Read Tshiluba Obadya 1 Bible Online

Obadya 1 - Tshiluba bible

Obadya 1

¹Telejayi bivua Maweja-Nangila Mvidi Mukulu mumanyishe Obadya, bua kukanyina bena Edome.[1] Maweja-Nangila kutuma muntu ne mukenji, kudi bantu ba bisamba bikuabu. Tuetu kumvua muntu awu wamba ne: “Jukayi, tuye kuluisha bena Edome.”

²Maweja-Nangila udi wambila bena Edome ne: “Ku bisamba bionsu nuenu nenuikale tshisamba tshidi katshiyi ne bukole. Bantu bonsu nebanupetule.

³Nudi nuditambisha, kadi nudi nudidinga. Nudi basombe pa mikuna mu mabue, miaba idi bantu kabayi mua kufika.[2] Nudi nudiamba ne: ‘Nganyi watupatula? Nganyi watusakila panshi?’

⁴Nansha nuenu banangapale mulu bu nyunyi ya tshiminyi, nansha nuenu bibakile disua dienu munkatshi mua mitotu, nennukulule. Meme Maweja-Nangila, ndi ngamba nanku.

⁵Pikala bivi anyi bapawudi ba bintu bafike ku nzubu kuebe butuku, nebangate bionsu bidibu mua kuya nabi. Kuakushala ne tshintu to![3] Pikala banowi bafike mu budimi buebe bua nwinyo, kabakushiya bintu bia kupumbulula to.

⁶Eyi, nuenu ndelanganyi ya Esawu,[4] bintu bienu bionsu nebabipawule, nansha biuma bienu binuvua basokoke, nebabipete baye nabi.

⁷Bonsu banuvua batue nabu ndondu, mbanubenge. Badi banuipata mu ditunga dienu. Bavua balunda benu, badi banukuate ku bupika. Banuvua nudia nabu ku mesa, badi banuteya. Badi banuamba ne: ‘mBantu batatakane!’

⁸Nanku meme Maweja-Nangila ndi ngamba ne: Dituku dingafika munda, nembutule bena meji badi mu Edome. Tshiena nshiya muena lungenyi nansha umue, pa mikuna ya Esawu.

⁹Wewe tshimenga tshia Temane,[5] bilobu biebe bia myita nebikuatshike bowa. Bena myita ba mu ditunga diebe, nebabashipe bonsu.

¹⁰“Nuvua baluishe bana benu, ndelanganyi ya Yakobe[6] babashipe, bapawule bintu biabu. Nanku bundu nebunukuate. Nebanubutule kashidi.

¹¹Nuvua bamone, muvua baluishi batshimuna bana benu, babuela mu tshimenga tshiabu. Pavua baluishi batshinka, babanyangana bubanji bua mu Yerushalayime, nuenu kabidi nuvua benza momumue.

¹²Nuenu bena Edome, kanuvua mua kusanka, pavua bana benu bena Yuda mu dikenga. Kanuvua mua kuseka, pavuabu bababutula. Kanutua mua kubapenda, pavuabu bapampakana.

¹³Kanuvua mua kubuela mu tshimenga tshia bantu banyi, pavuabu batshibutula. Kanuvua mua kutangila, kusanka, pavua makenga mabakuate. Kanuvua mua kunyenga bubanji buabu, pavua baluishi babapawula.

¹⁴Dituku edi dia dikenga, kanuvua mua kujika masangu a njila, kualamina bavua banyema, kubashipa, kukuata bakuabu, kubafila kudi baluishi.

¹⁵Bualu dituku, dindi meme Maweja-Nangila ndumbuluisha bantu bonsu, dikadi pa buipi. Nanku nebanuenzele bionsu binuvua benzele bantu bakuabu. Bubi buenu nebunupinganyine.

¹⁶“Nuenu bena Izrayele, mvua mununyoke, pa mukuna wanyi wa tshijila, mununuishe dikopu dia tshiji tshianyi.[7] Nanku bisamba bikuabu, nembinuishe kabidi dikopu adi. Nebikenge anu kukenga, too ne muabutukabi butubutuu.

¹⁷Nanku bantu badi bashala ne muoyi, nebasombe mu Siyone. Mukuna wanyi awu newikale tshiakabidi wa tshijila. Ndelanganyi ya Yakobe, neyipingane mu ditunga diayi, divuabu babanyenge.[8]

¹⁸Ndelanganyi ya Yakobe ne ya Yozefe neyikale bu kapia. Neyoshe ndelanganyi ya Esawu,[9] bu mudibu bosha bisosa. Nebababutule bonsu, kakuyi muntu ushala ne muoyi. Meme Maweja-Nangila, ndi ngamba nanku.”

¹⁹Bena Yuda badi basombele kuinshi mu ditunga, nebakuate ditunga dia mikuna dia bena Edome. Badi luseke ludi diba dibuelela, nebakuate ditunga dia bena Peleshete. Bena Izrayele nebakuate ditunga dia bena Efrayime, ne tshimenga tshia Samariya. Bena Binyamine nebakuate ditunga dia Ngilaade.[10]

²⁰Bena Izrayele ba ku mutu wa ditunga bayua bumuke mu bupika, bungi bu tshiluilu tshia bushiwa, nebakuate ditunga dia Fenisiya too ne tshimenga tshia Sarepta. Bena Yerushalayime bavua mu bupika mu Sefarade, nebakuate bimenga bia kuinshi mu ditunga.[11]

²¹Bobu bamane kutshimuna, nebabande pa mukuna wa Siyone, bua kuikalabu bamfumu ba bena Edome. Ke mudi Maweja-Nangila ujadika bumfumu buende nanku.