Read Tshiluba Dibadika 18 Bible Online

Dibadika 18 - Tshiluba bible

Dibadika 18

¹Ke Maweja-Nangila kuambila Arone ne: — Ntelejayi wewe, ndelanganyi yebe ne bana benu bena Levi: bilema bidi bantu benza muaba wa tshijila, nebinutangile nuenu bonsu biangatshile ku lelu. Kadi bilema binudi nuenza mu mudimu wenu wa butuangaji nebitangile anu wewe Arone ne ndelanganyi yebe.

²Newanyishe kabidi bua bana benu bena Levi, bena tshisamba tshia tatuebe, basemene nebe ku nzubu wa tshijila. Kadi amu wewe ne ndelanganyi yebe nenubuele muaba udi mushete wa ndondu. Kadi bana benu bena Levi nebanulamate, banuambuluisha.

³Bana benu bena Levi abu nebanuambuluishe bua midimu yonsu ya mu ntenta wa kusambakena. Kadi kabena mua kusemena pa buipi ne tshilambuilu, nansha ne muaba udi bintu bia tshijila to. Nanku nansha wewe ne ndelanganyi yebe, nansha bobu bena Levi, kanuakufua to.

⁴Anu bana benu bena Levi nkayabu ke badi mua kunuambuluisha ku midimu yonsu ya mu ntenta wa kusambakena. Muntu mukuabu kena mua kufika pabuipi nenu to.

⁵Nuenu nenuenze mudimu muaba wa tshijila, ne ku tshilambuilu. Nanku tshiakufikila kabidi bena Izrayele bonsu munda to.

⁶Munkatshi mua bena Izrayele bakuabu, ndi musungule bana benu bena Levi. Badi bantu banyi. Kadi ndi munupeshebu bua benze midimu idi itangila ntenta wa kusambakena.

⁷Kadi wewe Arone ne ndelanganyi yebe, nuenze mudimu wa butuangaji ku tshilambuilu, ne muaba wa tshijila menemene, udi kunyima kua tshilamba tshidi tshilembelela. Meme Maweja-Nangila ndi munupeshe mudimu wa butuangaji ewu. Kadi pikala muntu mukuabu usemena pabuipi nanyi, neafue.

⁸Maweja-Nangila kuambila Arone ne: — Ndi mukupeshe mudimu wa kutangila milambu yonsu ya tshijila idi bena Izrayele bandambula. Milambu eyi ishale yebe wewe ne ya ndelanganyi yebe kashidi.

⁹Ku milambu ya tshijila, bamane kuosha bitupa bidi bianyi, wewe ne ndelanganyi yebe, nenuangate milambu ya bia mu madimi bionsu bidibu bandambula, nyama ya kukobolola nayi bantu, ne nyama ya milambu ya dinua tshibalu.

¹⁰Nuyidie muaba wa tshijila.[77] Kadi mu meku enu amu bantu balume, bana nansha bakulumpe, badi mua kuyidia, bualu idi ya tshijila.

¹¹Pashishe nuangate kabidi tshitupa tshia bintu bidi bena Izrayele bela mulu bua kundambula. Bintu abi nebishale biebe ne bia ndelanganyi yebe kashidi. Nebabidie amu kudi bena diku diebe, balume ne bakaji, badi kabayi ne mikiya.

¹²Ndi nnupesha kabidi biakudia bia tshianyi bia mu madimi, bidi bena Izrayele bandambula: mafuta, maluvu a mvinyo, ne ntete ya kuenza bukula.

¹³Bintu bionsu bidi bena Izrayele bandambula bia mu ditunga diabu mbiebe wewe ne bia bena diku diebe bonsu badi kabayi ne mikiya.

¹⁴Tshintu tshionsu tshidi bena Izrayele bafila kundi bua kashidi ntshiebe wewe[78] kabidi.

¹⁵Bamuanabute bonsu badibu bandambula, ba bantu ne ba nyama mbebe wewe. Kadi nebapikule muanabute wa balume wa muntu, nebapikule kabidi muanabute wa nyama udi ne mikiya.

¹⁶Muana wa balume yonsu mumane kukumbaja ngondu umue, nebamupikule ku nkanu itanu ya tshiamu tshitoke tshia mushinga mukole, bu mudi mushinga wa mu muaba wa tshijila, mudi lukanu lumue ne bujitu bua grame dikumi.

¹⁷Kadi muanabute wa ngombe, wa mukoku, nansha wa mbuji, kubena mua kumupikula to, bualu nnyama ya tshijila. Nenuele mashi ayi ku tshilambuilu. Nenungoshile kabidi mafuta a nyama ayi bua nganyishe dipembu diawu dimpe.

¹⁸Pashishe munyinyi wa nyama ayi, newikale wenu anu bu munudi nuangata tshiadi ne tshibelu tshia luseke lua balume bia nyama ya milambu ya bobumue.

¹⁹“Nanku milambu yonsu ya tshijila idi bena Izrayele bandambula, ndi nkupeshayi kashidi. Nebikale bintu biebe wewe, ne bia bana bebe ba balume ne ba bakaji, bilondeshile ndondu utuvua batue[79] nebe, kabidi ne ndelanganyi yebe yonsu.”

²⁰Maweja-Nangila kuambila kabidi Arone ne: — Mu ditunga dindi mpesha bena Izrayele, kuakupetamu tshiebe tshitupa tshia buloba, nansha buebe bupianyi to. Meme ke bupianyi buebe ne bubanji buebe munkatshi mua bena Izrayele bonsu.

²¹Maweja-Nangila kuamba kabidi ne: — Bena Levi badi bangenzela mudimu mu ntenta wa kusambakena, difutu diabu ke tshia dikumi tshimue tshia bintu bionsu bidi bantu bapeta mu Izrayele.[80]

²²Bena Izrayele bakuabu kabena mua kufika kabidi muaba wa tshijila to. Tshianana, badi mua kubunda tshibawu tshia lufu.

²³Bena Levi nkayabu ke badi mua kuenza mudimu mu ntenta wa kusambakena. Bilema bionsu bidibu benzamu, nebibakuate amu bobu. Nulame mukenji ewu kashidi. Bena Levi kabena ne tshiabu tshitupa tshia buloba,[81] bu mudi bisamba bikuabu bia bena Izrayele natshi to.

²⁴Kadi nebapete tshia dikumi tshia bintu bidi bena Izrayele ne bua kundambula. Ke pandi ngamba ne: kabakuikala ne tshiabu tshitupa tshia buloba, bu mudi bisamba bikuabu bia bena Izrayele natshi.

²⁵Maweja-Nangila kutuma Moshe

²⁶bua amanyishe kabidi bena Levi ne: — Pikala bena Izrayele bafike ne tshia dikumi tshindi munupeshe atshi, nuenu nkayenu numushe kabidi tshia dikumi ku tshia dikumi atshi bua kutshindambula.

²⁷Mulambu awu udi mushindu umue ne mulambu wa ntete ya kuenza bulula, nansha wa maluvu mapiamapia a mvinyo, udi bana benu bandambula.

²⁸Ke munudi nuenu kabidi mua kundambula tshintu ku tshia dikumi tshinudi nupeta kudi bana benu bena Izrayele. Nuangate anu tshia dikumi, nutshifile kudi mutuangaji Arone bua kutshindambula.

²⁹Ku bintu bionsu binudi nupeta, nundambule meme, Maweja-Nangila, tshitupa tshijima. Nutshisungule ku bintu bimpe binudi nupeta, bua kundambula.

³⁰Nuenu bamane kumusha binudi ne bua kundambula, nuangate penu bidi bishale, bu mudi bena Izrayele bonsu bangate bintu bidi bishale ku ntete ya bukula, ku maluvu a mvinyo, ne ku mafuta.

³¹Nudi mua kudia bintu ebi miaba yonsu. Nudi mua kubidia ne bena meku enu bonsu, bualu ndifutu dia ku mudimu unudi nungenzela mu ntenta wa kusambakena.

³²Nuenu bamane kundambula bidi bimpe ku bintu bionsu abi, kanuena nuenza tshilema panudi nuangata bidi bishala. Nanku kanuakunyanga milambu ya tshijila ya bena Izrayele to. Kanuakubunda tshibawu tshia lufu nansha.