Read Tshiluba Dibadika 12 Bible Online

Dibadika 12 - Tshiluba bible

Dibadika 12

¹Moshe uvua musele mukaji muena Kushe.[42] Arone ne Miriyame kumujana bua mukaji awu.

²Bavua bamba ne: — Maweja-Nangila mmuyukile amu ne Moshe nkayende anyi? Kena uyukila kabidi netu anyi?[43] Maweja-Nangila kumvua tshijanu atshi.

³Kadi Moshe uvua muntu wa muoyi mupuekele, mupite bantu bonsu ba pa buloba ku lutulu.

⁴Maweja-Nangila kubikila Moshe, Arone ne Miriyame, ubambila ne: — Ndayi bonsu basatu mu ntenta wa kusambakena. Kuyabu bonsu basatu.

⁵Maweja-Nangila kupueka mu divuba,[44] kuimana mu mushiku wa ntenta. Kubikilaye Arone ne Miriyame muaba awu. Bonsu babidi kusemena pabuipi.

⁶Maweja-Nangila kubambila ne: — Nuteleje bimpe tshindi nnuambila. Pikala muntu wa kunudi muambi, meme Maweja-Nangila[45] nendimanyishe kudiye, mmuleje malu mu lungenyi, nansha mu tshilota.

⁷Kadi, bua muntu wanyi Moshe kabiena nanku to. Bualu yeye ke udi ulombola bimpe bantu banyi bonsu bena Izrayele.[46]

⁸Ndi ngakula nende mudi bantu bayukidilangana, mmuambile malu onsu patoke, ndileja kudiye. Yeye udi umona tshimfuanyi tshianyi. Kadi nuvua nukimina kujana muntu wanyi Moshe bua tshinyi?

⁹Maweja-Nangila kumuka muaba awu ne tshiji.

¹⁰Divuba kumuka ku musonga wa ntenta. Miriyame kupeta disama dia nsudi, mitoke too bu mudi busu bua ndanda. Arone umutangila, kujadikaye ne: Miriyame udi ne disama dia nsudi.

¹¹Arone kusengelela Moshe, wamba ne: — Mukalenga wanyi, tudi bena tshibawu. Kadi ndi nkusengelela ne: Kutunyoki bua bubi butudi benze.

¹²Mubidi wa Miriyame kawena mua kunyanguka, ufiondoka makoba bu wa muana mufuile munda!

¹³Moshe kulomba Maweja-Nangila, wamba ne: — Mvidi Mukulu wanyi, anyisha ondapa disama edi!

¹⁴Maweja-Nangila kuambila Moshe ne: — Bu tatuende mumutuile mate mu mesu, kavua mua kufua bundu lumingu lujima anyi? Nanku numupatule mu mitanda bua lumingu lujima kabidi. Pashishe, neapingane kabidi munkatshi muenu.[47]

¹⁵Kupatulabu Miriyame mu mitanda lumingu lujima. Bena Izrayele bonsu bavua bamuindile bangabanga ne kutuadija luendu.

¹⁶Pashishe kumukabu mu Asherote bua kuya kuasa mitanda mu tshipela tshia Parane.