Read Tshiluba Dibadika 19 Bible Online

Dibadika 19 - Tshiluba bible

Dibadika 19

¹Maweja-Nangila kutuma Moshe ne Arone ne:

²— Nuambile bena Izrayele ne: nututuadile ngombe mukunze, udi kayi ne bulema, kabidi udibu kabayi banji kuenza nende mudimu.

³Numufile kudi mutuangaji Elazare, bua umuke nende mu mitanda, bamukose muminu, yeye mutangile.

⁴Elazare neatue munu mu mashi a ngombe awu, aamiamine mu mushiku wa mbelu wa ntenta wa kusambakena misangu muanda mutekete.

⁵Pashishe boshe ngombe awu mujima, yeye mutangile. Boshe munyinyi, tshiseba, mashi ne bunyawu.

⁶Mutuangaji neangate nkunyi ya mutshi wa sedre, ditamba dia mutshi wa isope, ne buanda bua boya bukunze, abiele muiku, muaba udibu boshile ngombe awu.

⁷Pashishe mutuangaji neasukule bilamba biende, wowe mayi, apingane mu mitanda. Kadi neashale ne mikiya dituku adi dijima too ne ku dilolu.

⁸Muntu uvua moshe ngombe awu, neasukule kabidi bilamba biende, wowe mayi. Kadi neashale ne mikiya too ne ku dilolu.

⁹Muntu, udi kayi ne mikiya, neangate butu bua ngombe mukunze awu, abumushe mu mitanda, abuteke muaba udi kauyi ne mikiya. Bena Izrayele nebabulame bimpe, bua bikale benza nabu mayi a tshijila a kumiamina bantu.[82] (Ebi bidi bu mulambu wa kukobolola nawu bantu.)

¹⁰Muntu udi wangata butu bua ngombe mukunze awu, neasukule kabidi bilamba biende. Kadi udi ne mikiya too ne ku dilolu. Bena Izrayele ne benyi badi munkatshi muabu, bakumbaje mikenji eyi kashidi.

¹¹“Padi muntu mulenge tshitalu, udi ushala ne mikiya lumingu lujima.

¹²Kadi bua mikiya ayi kujika, amu yeye mudimiamine mayi a tshijila dituku disatu ne dia muanda mutekete, bua kudikobolola.[83] Pikalaye mulengulule bua kudimiamina mayi a tshijila dituku disatu ne dia muanda mutekete, neashale amu ne mikiya.

¹³Muntu yonsu udi ulenga tshitalu kayi musue kudikobolola, udi unyanga nzubu wa Maweja-Nangila. Nebamuipate munkatshi mua bena Izrayele. Bu muvuabu kabayi bamumiamine mayi a tshijila, udi amu ne mikiya.

¹⁴“Mikenji mikuabu inudi ne bua kukumbaja idi nunku: padi muntu mufuile mu ntenta, bantu bonsu bavua nende mu ntenta, ne bonsu badi babuelamu, badi bashale ne mikiya lumingu lujima.

¹⁵Pikala luesu mu ntenta amu, ludibu kabayi babuikila bimpe ne tshibuikidiji, bintu bionsu bidi mu luesu amu, nebikale ne mikiya.

¹⁶Pikala muntu mu mpata, mulenge tshitalu tshia muntu uvuabu bashipe, nansha tshia muntu mudifuile, neikale ne mikiya lumingu lujima, amu bu mudi muntu mulenge mifuba ya muntu, nansha mulenge pa lukita.

¹⁷Nanku bua kumusha mikiya pambidi pa muntu awu, bangate butu bua ngombe uvuabu balambule bua kukobolola nende bantu. Nebele butu abu mu luesu, belamu ne mayi a mpokolu.

¹⁸Pashishe muntu, udi kayi ne mikiya, neangate ditamba dia mutshi wa isope, aditue mu mayi adi mu luesu. Neamiamine mayi aa ku ntenta kuvua muntu awu mufuile, ne ku bintu bionsu bidimu, too ne ku bantu bavuamu. Amiamine kabidi muntu uvua mulenge tshitalu, mifuba ya muntu, nansha mulenge pa lukita.

¹⁹Mayi a tshijila awu, badi baamiamina muntu udi ne mikiya dituku disatu ne dia muanda mutekete. Bamane kumiamina mayi a dituku dia muanda mutekete, muntu awu neasukule bilamba biende, wowe mayi. Nanku mikiya yende neijike ku dilolu.

²⁰“Kadi pikala muntu udi ne mikiya kayi musue kuyumusha, nebamuipate munkatshi mua bena Izrayele, bualu udi unyanga muaba wa tshijila wa Maweja-Nangila. Bu mudibu kabayi bamumiamina mayi a tshijila a kumukobolola nawu, udi ushala ne mikiya.

²¹“Bena Izrayele nebakumbaje mikenji eyi kashidi. Muntu yonsu udi umiaminangana mayi a kukobolola awu, neasukule bilamba biende. Muntu mulenge mayi awu, neikale kabidi ne mikiya too ne ku dilolu.

²²Tshidi muntu udi ne mikiya ulenga tshidi tshipia mikiya. Muntu mulenge muntu udi ne mikiya, udi ushala pende ne mikiya too ne ku dilolu.”