Read Tshiluba Dibadika 10 Bible Online

Dibadika 10 - Tshiluba bible

Dibadika 10

¹Maweja-Nangila kuambila Moshe ne:

²— Wenzeje mpungi ibidi ya tshiamu tshitoke tshia mushinga mukole bua kubikila nayi bantu, nansha bua kubamanyisha diba didi tshiluilu[31] tshionsu mua kubanga luendu.

³Pelabu mpungi ayi ibidi musangu umue, bantu bonsu basemene pabuipi nebe mu mushiku wa ntenta wa kusambakena.

⁴Pelabu amu mpungi umue, bamfumu ba bisamba bia bena Izrayele nkayabu nebasemene pabuipi nebe.

⁵Pelabu mpungi ne bibingu musangu umue, ntshimanyinu tshia kutuadija luendu. Musangu wa kumpala udibu bela mpungi nanku, bena Izrayele badi basombe luseke ludi diba dipatukila lua ntenta wa kusambakena nebatuadije luendu.

⁶Musangu muibidi udibu bela mpungi ne bibingu, bena Izrayele badi basombe luseke lua kuinshi kua ntenta wa kusambakena, nebatuadije luendu.[32]

⁷Kadi, bua kubikila bena Izrayele bonsu muaba umue, bele amu mpungi kukuyi bibingu.

⁸“Badi mua kuela mpungi anu kudi batuangaji, bantu ba ku ndelanganyi ya Arone. Ke mikenji inudi ne bua kulama nuenu, ne ndelanganyi yenu kashidi.

⁹“Panudi nuya ku mvita mu ditunga dienu bua kuluisha bena lukuna benu, nuele mpungi ne bibingu bia mvita musangu umue. Nanku, Meme Maweja-Nangila Mvidi Mukulu wenu nennuvuluke. Nennusungidile mu bianza bia baluishi benu.

¹⁰Panudi nuenza tshibilu dituku dia kumpala dia ngondu yonsu, nansha tshibilu tshia mushindu mukuabu, nenuele mpungi diba didibu bandambula milambu ya kuosha, nansha milambu ya bobumue. Nanku, nennuvuluke. Meme ndi Maweja-Nangila Mvidi Mukulu wenu.”

¹¹Matuku makumi abidi a ngondu muibidi wa tshidimu tshivua tshilonda tshidimu tshivua bena Izrayele bapatuke mu Ejipitu, divuba kubanda mulu ku ntenta wa kusambakena, uvua ne mushete wa ndondu.[33]

¹²Bena Izrayele kubanga luendu, kumuka ku tshipela tshia Sinayi. Divuba kuimana, kutuluka mu tshipela tshia Parane.

¹³Ke musangu wa kumpala uvua bena Izrayele bamuangala mushindu uvua Maweja-Nangila muambile Moshe.[34]

¹⁴Tshiluilu tshivua ku diyi dia tshisamba tshia Yuda kupita kumpala, bena mvita bambule dibendela diabu. Nashone, muana wa Aminadabe, ke uvua ulombola bena Yuda.

¹⁵Bena tshisamba tshia Isakare kulonda, babalombola kudi Netaneyele, muana wa Shuware.

¹⁶Pashishe kulondabu kudi bena tshisamba tshia Zebulone, babalombola kudi Eliyabe, muana wa Elone.

¹⁷Kutulabu ntenta wa kusambakena, kumuambulabu kudi bena diku dia Ngershone ne dia Merari. Kubangabu luendu.

¹⁸Pashishe tshiluilu tshivua ku diyi dia tshisamba tshia Rubene kubanga luendu, bena mvita bambula dibendela diabu. Elishure, muana wa Shedeyure, ke uvua ulombola bena Rubene.

¹⁹Bena tshisamba tshia Shimeyone kulonda, babalombola kudi Shelumiyele, muana wa Surishadayi.

²⁰Bena tshisamba tshia Ngade kulonda, babalombola kudi Eliyasafe, muana wa Deyuwele.

²¹Bena tshisamba tshia Levi ba ku ndelanganyi ya Kekate bavua bambule bintu bia tshijila menemene. Kulondabu ne bintu abi. Bualu bena Levi bakuabu bavua ne bua kuasa nzubu wa tshijila, bena Kehate kabayi banji kufika.

²²Pashishe tshiluilu tshivua ku diyi dia tshisamba tshia Efrayime kubanga luendu, bena mvita bambula dibendela diabu. Elishama, muana wa Amikude, ke uvua ulombola bena Efrayime.

²³Bena tshisamba tshia Menashe kulonda, babalombola kudi Ngameliyele, muana wa Pedashure.

²⁴Bena tshisamba tshia Binyamine kulonda, babalombola kudi Abidane, muana wa Ngideyoni.

²⁵Tshiluilu tshivua ku diyi dia tshisamba tshia Dane kulonda muaba wa ndekelu, bena mvita bambula dibendela diabu. Akiyezere, muana wa Amishadayi, ke uvua ulombola bena Dane.

²⁶Bena tshisamba tshia Ashere kulonda, babalombola kudi Pagiyele, muana wa Okrane.

²⁷Bena tshisamba tshia Naftali kulonda, babalombola kudi Akira, muana wa Eyinane.

²⁸Ke muvua biluilu bia bena Izrayele bilondangane nanku mu luendu luabu.

²⁹Moshe kuambila bukonde buende, Obabe, muana wa Reyuwele,[35] muena Madiyane, ne: — Tuetu tudi tuya mu ditunga divua Maweja-Nangila mutulaye. Nanku mbimpe tuye nebe. Tshintu tshionsu tshikale Maweja-Nangila mutupeshe, neupete pebe.

³⁰Obabe kubenga, wamba ne: — Tshiena mua kuya nenu to. Ndi mpingana kuetu kudi baledi banyi.

³¹Moshe kumusengelela ne: — Kutulekedi nansha! Wewe udi mumanye miaba ya mu tshipela itudi mua kuasa mitanda. Neutuludike.

³²Wewe muye netu, netukusankishe ne bintu bituikala bapete kudi Maweja-Nangila, bu muvuaye mutulaye.

³³Bena Izrayele kumuangala ku mukuna wa Maweja-Nangila,[36] kuenda matuku asatu. Mushete wa ndondu uvua mubadianjidile bua kubaleja muaba uvuabu mua kuasa mitanda yabu bimpe.

³⁴Divuba dia Maweja-Nangila divua dienda kulu kua bena Izrayele mu munya, pavuabu babanga luendu.

³⁵Pavua bantu bajuka ne mushete wa ndondu, Moshe uvua wela diyi dikole, wamba ne: “Maweja-Nangila, juka, bua bena lukuna bebe bamuangalake, baluishi bebe banyeme![37]”

³⁶Pavua bena Izrayele bafike ne mushete wa ndondu muaba wa kuasa mitanda, Moshe uvua wela kabidi diyi dikole, wamba ne: “Maweja-Nangila, pinganaku, usombe munkatshi mua bena Izrayele, bantu bebe bapite bungi.”