Read Tshiluba Dibadika 24 Bible Online

Dibadika 24 - Tshiluba bible

Dibadika 24

¹Balaame kujadika ne: Maweja-Nangila mmusue kuela bena Izrayele lupemba. Nanku kena muye kumukonka kabidi, bu muvuaye wenza kumpala to. Kutangilaye musangu umue mu tshipela.

²Ukenzakana, kumonaye bena Izrayele basomba mu mitanda yabu, ku tshisamba ku tshisamba. Mueyelu wa Mvidi Mukulu kumutulukila.

³Kuelaye kasala, wimba ne: “Meme, ndi Balaame muana wa Beyore, umvuayi tshindi ngamba. Ndi mmona malu masokome,[112] telejayi diyi dianyi!

⁴Meme ndi ngumvua tshidi Mvidi Mukulu wamba. Ndi mmona bidi Mvidi Mukulu wa bukole buonsu uleja. Yeye udi ummuenekela pandi mmukukuila.

⁵Nuenu bena Izrayele, ndelanganyi ya Yakobe, ntenta yenu inudi nusomba idi mimpe mitambe.

⁶Nzubu yenu idi itangalaka bu mayi, bu mpangu mimpe ku mielelu ya misulu. Idi mifuanangane ne mitshi ya ndunga ne ya nsanga, ivua Maweja-Nangila mukune ku muelelu wa musulu.

⁷Mayi adi muwule mu mpokolu, apueka mavule mu madimi. Mukalenga wa bena Izrayele udi mupite Agage.[113] Bukalenga buende budi ne bukole.

⁸Mvidi Mukulu ke udi mupatule bena Izrayele mu Ejipitu, mubapatule ne bukole bua bungi bu bua nyama wa mbowa. Nebabutule baluishi babu. Nebazaze mifuba yabu, babase mikete mipite bungi.

⁹Bena Izrayele kuzonzama, kulala panshi bu nyama ya ntambue. Udi mua kubajula ku bukole nnganyi? Izrayele, udi ukuela lupemba, bamuele pende! Udi ukutshipa, bamutshipe[114] biende!

¹⁰Balake kufikila Balaame munda bikole. Kumukanyinaye, wamba ne: — Meme mvua mukubikile bua kutshipa baluishi banyi. Kadi udi mubeele lupemba misangu isatu milondangane!

¹¹Mpindiewu umbuka, upingane kuebe! Mvua mukulaye bua kukusankisha bikole! Kadi Maweja-Nangila wakunyengi bintu biebe!

¹²Balaame kuandamuna Balake ne: — Mvua mumane kuandamuna bantu bauvua muntumine ne:

¹³“Balake, nansha yeye mumpeshe tshiamu tshitoke tshia mushinga mukole, ne mpawungi, bionsu bidi mu nzubu muende mua bukalenga, tshiena mua kubenga diyi dia Maweja-Nangila wanyi to. Ndi ne bua kuamba amu tshidiye ummanyisha!”

¹⁴Nanku, mpindiewu ndi mpingana kuetu. Kadi semena apa, nkumanyishe muakengeshabu bana benu kudi bena Izrayele matuku adi kumpala!

¹⁵Balaame kuela kasala, wimba ne: “Meme ndi Balaame, muana wa Beyore, umvuayi tshindi ngamba. Meme ndi mmona bimpe malu masokome.[115]

¹⁶Umvuayi diyi dianyi. Meme ndi ngumvua tshidi Mvidi Mukulu wamba. Ndi mmona bidi Maweja-Nangila wa bukole buonsu uleja. Yeye udi ummuenekela pandi mmukukuila.

¹⁷“Ndi mmona malu adi ne bua kuenzeka. Kadi, kaena enzeka mpindiewu to. Ndi njadika ne: kudi bualu, kadi kabuena pabuipi to: Mutotu neupatuke mu ndelanganyi ya Yakobe. Mukalenga nealedibue mu tshisamba tshia bena Izrayele. Neatuute bena Mowabe dikombu ku mbanga. Bantu badi bendakanyi mu ditunga neababoze mutu.[116]

¹⁸Yeye neakuate ditunga dia Seyire, ditunga dia baluishi bende bena Edome. Bena Izrayele nebabatshimune.

¹⁹Muntu wa ku ndelanganyi ya Yakobe, neatshimune baluishi bende. Neashidishe bantu bavua bashale ne muoyi mu bimenga biabu.” Balaame udi umanyisha ne: baluishi nebabutuke

²⁰Balaame umona bena Amaleke, kubambilaye ne: “Nuenu bena Amaleke, nuvua tshisamba tshipite bikuabu. Kadi nenubutuke bonsu amu mpindiewu.”

²¹Balaame kumona kabidi bena Kenaane. Kubambilaye ne: “Nuenu bena Kenaane nudi basombe talalaa mu ditunga dienu, amu mudi nyunyi musombe mu disua dibakila mu lubuebue.[117]

²²Kadi neboshe nzubu yenu. Bena Ashure[118] nebanukuate mu bupika.”

²³Balaame kuamba kabidi ne: “Akia! Udi mua kushala ne muoyi, padi Maweja-Nangila umuluisha nnganyi?[119]

²⁴Majuwa adi afumina ku Kitime. Badi babuela mu ditunga nebakengeshe bena Ashure, kabidi ne ndelanganyi ya Ebere.[120] Kadi nansha bobu badi babuela nebabutuke.”

²⁵Balaame mumane kuamba nanku, kupinganaye kuabu. Balake kuya luseke lukuabu.