Read Tshiluba Dibadika 15 Bible Online

Dibadika 15 - Tshiluba bible

Dibadika 15

¹Maweja-Nangila kutuma Moshe

²bua kumanyisha bena Izrayele ne: “Panuafika mu ditunga dindi musue kunupa bua nuenu kusomba,

³nungoshile nyama mijima bua kundambula. Nundambule kabidi milambu ya bobumue. Nuenze nanku bua kukumbaja malaya, nansha anu ku budisuile buenu, nansha kabidi bua bibilu. Milambu ayi, ikale ya ngombe, mbuji nansha mikoku. Nenganyishe mupuya muimpe wayi.

⁴Muntu yonsu udi undambula nyama, neasakidile kabidi ne mulambu wa bintu bia pa madimi: kilo isatu ya bukula, budibu basambakaje ne litre umue ne tshitupa wa mafuta.

⁵Kadi ku muana wa mukoku yonsu, wa mulambu wa kuosha nansha wa bobumue, asakidile kabidi litre umue ne tshitupa wa maluvu a mvinyo.

⁶Pikala mulambu wa mukoku wa tshimpanga, asakidile kilo isambombu ya bukula budibu basambakaja ne mafuta litre ibidi.

⁷Neasakidile kabidi maluvu a mvinyo litre ibidi. Nanku nenganyishe mupuya muimpe wabi.

⁸Pikala muntu musue kundambula ngombe bua mulambu wa kuosha nansha wa bobumue, nansha bua kukumbaja malaya, nansha bua mulambu wa tshibidilu,

⁹ku nyama yonsu awu, asakidile kilo tshitema ya bukula, budibu basambakaja ne mafuta litre isatu.

¹⁰Asakidile kabidi maluvu a mvinyo litre isatu. Nanku nenganyishe mupuya muimpe wabi.

¹¹“Bena Izrayele balonde anu mikenji eyi, bua kundambula ngombe, mukoku wa tshimpanga, muana wa mukoku, nansha muana wa mbuji.

¹²Nansha muntu musue kundambula bimuna bia bungi, ku tshimuna tshionsu asakidile anu milambu mikuabu ituatedi eyi.

¹³Pikala bena Izrayele basue kundambula milambu ya mupuya muimpe idi insankisha, balonde bonsu anu mikenji eyi.

¹⁴Benyi badi basombe munkatshi muenu matuku makese, nansha benyi bamane kusombamu bidimu bia bungi, balelangane, bapete bikulu mu ditunga dienu, padibu basue kundambula milambu ya mupuya muimpe, balonde bonsu anu mikenji eyi.

¹⁵Nanku, bantu bonsu basanga ntete, nansha nuenu, nansha benyi badi munkatshi muenu, nulonde anu mikenji eyi, ku ndelanganyi ne ku ndelanganyi. Bualu meme Maweja-Nangila tshiena ne kansungansunga to.

¹⁶Mikenji yanyi idi mushindu umue bua bantu bonsu, buenu nuenu bena Izrayele, ne bua benyi badi munkatshi muenu.[65]”

¹⁷Maweja-Nangila kutuma Moshe,

¹⁸bua kumanyishaye bena Izrayele ne: “Panuafika mu ditunga munganubueja,

¹⁹nuenu balambe mampa ne bukula bua mu ditunga, nundambule meme tshitupa tshia mampa aa.

²⁰Nusope tshitapitapi, nuenze mikata, bua kuyindambula bu mudibu bandambula ntete inudi nushipula, panudi bamane kunowa.

²¹Nanku, nenundambule mukata wa kumpala unudi nulamba. Mukenji ewu ushale kabidi kashidi kudi ndelanganyi yenu yonsu.

²²“Nuenu bena Izrayele ne ndelanganyi yenu, panuikala batupakane, batupe ku umue wa ku mikenji yanyi imvua munumanyishe mukana mua Moshe ku kale too ne ku mpindiewu,

²⁴pikala bantu batupakane nanku mu mpukapuka kabayi bamanye, nebangoshile bonsu pamue ngombe mulume bua mulambu wa kuosha. Nenganyishe mupuya muimpe wawu. Pashishe, nebasakidile kabidi milambu ya tshibidilu ya bukula ne ya maluvu a mvinyo. Nebasakidile kabidi mbuji wa mpumbu bua mulambu wa kukobolola nawu bantu.

²⁵Nanku, mutuangaji neakobolole bena Izrayele bonsu basange ntete bu pa tshibidilu. Ke Maweja-Nangila kubafuila luse. Bualu bavua batupakane mu mpukapuka, bafila kabidi mulambu wa kuosha ne wa kubakobolola nawu.

²⁶Nanku, nebafuile bonsu luse, nansha bena Izrayele, nansha benyi badi basombe munkatshi muabu, bualu bonsu nuvua babuelakane mu bualu ebu.

²⁷“Kadi, pikala muntu amu umue mutupakane mu mpukapuka, neandambule muana wa mbuji wa tshidimu tshimue bua kudikobolola.

²⁸Mutuangaji neakobolole muntu awu bua bamufuile luse.[66]

²⁹Nanku, muntu yonsu, muena Izrayele nansha muenyi, udi utupakana mu mpukapuka, nebamukobolole anu mushindu umue ewu.

³⁰“Kadi muena Izrayele nansha muenyi, udi wenza bualu bubi ku bukole, udi upenda Maweja-Nangila. Nebamumushe munkatshi mua bena Izrayele.

³¹Neikale muena tshibawu, bualu mmubenge miaku yanyi, munyangakaje mikenji yanyi.”

³²Matuku avua bena Izrayele mu tshipela, kusanganabu muntu wangula nkunyi dituku dia Dikisha.

³³Kumufikishabu kudi Moshe ne Arone muaba uvua bena Izrayele bonsu basangile.

³⁴Kumulamabu bimpe, bindile mua kumanya dinyoka dia kumupesha.

³⁵Maweja-Nangila kuambila Moshe ne: — Muntu awu tshiende ndufu! Bena Izrayele bonsu bumuke ne muena tshibawu awu muaba udi mitanda, bamuase mabue, bamushipe.

³⁶Bena Izrayele kuenza muvua Maweja-Nangila mubambile. Kumukabu ne muntu awu muaba uvua mitanda, kumuasabu mabue, kufuaye.

³⁷Maweja-Nangila kutuma Moshe[67]

³⁸bua amanyishe bena Izrayele ne: “Nuenu ne ndelanganyi yenu, nutele malenda ku mielelu ya bilamba[68] bienu ne buanda bufikuluke.

³⁹Nanku, nuvuale bilamba bitela ne malenda. Panuikala numona malenda awu, nenuvuluke mikenji yanyi bua kuyikumbaja. Kabidi kanuakutendelela mvidie, bua kulonda majinga enu mabi ne lukuka luenu.

⁴⁰Nanku, nenukumbaje mikenji yanyi yonsu bua kuleja munudi bantu banyi.

⁴¹Meme ndi Maweja-Nangila Mvidi Mukulu wenu. Ndi munupatule mu Ejipitu bua ngikale Mvidi Mukulu wenu. Eyowa, ndi Maweja-Nangila Mvidi Mukulu wenu.”