Read Tshiluba Yona 4 Bible Online

Yona 4 - Tshiluba bible

Yona 4

¹Yona umona nanku, kufikaye munda bikole menemene.

²Kuambilaye Maweja-Nangila ne: — Kia! Maweja-Nangila, ke tshimvua ntshina etshi, pamvua kuetu. Ke mumvua munyeme bua kuya ku Tarshishe. Mvua mumane kumanya bimpe ne: wewe udi Mvidi Mukulu wa luse ne dinanga. Udi muena lutulu. Dinanga diebe kadiena ne ndekelu. Udi amu musue kulekela kukumbaja biuvua mukanyine nabi bantu.

³Maweja-Nangila, mpindiewu ndi nkusengelela ne: ungumushe panu. Bualu mbimpe meme kufua pamutu pa kushala ne muoyi.

⁴Maweja-Nangila kukonka Yona ne: — Udi ufika munda pa bualu anyi?

⁵Yona kusunuka mu tshimenga, kuya kusomba luseke ludi diba dipatukila luatshi. Kuasaye kazubu kakese ka kuikishila, bua kubandila bionsu bivua mua kuenzeka mu tshimenga.

⁶Mvidi Mukulu Maweja-Nangila kumenesha mutshi uvua ubanda bikole, bua Yona amone mua kusomba mu dileji diawu, kupua muoyi ku kanyinganyinga kavuaye naku. Yona kusanka bikole bua mutshi awu.

⁷Butshia dinda, pa kabundubundu, Mvidi Mukulu kutuma tshishi. Kudiatshi mutshi awu, mutshi kufuba.

⁸Diba dimane kubanda, Mvidi Mukulu kutuma lupepele lua luya, lufumine ku luseke ludi diba dipatukila.[8] Kupulalu mutshi awu. Munya mukole kuosha Yona mu mutu. Kusuaye kufua tshipuka. Nanku Yona kujinga lufu, wamba ne: “Mbimpe meme kufua pa mutu pa kushala ne muoyi.”

⁹Mvidi Mukulu kukonka kabidi Yona ne: — Udi ufika munda bua mutshi ewu, pa bualu anyi? Yona kuandamuna ne: — Eyowa, ndi mufike munda pa bualu, ndi mua kufua mene.

¹⁰Maweja-Nangila kukonka Yona ne: — Telejaku. Wewe kuena mukune mutshi awu, kuena muubandishe, kuena munkuatshile mudimu. Mutshi ewu mmutoloke butuku, butshia dinda kupukawu. Kadi udi amu unyingalala bualu buawu.

¹¹Nanku, meme tshiena mua kufuila tshimenga tshinene tshia Ninive luse anyi? Mu tshimenga emu mudi bantu bapite pa binunu lukama ne makumi abidi, badi kabayi bamanye mua kudisunguluila bidi bibalengelela,[9] mudi kabidi bimuna bipite bungi.