — Eyowa, ndi ndembeleja nshinga ewu munkathi mua bantu banyi, bua mmone ne: badi bantu balulame anyi? Tshiena musue bua basendame nansha kakese.

⁹Nennyangakaje miaba yonsu ivua ndelanganyi ya Izrayele itendelela. Miaba ya tshijila ya Izrayele neishale makolu. Nenduishe ne mvita bena diku dia Yerobowame.[44]

¹⁰Amashiya, mutuangaji wa mu Betele, kumanyisha Yerobowame, mukalenga wa Izrayele, ne: “Amosa mmukuelele tshifufu tshibi munkatshi mua bena Izrayele. Bidiye wamba, bidi mua kunyanga ditunga.

¹¹Umvua miaku yende: Yerobowame, nebamushipe ku muele! Bena Izrayele, nebaye nabu ku bupika, mutantshi mule ne ditunga diabu.”

¹²Ke Amashiya kuambila Amosa ne: — Mumonyi wa malu, umuangale muaba ewu, upingane kuenu mu bukalenga bua Yuda. Ulongeshe bana benu! Nebakudishe ne disanka!

¹³Kadi kumueneki kabidi muetu munu mu Betele, bualu ke muaba udi mukalenga wa ditunga utendelela, ke nzubu wa tshijila wa bukalenga.

¹⁴Ke Amosa kuandamuna Amashiya ne: — Tshiena muambi udibu bafuta nansha. Tshiena muntu uvua mu tshisumbu tshia bambi. Nyama indi mumune, ne bimuma bia mfiku[45] bindi mpeta ku mitshi yanyi, ke bivua bindisha!

¹⁵Kadi Maweja-Nangila kungumusha ku mudimu wa kumuna nyama yanyi, kuntuma bua kuambila bantu bende, bena Izrayele, malu mu dina diende.

¹⁶Kadi wewe, Amashiya, udi musue kunkandika mudimu wa muambi undi ngenzela bena Izrayele. Udi musue bua ndekele biakulakula, muudi ubiamba, bindi mbela nabi ndelanganyi ya Izake. Nanku, teleja bidi Maweja-Nangila ukuambila ne:

¹⁷“Mukajebe neenze mudimu wa ndumba mu tshimenga tshienu etshi. Bana bebe ba balume ne ba bakaji, nebabashipe mu mvita. Bantu bakuabu nebabanyangane mpangu ne madimi biudi nabi. Wewe mene neufuile kua bende, mu buloba budi ne mikiya. Bena Izrayele, nebaye nabu ku bupika, mutantshi mule ne diabu ditunga.”