Read Tshiluba Dibadika 21 Bible Online

Dibadika 21 - Tshiluba bible

Dibadika 21

¹Mukalenga wa Arade,[90] muena Kenaane, uvua muase mu tshitupa tshia kuinshi tshia ditunga adi. Kumvuaye lumu lua ne: bena Izrayele badi balonda njila wa ku Atarime. Nanku kubaluishaye, kukuata ne bamue bantu.

²Ke bena Izrayele kuditshipa kudi Maweja-Nangila, bamulaya ne: — Tuetu batshimune bantu aba, netubutule kabidi bimenga biabi bionsu.

³Maweja-Nangila kuitaba bivua bena Izrayele bamulaye, kufila bena Kenaane mu bianza biabu. Kushipabu bena Kenaane bonsu, kubutula ne bimenga biabu. Kuinyikabu muaba awu dina ne: Orma, mmomumue ne: nkabutu.[91]

⁴Bena Izrayele kumuka ku mukuna wa Ore. Kuyilabu njila wa Mayi manene makunze. Kunyungulukabu ditunga dia Edome.[92] Kadi luendu kubatonda, kabayi kabidi mua kulama lutulu to.

⁵Kujanabu Mvidi Mukulu ne Moshe, bamba ne: — Nuvua batumushe mu Ejipitu bua tshinyi? Bua tuetu kufuila nzala mu tshipela! Apa katuena ne mampa, katuena ne mayi a kunua! Tudi tudia anu mana bua dikenga. Kadi akadi matutonde.

⁶Diba adi Maweja-Nangila kubatumina nyoka ya lulengu. Kusumayi bena Izrayele. Bavule kufua.[93]

⁷Bavua bashale, kunyemenabu kudi Moshe, bamuambila ne: — Tudi bena tshibawu, bualu tuvua bakujane wewe, bajane kabidi ne Maweja-Nangila. Nanku, usengelele Maweja-Nangila. Atumushile nyoka eyi! Moshe kulombela bena Izrayele kudi Maweja-Nangila.

⁸Maweja-Nangila kuambila Moshe ne: — Wenze nyoka wa tshiamu tshikunze. Umulembeleje kulu. Nanku muntu yonsu udibu basuma kudi nyoka wa lulengu, padiye utangila nyoka wa tshiamu tshikunze, kena ufua to.

⁹Moshe kuenza nyoka wa tshiamu tshikunze, kumulembelejaye kulu. Nanku muntu yonsu uvuabu basuma kudi nyoka, uvua utangila nyoka wa tshiamu tshikunze, uvua ushala ne muoyi.[94]

¹⁰Bena Izrayele kumuka muaba awu, kufika ku Obote.

¹¹Bumuka ku Obote, kufika ku Iye-Abarime, mu tshipela tshivua luseke luvua diba dipatukila lua Mowabe.

¹²Bumuka muaba awu, kufikabu mu tshibandabanda tshia Zerede.

¹³Bumuka mu tshibandabanda amu, kusabukabu musulu wa Amone, udi ufumina ku bena Amore, upitshila mu tshipela, pashishe uleja mikalu pankatshi pa bena Mowabe ne bena Amore.

¹⁴Ke padibu bafunde mu Mukanda wa mvita wa Maweja-Nangila[95] ne: “…Vahebe mu Sufa, ne misapa yende, Amone

¹⁵ne misapa yende, udi luseke lua Are, uleja mikalu ya ditunga dia bena Mowabe…”

¹⁶Bena Izrayele bumuke muaba awu, kufika muaba uvuabu babikila ne: Tshiina tshia mayi. Ke Maweja-Nangila kuambila Moshe ne: — Ubikile bena Izrayele bonsu, bua mbapeshe mayi a kunua.

¹⁷Diba adi bena Izrayele kuimba musambu,[96] bamba ne: “Mayi apatuke mu tshiina, tuelele nkashi!

¹⁸Ke tshiina tshivua bamfumu bumbule, baneme bimbe, ne mulangala wabu wa bumfumu, ne dikombu dia bukalenga!” Bena Izrayele bumuke mu tshipela, mbafike ku Matana, mbaye

¹⁹ku Mahaliyele, pashishe ku Bamote,

²⁰mbafike ne ku tshibandabanda tshidi tshipitshila mu ditunga dia bena Mowabe, luseke lua ku nsongu ya mukuna wa Pisga, udi mutangilangane ne tshipela.

²¹Bena Izrayele kutuma bantu bua bambile Sihone, mukalenga wa bena Amore, ne:

²²— Anyisha tupitshile mu ditunga diebe. Katuena tunyanga madimi enu, nansha mvinyo to. Katuena tunua mayi a mu ditunga dienu to. Netulonde amu njila munene[97] buludi, katuyi tuapuka, too ne patuapita ditunga diebe.

²³Kadi Sihone kubenga bua bena Izrayele kupitshila mu ditunga diende. Kusangishaye bena mvita bende, kuya nabu too ne ku Yahase mu tshipela, bua kuluisha bena Izrayele.

²⁴Kadi bena Izrayele kutshimuna Sihone ne tshiluilu tshiende. Kumunyengabu ditunga diende dijima, bituadije ku musulu wa Amone kuinshi, too ne ku musulu wa Yaboke ku mutu, too ne ku mikalu mikolesha ya bena Amone, luseke ludi diba dipatukila.

²⁵Kunyengabu kabidi bimenga bionsu bia bena Amore, nansha tshia Eshebone, ne misoku yonsu ya ku mutumba. Kuasabumu!

²⁶Eshebone ke tshimenga tshinene tshia Sihone, mukalenga wa bena Amore. Bualu Sihone uvua muluangane mvita kale ne mukalenga mukuabu wa bena Mowabe, mumunyenge ditunga dijima too ne ku musulu wa Amone.

²⁷Nanku bedi ba kasala, bavua bela bimbe, bamba ne: “Ibakayi kabidi tshimenga tshia Eshebone, tumone! Asululayi tshimenga tshia mukalenga Sihone!

²⁸Tshimenga tshia Eshebone ntshikuate kapia. Ndimi ya kapia mmibande mu tshimenga tshia Sihone. Kapia kabutulu Are mu ditunga dia Mowabe, kabutulu bakalenga bavua ku mikuna ya ku musulu wa Amone.

²⁹Nuenu bena Mowabe, diakabi kaayi! Nudi nutendelela Kemoshe! Nuabutuki! Balume bavua bapanduke, kabidi ne bakaji, bonsu mbabakuate, mbabafile kudi Sihone, mukalenga wa bena Amore.[98]

³⁰Kadi tuakuasa bena Amore mikete! Tuakubutula Eshebone! Tuakunyangakaja ditunga dijima too ne ku Dibone, too ne ku Nofa, ne ku Medeba[99] mene.”

³¹Ke muvua bena Izrayele bafike mu ditunga dia bena Amore nanku.

³²Moshe kutuma bantu bua kutentekela tshimenga tshia Yazere. Bena Izrayele kuipata bena Amore, kubanyenga tshimenga atshi, kabidi ne misoku yonsu ivua mutumba[100] natshi.

³³Pashishe bena Izrayele kubenda, kuyila njila wa ku Bashane. Kadi Oge, mukalenga wa mu Bashane, ne bena mvita bende, kuya kuluisha bena Izrayele mu Edreyi.

³⁴Maweja-Nangila kuambila Moshe ne: — Kutshinyi mukalenga ewu to. Nenkuambuluishe bua umutshimune, umunyenge ditunga edi dijima. Umuenzele muuvua muenzele Sihone, mukalenga wa bena Amore, uvua musombe mu tshimenga tshia Eshebone.

³⁵Bena Izrayele kutshimuna Oge, bana bende, ne tshiluilu tshiende, kushipa bonsu, kubanyenga ditunga.