Read Tshiluba Amosa 9 Bible Online

Amosa 9 - Tshiluba bible

Amosa 9

¹Meme kumona Maweja-Nangila muimane pa tshilambuilu. Uvua wela mbila ne: “Tuuta ku mitu ya makunji, bua nzubu mujima anyungakane ne ku tshitaku. Tshibula makunji, azaze mitu ya bonsu.[50] Badi bashala ne muoyi, nembashipeshe ku muele wa mvita. Muntu nansha umue kakunyema, kakupanduka ku lufu.

²Nansha bimba tshina, babuela mu kandondu ka bafue, nembakuatemu, mbapatulamu. Nansha babanda mu diulu, nembakulule, mbapuekeshe panshi.

³Nansha baye kusokoma pa mukuna wa Karmele, nembasanganemu, mbakuata. Nansha baye kubutama muinshi mua mayi manene bua tshiyi mbamona kabidi, nembatumine nyoka munene wa mu mayi, aye kubasuma muine amu.

⁴Padi baluishi babu babakuata, baya nabu kuabu kule, mu bupika, nentume diyi bua babashipe kuine aku. Nembabambishe miaba yonsu, ki mbua kubambuluisha nansha, kadi bua kubabutula.”

⁵Maweja-Nangila Mvidi Mukulu wa bukole buonsu, udi ulenga buloba amu ne munu, bukadi buzakala, bukadi bubanda, bupueka, bu mayi mu musulu wa Nile,[51] bonsu badi basombamu badila muadi.

⁶Mvidi Mukulu mmuibake nzubu yende mu diulu, mmubuikile buloba ne tshibuashibuashi. Mmubikile mayi, apatuke mu mayi manene, bua aatangalaje pa buloba. Dina diende ke Maweja-Nangila.

⁷Maweja-Nangila udi wamba ne: “Bena Izrayele, nudi nuela meji ne: mushinga wenu ku mesu anyi, udi upita wa bena Kushe anyi? Nudi nuamba bimpe ne: ndi munupatule mu Ejipitu! Kadi bena Peleshete tshiena mubapatule mu Kaftore, ne bena Arame mu Kire[52] anyi?”

⁸Maweja-Nangila Mvidi Mukulu udi utentekela ditunga dia Izrayele, didibu baludika kudi bakalenga bena tshibawu. Udi wamba ne: “Nengumushe bukalenga ebu pa buloba. Kadi tshiena musue kubutula ndelanganyi yonsu ya Yakobe nansha.

⁹Mpindiewu ndi ntuma diyi: batangalaje bena Izrayele munkatshi mua bisamba bikuabu, bua kubasenga, mudibu basenga ntete, nsoka yonsu mishale mu munyingu.[53]

¹⁰Munkatshi mua bantu banyi, mvita neishipe bonsu badi bena tshibawu, badi baditemba, bambila muambi ne: Mvidi Mukulu kakututumina makenga audi utukanyina nawu nansha!”

¹¹Maweja-Nangila udi wamba ne: “Tshimenga tshia Davide,[54] tshidi bu nzubu mumane kupuka. Kadi dituku dikuabu, nengasulule tshimenga. Nengibakulule bitupa bia tshimana tshiatshi, bivuabu bashimbule mu mvita. Nendongolole nzubu yonsu bimpe, tshimenga tshipete lumu luatshi lua kale.

¹²Diba adi, bena Izrayele nebakuate tshiakabidi matunga, avua anyi ku kale, a bena Edome, ne a bena bisamba bikuabu. Meme Maweja-Nangila ndi njadika nanku. Nenkumbaje kabidi bindi ngamba.”

¹³Maweja-Nangila udi wamba kabidi ne: “Matuku adi kumpala, ntete neimene, ibobe lukasa, babidime ne banowi balondangane lukasa. Amu bamane kumiamina ntete, nebapole tumuma tua mvinyo, bua kukama maluvu,[55] Diba adi maluvu neavulangane, apueka mu bibandabanda, abolesha mikuna yonsu.

¹⁴Nempingaje bantu banyi kuabu. Nebasulule bimenga bivuabu banyange. Nebasombemu, bavulangana. Nebakune mionji ya mvinyo, banua maluvu a ku madimi abu. Nebakune mitshi ya bimuma, badia bimuma biayi.

¹⁵Nenjamije bantu banyi, mu buloba budi buabu. Kabena mua kubipata kabidi, mu buloba bundi mbapingajila. Meme Maweja-Nangila Mvidi Mukulu wenu ndi nnumanyisha nanku.”