Read Tshiluba Yona 1 Bible Online

Yona 1 - Tshiluba bible

Yona 1

¹Dituku dikuabu, Maweja-Nangila kuambila Yona, muana wa Amitayi,[1] ne:

²— Juka, uye mu tshimenga tshinene tshia Ninive.[2] Ukanyine bena tshimenga atshi mu dina dianyi, bualu tshiena musue kumona kabidi buenzayi bua bantu abu.

³Kadi Yona kujuka bua kuya ku Tarshishe, unyema Maweja-Nangila. Ufika ku Yafa,[3] kusanganaye buatu buvua pamue ne kuya ku Tarshishe. Nanku, kufutaye, kubuela mu buatu bua kuya ku ditunga adi, unyema Maweja-Nangila.

⁴Kadi Maweja-Nangila kutuma tshipepele tshikole pa mayi manene. Mavuala makole kujuka. Buatu buvua pamue ne kupandika.

⁵Nanku, bitshi ba buatu kukuatshika bowa bukole. Muntu yonsu uvua ulomba wende nwidie, wela mbila, bua tshipepele tshibutame. Pashishe kuimanshabu bintu bionsu bivua mu buatu mu mayi manene, bua buatu bupepele. Kadi Yona uvua anu mulale tulu tukole mu bibeya bia muinshi mua buatu.

⁶Nanku, mulombodi wa bitshi ba buatu kusangana Yona mulale tulu, kumukonkaye ne: — Udi wenza tshinyi? Udi amu mulale tulu? Juka, ulombe webe nwidie, bumue udi mua kutuambuluisha, tupanduke ku tshipepele etshi!

⁷Pashishe, bitshi ba buatu kuambilangana ne: — Tutshinkayi, bua kujadika muntu udi mudikebele dikenga edi. Bobu kutshinka, kupeta Yona.

⁸Kumuambilabu ne: — Udi mudikebele diakabi! Utumvuije mudi luendu luebe! Udi ufuma penyi? Udi wa mu ditunga kaayi? Udi muena tshisamba kaayi?

⁹Yona kubandamuna ne: — Ndi muena Ebrewu, ndi nnemeka Maweja-Nangila, Mvidi Mukulu wa mu diulu, uvua mufuke mayi manene, ne buloba.

¹⁰Yona kubajadikila kabidi ne: ndi nnyema Maweja-Nangila. Biitshi ba buatu bumvua nanku, kukuatshikabu bowa. Ke kukonkabu Yona ne: — Udi unyema Maweja-Nangila bua tshinyi?

¹¹Tuenze nebe tshinyi, bua mavuala abatame, tupete dikisha! Bualu mayi atshivua ela amu kuela mavuala.

¹²Yona kubambila ne: — Nsakilayi mu mayi, bua mavuala abatame. Ndi mumanye ne: bua bubi buanyi ke budi tshipepele etshi tshikole tshinukuata.

¹³Kadi, bitshi ba buatu bavua anu bita muabu muonsu, bakeba kufika ku dilobu. Kadi kabavua bakumbaja bualu to. Bualu mavuala avua enda apita bukole.

¹⁴Pashishe, bitshi ba buatu kutendelela Maweja-Nangila, bela mbila ne: — Eyi, Maweja-Nangila kutushipeshi bualu bua muntu ewu to. Kavua mutuenzele bibi. Kadi kuteki lufu luende pambidi petu. Wewe udi Maweja-Nangila. Tshiudi musue ke tshiudi ukumbaja.

¹⁵Pashishe bobu kusakila Yona mu mayi. Diakamue mayi kubutama.

¹⁶Biitshi ba buatu bamone nanku, kutshinabu Maweja-Nangila bikole. Kumulambulabu nyama. Kumulayabu mua kumuenzela mudimu.